ޕެރިސް (މާޗު 13) - ޗެމްޕިއަންސް ލީގުން ޕީއެސްޖީ ކެޓުމާ އެކު، އެ ކްލަބުގެ ރައީސް ނާސިރު އެލް ހެއްލާފީ، މަގާމުން އިސްތިއުފާ ދޭންޖެހޭ ކަމަށް އެ ކްލަބުގެ އަލްޓްރާ ސަޕޯޓަރުންގެ ގުރޫޕުން ގޮވާލާފައިވަނިކޮށް، ފްރެންޗް ލީގުގައި މިއަދު ބޯޑޯ އަތުން 3-0 އިން ޕީއެސްޖީ މޮޅުވި މެޗުގައި އެ ޓީމުގެ ގިނަ ކުޅުންތެރިންނާ ދެކޮޅަށް ސަޕޯޓަރުން ޝުއޫރުފާޅުކޮށްފި އެވެ.
ބޯޑޯ އަތުން މިއަދު ޕީއެސްޖީ މޮޅުވި މެޗުގައި ގޯލުތައް ޖެހީ ކީލިއަން އެމްބާޕޭ އާއި ނޭމާ އަދި ލެއަންޑްރޯ ޕަރޭޑޭސް އެވެ. މި މެޗުގައި ޕީއެސްޖީގެ ކުޅުންތެރިން ކަމަށްވާ ނޭމާ އާއި ލިއޮނަލް މެސީ ފައިގައި ބޯޅަ ޖެހުމާ އެކު ސަޕޯޓަރުން ވަނީ ނުރުހުމުގެ ގޮތުން އަޑުގަދަކޮށްފަ އެވެ.
މިއަދުގެ މެޗުގެ ކުރިން ޕީއެސްޖީގެ އެކި ސަޕޯޓަރުންގެ ގުރޫޕް ތަމްސީލްކުރާ ކޮލެޓްޓިފް އަލްޓްރާސް ޕެރިސް (ސީޔޫޕީ) އިން ސޯޝަލް މީޑިއާގަައި ބުނެފައިވަނީ "މެނޭޖްމަންޓުން އިސްތިއުފާ ދޭންޖެހޭ،" މިހެންނެވެ. "މި ކްލަބުގެ އެންމެ މަތީ ހަރުފަތަށް ގެންގޮސްދިނުމުގައި ނާސިރު އަލް ހެއްލާފީ ހިއްސާ ބޮޑުކަން ގަބޫލްކުރަން. މިއީ ޒާތީ ކަމެއް ނޫން. އެކަމަކު އޭނާ އަކީ އެ މަގާމަށް އެންމެ އެކަށީގެންވާ ފެންވަރުގެ މީހެއް ނޫން."
ޕީއެސްޖީން މިހާތަނަށް ހޯދި ނުވަ ލީގު ޗެމްޕިއަންޝިޕްގެ ތެރެއިން ހަތް ޗެމްޕިއަންޝިޕް ހޯދީ ގަތަރު ސްޕޯޓްސް އިންވެސްޓްމަންޓް ގުރޫޕުން އެ ކްލަބާ ހަވާލުވި ފަހުންނެވެ. އެކަމަކު ޗެމްޕިއަންސް ލީގު ހޯދުމަށް އެ ކްލަބުން ދެކެމުންދާ ހުވަފެންތައް އަދި ހަގީގަތަކަށް ނުވެ އެވެ.
ގަތަރަށް ނިސްބަތްވާ އަލް ހަލީފާ އަކީ ޕީއެސްޖީގެ ރައީސްގެ އިތުރުން، ބެއިން މީޑިއާ ގުރޫޕާއި ގަތަރު ސްޕޯޓްސް އިންވެސްޓްމަންޓްގެ ޗެއާމަނެވެ. "ކްލަބުގެ މެނޭޖްމަންޓް އެންމެ މަތީ ފަންތިން ފެށިގެން، ބަދަލެއް އެބަ ބޭނުންވޭ،" ސީޔޫޕީން ބުންޏެވެ.
މި ސީޒަންގެ ޗެމްޕިއަންސް ލީގުގެ ގަދަ 16ގެ ބުރުން ޕީއެސްޖީ ކެޓީ މިދިޔަ ހަފުތާ ކުޅުނު ދެވަނަ ލެގުގައި ރެއާލް މެޑްރިޑް އަތުން 3-1 އިން ރަށުން ބޭރުގައި ބަލިވުމުންނެވެ.
އެ މެޗުގެ ރެފްރީގެ ބައެއް ނިންމުންތަކާ ހިތްހަމަނުޖެހިގެން، ހެއްލާފީ ވަނީ މެޗަށް ފަހު ރެފްރީޒް ރޫމަށް ވަންނަން މަސައްކަތްކޮށް، އެސިސްޓަންޓް ރެފްރީގެ ބައެއް ސާމާނުތަކަށް ގެއްލުން ދީފަ އެވެ.
