ވ. އާރަށުގެ މައްސަލައިގައި ކުރީގެ ރައީސް އަބްދުﷲ ޔާމީން އަބްދުއްގައްޔޫމުގެ މައްޗަށް އުފުލާފައިވާ ރިޝްވަތު ގަބޫލުކުރުމާ މަނީ ލޯންޑަރިންގެ ދައުވާތަކުގެ މިއަދު އޮތް އަޑުއެހުމުގައި ދިފާއުގެ ފަރާތުން ހެކި ހުށަހަޅަން ފަސް ދުވަހުގެ މުއްދަތެއް ކޯޓުން ދީފި އެވެ.
އެ މައްސަލައިގައި މިއަދު 9:30 ގައި ކްރިމިނަލް ކޯޓުގައި ކުރިޔަށް ގެންދިޔަ އަޑުއެހުމުގައި އޮތީ ދައުލަތާ ދިފާއުގެ ފަރާތުން ވެސް ހެކި ހުށަހެޅުމުގެ މަރުހަލާ އެވެ.
މިއަދުގެ އަޑުއެހުމުގައި ދައުލަތުގެ ފަރާތުން ހެކި ހުށަހެޅިއިރު ދިފާއުން ވަނީ މައްސަލައިގެ ލިޔެކިޔުންތަކެއް އަދި ނުލިބޭތީ، ހެކި ހުށަހަޅަން އިތުރު ފުރުސަތެއް ދިނުމަށް އެދިފަ އެވެ.
އެ މައްސަލައިގައި ޔާމީންގެ އިތުރުން ދެން ހިމެނޭ ރިޝްވަތު ދިންކަމުގެ ދައުވާ އުފުލާފައިވާ ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމް ވެސް މިއަދުގެ އަޑުއެހުމުގައި ވަނީ ހެކި ހުށަހަޅަން ފުރުސަތަށް އެދިފަ އެވެ.
އެހެންވެ ކޯޓުން ވަނީ ހެކި ހުށަހެޅުމަށްޓަކައި ދިފާއަށް ފަސް ދުވަހުގެ މުއްދަތެއް ދީފަ އެެވެ.
މައްސަލައިގެ ދެން އޮންނަ އަޑުއެހުމުގައި ދިފާއުގެ ފަރާތުން ހެކި ހުށަހެޅުމުގެ މަރުހަލާ ކުރިޔަށް ދާނެ އެވެ.
މިއަދުގެ އަޑުއެހުމުގައި ވެސް ދިފާއުގެ ފަރާތުން ވަނީ މައްސަލަ ލައިވްކޮށް ޓީވީން ދުރަށް ދައްކައިގެން ކުރިޔަށް ގެންދިޔުމަށް އެދިފަ އެވެ. އެކަމާ ގުޅޭ ގޮތުން މިއަދުގެ އަޑުއެހުމުގައި ވާހަކަ ދެއްކިއިރު، އެކަމަށް މިއަދު ވެސް ވަކި ގޮތެއް ނިންމާފައެއް ނުވެ އެވެ.
ނަމަވެސް މައްސަލަ ބައްލަވާ ކުރިމިނަލް ކޯޓުގެ އިސްގާޒީ އަހްމަދު ޝަކީލް ވަނީ ހެކި ހުށަހެޅުމުގެ މަރުހަލާތައް ނިމި، ޝަރީއަތްތައް ފެށިގެންދާއިރު، މައްސަލަ ލައިވްކޮށްގެން ކުރިޔަށް ގެންދެވޭނެ ކަމަށް މިއަދުގެ އަޑުއެހުމުގައި ވިދާޅުވެފަ އެވެ.
އެ މައްސަލައިގައި ދެން އަޑުއެހުމެއް ބާއްވާނީ އަންނަ އާދިއްތަ ދުވަހު އެވެ.
