ސްރީ ލަންކާގައި މި މަހު ކުރިއަށްދާ ކޮމަންވެލްތު ބީޗްވޮލީބޯޅަ ކޮލިފައިންގައި ރާއްޖޭގެ ފަރާތުން ވާދަކުރާނެ ޕެއާ އަކަށް އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް)ގެ ޕެއާ ހަމަޖައްސައިފި އެވެ.
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން މިއަދު ސޯޝަލް މީޑިއާގައި އާންމުކޮށްފައިވާ ގޮތުގައި މި މަހު 18-19 ގައި ލަންކާގައި ކުރިއަށްދާ ކޮމަންވެލްތު ގޭމްސްގެ ކޮލިފައިންގައި ރާއްޖޭގެ ފަރާތުން ވާދަކުރަނީ ކުޑަކާއްޓެ އާއި އެޑަމްގެ ޕެއާ އެވެ. އެ ގޮތަށް ނިންމީ ގައުމީ ބީޗްވޮލީބޯޅަ ޓީމުގެ ކޯޗު ބްރެޒިލްގެ ވިނީޝިއުސް މާޓިން ޖިއޯނީ އެވެ.
މިއީ އެޑަމް އާއި ކުޑަކާއްޓެ، ޕެއާއެއްގެ ގޮތުގައި ކުރިމަތިލާނެ ދެ ވަނަ މެޗުތަކެވެ.
ކުޑަކާއްޓެ އާއި އެޑަމްގެ ޕެއާ ވަނީ މިދިޔަ މަހު ލަންކާގައި ބޭއްވި ސެންޓަރަލް ޒޯންގެ ފުރަތަމަ ބީޗްވޮލީބޯޅަ މުބާރާތުގައި ވާދަކޮށްފަ އެވެ. އެއީ ބައިނަލްއަގުވާމީ މުބާރާތެއްގައި ޕެއާއެއްގެ ގޮތުގައި އެޑަމް އާއި ކުޑަކާއްޓެގެ ފުރަތަމަ މުބާރާތެވެ. އެ މުބާރާތުގައި ކުޑަކާއްޓެ އާއި އެޑަމްގެ ޕެއާ ފުރަތަމަ މެޗުން ވަނީ ލަންކާގެ ޕެއާއެއް އަތުން މޮޅުވެފަ އެވެ. އޭގެ ފަހުން ލަންކާގެ އެއް ވަނަ ޕެއާ އާއި ޕާކިސްތާންގެ ޕެއާ އަކާއި އީރާންގެ ޕެއާއެއް އަތުން ވަނީ ބަލިވެފަ އެވެ.
ކޮމަންވެލްތު ކޮލިފައިންގައި ވާދަކުރުމުގެ ކުރިން ޓްރެއިނިންއެއްގެ ގޮތުން ގައުމީ ބީޗްވޮލީބޯޅަ ޓީމު ވަނީ ގަތަރުގައި ކޭމްޕްކޮށްފަ އެވެ. ގަތަރު ޓްރެއިނިން ކޭމްޕްގައި ކުޑަކާއްޓެ އާއި އެޑަމްގެ ޕެއާގެ އިތުރުން ގައުމީ ކޯޗު ވިނީޝިއުސްއާ އެކު ރާއްޖޭގެ އަނެއް ޕެއާ ކަމަށްވާ، އަހުމަދު މުހައްމަދު (ކޯކޭ) އާއި މުހައްމަދު އަލީ (ޑެންޒޯ)ގެ ޕެއާ އަންނަނީ ޓްރެއިނިން ހަދަމުންނެވެ. ބީޗްވޮލީބޯޅަ ކުޅުންތެރިޔާ، ޝިއުނާޒް އަބްދުލް ވާހިދު (މަންކޭ) ހަރަކާތްތެރިވަމުން އަންނަނީ އެސިސްޓަންޓް ކޯޗެއްގެ ގޮތުގަ އެވެ.
ކޮމަންވެލްތު ކޮލިފައިންގައި ރާއްޖޭގެ އެއް ޕެއާއެއް ނުކުންނަން ޖެހޭނީ ލަންކާ، މެލޭޝިއާ އަދި ސިންގަޕޫރާ ދެކޮޅަށެވެ. އެ ތަނުން މުބާރާތަށް ކޮލިފައިވާނީ އެއް ޕެއާ އެވެ. ވަރުގަދަ މެޗުތައް ކުޅޭ ވަރަކަށް ގައުމީ ބީޗްވޮލީ ޓީމުގެ ފެންވަރު ރަނގަޅުވާނެ ކަމަށް ގައުމީ ކޯޗު ވިނީޝިއުސް ވަނީ ބުނެފަ އެވެ.
