ޕެރިސް، ފްރާންސް (މާޗް 13) - މޫސުމީ ބަދަލާ ގުޅިގެން އަޅާ ފިޔަވަޅުތައް ވަރުގަދަކޮށް އަވަސް ކުރުމަށް ގޮވާލައި ފްރާންސްގައި 80،000 މީހުން މުޒާހަރާކޮށްފި އެވެ.
ފްރާންސްގެ ރިޔާސީ އިންތިހާބުގެ ކެމްޕެއިނާ ދިމާކޮށް ބޭއްވި މުޒާހަރާގައި އެންމެ ގިނަ މީހުން އެއްވީ ވެރިރަށް ޕެރިސްގަ އެވެ. އެ ސިޓީގައި 32،000 މީހުން މުޒާހަރާ ކުރި އެވެ.
މޫސުމީ ބަދަލާ ގުޅޭ އިންސާފަށް މަސައްކަތް ކުރާ އަމިއްލަ ޖަމިއްޔާތަކުން ހެދި ދިރާސާއަކުން ދެއްކި ގޮތުގައި ކެމްޕެއިންގައި ވާހަކަ ދައްކާ މައުޟޫއުތަކުގެ ތެރެއިން މޫސުމީ ބަދަލާ ގުޅޭ މައުޟޫއަށް ލިބެނީ ކުޑަ ސަމާލުކަމެކެވެ.
މުޒާހަރާގައި 80،000 މީހުން ބައިވެރިވި ކަމަށް ޖަމިއްޔާތަކުން ބުނި ނަމަވެސް، އިންޓީރިއާ މިނިސްޓްރީން ބުނީ ބައިވެރިވީ 40،000 މީހުން ކަމަށެވެ. އޭގެ ތެރެއިން 11،000 މީހުން އެއްވީ ޕެރިސްގަ އެވެ.
ފްރާންސްގެ ރިޔާސީ އިންތިހާބުގެ ކެމްޕެއިން ކުރިއަށް ދާއިރު، އިންތިހާބު އޮންނާނީ އޭޕްރިލް މަހުގަ އެވެ. ރައީސް އިމޭނުއެލް މެކްރީން އިތުރު ދައުރަކަށް ވަނީ ކުރިމަތިލައްވާފަ އެވެ.
