މިލާން (މާޗް 13) - އިޓާލިއަން ލީގުގައި ރޭ އެމްޕޮލީ 1-0 އިން ބަލިކޮށް އޭސީ މިލާނުން އެއް ވަނައިގައި ފަސް ޕޮއިންޓުގެ ލީޑެއް ނެގިއިރު، ސަމްޑޯރިއާ އަތުން 3-1 އިން މޮޅުވެ، ޔުވެންޓަސް އިން އެ ޓީމުގެ ރަނގަޅު ފޯމު ދަމަހައްޓައިފި އެވެ.
ރޭގެ ނަތީޖާއާ އެކު މިލާން އެއް ވަނައިގައި އޮތީ ދެ ވަނައިގައި އޮތް އިންޓަ މިލާނަށް ވުރެ ދެ މެޗު އިތުރަށް ކުޅެގެން ފަސް ޕޮއިންޓުގެ ލީޑަކާ އެކު އެވެ. މިލާނަށް 29 މެޗުން 63 ޕޮއިންޓް ލިބިފައިވާއިރު، އިންޓަ އަށް 27 މެޗުން ވަނީ 58 ޕޮއިންޓް ލިބިފަ އެވެ. ތިން ވަނައިގައި އޮތް ނަޕޯލީ އަށް 28 މެޗުން 57 ޕޮއިންޓް ލިބިފައިވާއިރު، ހަތަރެއްގައި އޮތް ޔުވެންޓަސްގެ އޮތީ 29 މެޗުން 56 ޕޮއިންޓެވެ.
މިލާނުގެ މެޗު ފަށައިގެން މާގިނައިރެއް ނުވެ، އެ ޓީމުގެ އަލެސަންދްރޯ ފްލޮރެންޒީ ޖެހި ބޯޅައެއް އެމްޕޮލީގެ ކީޕަރު ވިކާރިއޯ ވަނީ މަތަކޮށްފަ އެެވެ. މިލާނުން މެޗުގައި ޖެހި ހަމައެކަނި ގޯލު ކާމިޔާބުކުރީ 19 ވަނަ މިނިޓްގަ އެވެ. އޮލީވިއޭ ޖިރޫޑް ޖެހި ހިލޭޖެހުމެއް އެމްޕޮލީގެ ދިފާއީ ފާރުގައި ޖެހިފައި އައިވަގުުތު މިލާނުގެ ޕިއޭރޭ ކަލޫލޫ ހަމަޖެހިލާފައި ފޮނުވާލި ބޯޅަ އަމާޒުވީ ގޯލުގެ ދުރު ކަނަށެވެ.
ލީޑުފުޅާކުރަން މިލާނުން ކުރި މަސައްކަތުގައި ޖިރޫޑް ފޮނުވާލި ބޯޅައެއް ކީޕަރު ވިކާރިއޯ މަތަކުރިއިރު، ޖޫނިއާ މެސިއަސް ފޮނުވާލި ބޯޅަ ވެސް ހުއްޓުވީ ވިކާރިއޯ އެވެ. އެމްޕޮލީން ގޯލެއް ޖެހޭތޯ ފޮނުވާލި އެންމެ ނުރައްކާތެރި ހަމަލާގައި، ސެބަސްޓިއާނޯ ލުޕެރްޓޯ ބޮލުން ޖެހި ބޯޅަ މިލާން ކީޕަރު މައިކް މައިންޔޯން ވަނީ މަތަކޮށްފަ އެވެ.
މެޗަށް ފަހު މިލާނުގެ ކޯޗު ސްޓެފާނޯ ޕިއޯލީ ބުނީ އޭނާގެ ޓީމު އެއް ވަނައިގައި އޮތް ކަމުގައި ވިޔަސް އަސްލު މަންޒަރެއް ފެންނަން އޮތީ ފަހަތުގައި އޮތް ޓީމުތައް މެޗުތައް ހަމަވުމުންނެވެ.
ޔުވެންޓަސްގެ އަލްވާރޯ މޮރާޓާ ގޯލު ޖެހުމަށް ފަހު އުފާފާޅުކުރަނީ.
ސަމްޑޯރިއާ ދަނޑުގައި ރޭ ކުޅުނު މެޗުގައި ޔުވެންޓަސް އިން ލީޑުނެގީ 23 ވަނަ މިނިޓްގައި ސަމްޑޯރިއާގެ މާޔާ ޔޮޝީޑާ އަތުން ބައިކޮޅަށް ވަން ގޯލުންނެވެ. ހުއާން ކުއަޑްރާޑޯ ނެގި ހުރަހެއް ސަލާމަތްކުރަން އުޅުމުގެ ތެރޭގައި ޔޮޝީޑާ ފައިގައި ޖެހި ބޯޅަ ވަނީ ބައިކޮޅަށެވެ.
ޔުވެންޓަސް އިން ލީޑުފުޅާކުރީ މެޗުގެ 34 ވަނަ މިނިޓްގައި ޕެނަލްޓީ އަކުން އަލްވާރޯ މޮރާޓާ ޖެހި ގޯލުންނެވެ. މިއީ ޔުވެންޓަސްގެ މޮއިސް ކީން އަށް އޭރިއާތެރެއިން ކުރި ފައުލަކަށް ރެފްރީ ދިން ޕެނަލްޓީއެކެވެ.
ދެ ވަނަ ހާފުގައި ޔުވެންޓަސްގެ އޭޑްރިއަން ރަބިއޯ އަތުގައި ބޯޅައިން ޖެހުމުން ލިބުނު ޕެނަލްޓީ އަކުން ސަމްޑޯރިއާގެ ކަންޑްރޭވާ ޖެހި ބޯޅަ ޔުވެންޓަސް ކީޕަރު ވޮޒްޝިއޭ ޝެޒްނީ ވަނީ މަތަކޮށްފަ އެވެ. އެކަމަކު، މެޗުގެ 84 ވަނަ މިނިޓްގައި ސަމްޑޯރިއާގެ އަބްދުލްހަމީދު ސަބީރީ ހިލޭ ޖެހުމަކުން ފޮނުވާލި ބޯޅަ ވަނީ ގޯލަށް ވަދެފަ އެވެ. އޭގެ ހަތަރު މިނިޓް ފަހުން މެނުއަލް ލޮކަޓެއްލީ ނެގި ހުރަހަކުން މޮރާޓާ ބޮލުން ގޯލެއް ޖަހައި ޔުވެންޓަސް އަށް މެޗުގެ ތިން ޕޮއިންޓް ކަށަވަރުކޮށްދިނެވެ.
ރޭގެ ނަތީޖާއާ އެކު ޔުވެންޓަސް ވަނީ އިޓާލިއަން ލީގުގައި ބަލިނުވެ، 15 މެޗު ހަމަކޮށްފަ އެވެ. މިއީ މި ވަގުތަށް މި ސީޒަނުގައި ޔޫރަޕްގެ އެންމެ ވަރުގަދަ ފަސް ލީގުގައި ވެސް ބަލިނުވެ، ޓީމެއްގެ އޮތް އެންމެ ރަނގަޅު ރެކޯޑެވެ.
