ޔޫކްރެއިންގައި މަސައްކަތް ކުރަމުން ދިޔަ އެމެރިކާގެ ނޫސްވެރިޔެއްގެ ގަޔަށް، ވެރިރަށް ކިޔެވް ކައިރީގައި އޮންނަ އިރްޕިން އަވަށުގައި، ބަޑި ޖަހައި މަރާލައިފި އެވެ.
އުމުރުން 50 އަހަރުގެ ބްރެންޓް ރެނޯޑްއަކީ ނޫސްވެރިޔެއްގެ އިތުރުން ފިލްމު އުފައްދާ މީހެކެވެ. އޭނާ މީގެ ކުރިން ވަނީ ނިއު ޔޯކް ޓައިމްސްއަށް މަސައްކަތްކޮށްދީފަ އެވެ.
ކިޔެވް ފުލުހުންގެ ވެރިޔާ އަންދްރިޔޭ ނެބްޔީޓޯވް ވިދާޅުވީ ރެނޯޑްއަށް ޓާގެޓް ކުރީ ރަޝިއާގެ ސިފައިން ކަމަށެވެ. ހަމަލާގައި އިތުރު ދެ ނޫސްވެރިންނަށް އަނިޔާވެ، ހޮސްޕިޓަލަށް ގެންދިޔަ އެވެ.
މިއީ ޔޫކްރެއިން ހަނގުރާމަ ރިޕޯޓް ކުރަން އުޅުމުގެ ތެރޭގައި އެހެން ގައުމެއްގެ ނޫސްވެރިޔަކު މަރުވި ފުރަތަމަ ފަހަރެވެ. ދައުރުވަމުންދާ ފޮޓޯތަކުން ފެންނަނީ ނިއު ޔޯކް ޓައިމްސްއިން ރެނޯޑްއަށް ދޫކޮށްފައިވާ ޕްރެސް ކާޑެވެ.
އެ ނޫހުން ނެރުނު ބަޔާނެއްގައި ބުނީ ރެނޯޑްގެ މަރާ އެކު "ފުން ހިތާމައެއް" ލިބިފައިވާ ކަމަށާއި ނަމަވެސް އޭނާ ޔޫކްރެއިންގައި އުޅުނީ އެ ނޫހުގެ ފަރާތުން ނޫން ކަމަށެވެ.
އެ ނޫހުން ބުނީ ރެނޯޑް އެންމެ ފަހުން އެ ނޫހާ އެކު މަސައްކަތް ކުރީ 2015 ގައި ކަމަށެވެ. އަދި އޭނާ ޔޫކްރެއިންގައި އަޅައިގެން އުޅުނު ޕްރެސް ކާޑަކީ އަހަރުތަކެއް ކުރިން ދޫކުރި ކާޑެއް ކަމަށެވެ.
އެމެރިކާގެ ގިނަ ނޫސްތަކަކަށް މަސައްކަތްކޮށްދީފައިވާ ރެނޯޑް ވަނީ އަފްގާނިސްތާން، އިރާގް އަދި ހެއިޓީ ފަދަ ނުރައްކާތެރި ގައުމުތަކުން ރިޕޯޓުކޮށްފަ އެވެ. އޭނާއަށް ވަނީ ޕީބޮޑީ އެވޯޑެއް ވެސް ލިބިފަ އެވެ.
ޔޫކްރެއިން ހަނގުރާމައިގައި އެންމެ ފުރަތަމަ ނޫސްވެރިޔަކު މަރުވީ ކިޔެވްގެ ޓީވީ ޓަވަރަށް ދިން ހަމަލާގަ އެވެ. އެ ހަމަލާގައި މަރުވީ ޔޫކްރެއިންގެ ޓީވީ ޗެނަލް ލައިވްގެ ނޫސްވެރިޔާ ޔެވްހެނީ ސްކައުމް އެވެ.
އޭގެ ދުވަސްކޮޅެއް ފަހުން އިނގިރޭސި ނޫސްވެރިއެއްގެ ގަޔަށް ވެސް ކިޔެވްގައި ބަޑި ޖެހުމުން އަނިޔާވި އެވެ.
