މެންޗެސްޓާ (މާޗް 12) - އިނގިރޭސި ޕްރިމިއާ ލީގުގައި މިރޭ ކްރިސްޓިއާނޯ ރޮނާލްޑޯގެ ހެޓްރިކުން 3-2 އިން ޓޮޓެންހަމް ހޮޓްސްޕާސް ބަލިކޮށް މެންޗެސްޓާ ޔުނައިޓެޑް އަލުން ލީގުގެ ހަތަރު ވަނަ އަށް ޖެހިލައިފި އެވެ.
ޔުނައިޓެޑް ހަތަރު ވަނަ އަށް އެރީ 29 މެޗުން 50 ޕޮއިންޓް ހޯދައިގެންނެވެ. ކުރިން ހަތަރެއްގައި އޮތް އާސެނަލް އޮތީ ޔުނައިޓެޑަށް ވުރެ ހަތަރު މެޗު މަދުން ކުޅެގެން، 25 މެޗުން 48 ޕޮއިންޓާ އެކު އެވެ. އާސެނަލުން މާދަމާރޭ އަމިއްލަ ދަނޑުގައި ލެސްޓާ ސިޓީ ބަލިކޮށް އަލުން ލީގުގެ ހަތަރު ވަނަ އަށް އެރޭނެ އެވެ.
މިދިޔަ ހަފްތާގައި މެންޗެސްޓާ ސިޓީ އަތުން ޔުނައިޓެޑް ބަލިވި މެޗުގައި ރޮނާލްޑޯ އަނިޔާގެ ސަބަބުން ނުކުޅެ އެވެ. އެކަމަކު، މިރޭގެ މެޗުގެ ފުރަތަަަމަ އެގާރައިގައި ހިމެނިގެން ރޮނާލްޑޯ ކުޅުނެވެ. މެޗަށް ނުކުތްއިރު، ޔުނައިޓެޑަށް އޮތް ކަންބޮޑުވުމަކީ ބަލިވެ އުޅޭތީ ޕޯޗުގީސް މިޑްފީލްޑަރު ބްރޫނޯ ފެނާންޑޭސަށް މި މެޗުގައި ނުކުޅެވުނެވެ. އެންމެ ރަނގަޅަށް ނުކުޅެވުނު ނަމަވެސް ރޮނާލްޑޯ، 37، ދެއްކި ތަފާތުން ޔުނައިޓެޑް މި ވަނީ ގަދަ ހަތަރެއްގެ ރޭހުގައި މުހިންމު މޮޅެއް ހޯދައިފަ އެވެ.
މެޗު ފަށައިގެން ޔުނައިޓެޑުން ވަނީ ޓޮޓެންހަމްގެ އެރިކް ޑަޔާ އަތުގައި ބޯޅަ ޖެހުމާ އެކު ޕެނަލްޓީ އަކަށް އެޕީލްކޮށްފަ އެވެ. އެކަމަކު، މެޗުގެ ރެފްރީ ޖޯން މޮސް ނިންމީ ޕެނަލްޓީއެއް ނޫން ކަމަށެވެ. މެޗުގެ 12 ވަނަ މިނިޓްގައި ޔުނައިޓެޑް ލީޑުނެގީ އޭރިއާބޭރުން ރޮނާލްޑޯ ޖެހި މޮޅު ގޯލުންނެވެ. ރޮނާލްޑޯ ޖެހި ބޯޅަ ގޯލަށް ވަނީ ޓޮޓެންހަމްގެ ކީޕަރު ހޫގޯ ލޮރީސް އަތްމަތިން ގޮހެވެ.
ފުލުފުލުގައި ޓޮޓެންހަމުން ކުރަމުންދިޔަ އެޓޭކްތަކުގެ ބޭނުންހިފައި އެ ޓީމުން އެއްވަރުުކުރީ މެޗުގެ 35 ވަނަ މިނިޓްގައި ޖެހި ޕެނަލްޓީ އަކުންނެވެ. މި ޕެނަލްޓީ ކާމިޔާބުކުރީ ކޭން އެވެ. މިއީ ޓޮޓެންހަމްގެ ޑޭޖާން ކުސުލެވްސްކީ ނެގި ހުރަހެއް ދިފާއުކުރަން އުޅުމުގެ ތެރޭގައި ޔުނައިޓެޑްގެ ވާތުބެކް އަލެކްސް ޓެލޭސް އަތުގައި ބޯޅަ ޖެހުމުން ރެފްރީ ދިން ޕެނަލްޓީއެކެވެ.
ޓޮޓެންހަމުން ނަތީޖާ ހަމަހަމަކުރިތާ ދެ މިނިޓް ފަހުން ރޮނާލްޑޯ ވަނީ އިތުރު ގޯލެއް ޖަހައި، ޔުނައިޓެޑަށް ދެ ވަނަ ފަހަރަށް ލީޑުނަގައިދީފަ އެވެ. މިއީ ޓޮޓެންހަމްގެ ޑިފެންސް ލައިންގެ އޮފްސައިޑް މަޅިން ސަލާމަތްވެ، ޖޭޑަން ސަންޗޯ ހުސްކޮށްލާފައި ދިން ބޯޅައަކުން ރޮނާލްޑޯ ޖެހި ގޯލެކެވެ. މިއީ ފުޓްބޯޅަ ކެރިއަރުގައި ރޮނާލްޑޯ ޖެހި 806 ވަނަ ގޯލެވެ. މިއާ އެކު ރޮނާލްޑޯ ވެފައިވަނީ ފީފާގެ ރެކޯޑްތަކަށް ބަލާއިރު، ފުޓްބޯޅައިގެ އެންމެ ގިނަ ގޯލު ޖެހި ކުޅުންތެރިޔާ އަށެވެ.
ދެ ވަނަ ހާފްގައި ކުޅުން ފަށައިގެން ޓޮޓެންހަމް އިން ދެ ވަނަ ފަހަރަށް ނަތީޖާ ހަމަހަމަކުރަން ކުރި މަސައްކަތް ކާމިޔާބުވީ މެޗުގެ 72 ވަނަ މިނިޓްގަ އެވެ. މިއީ ޓޮޓެންހަމްގެ ސާޖް ރެގީއޯން ނެގި ހުރަހެއް ދިފާއުކުރަން އުޅުމުގެ ތެރޭގައި ޔުނައިޓެޑްގެ ކެޕްޓަން ހެރީ މެގުއާ އަތުން ބައިކޮޅަށް ވަން ގޯލެކެވެ.
ޔުނައިޓެޑް މެޗުން މޮޅުކޮށްދިން ގޯލު ޖެހީ މެޗުގެ 81 ވަނަ މިނިޓްގަ އެވެ. މި ލަނޑު ޖަހައި، ރޮނާލްޑޯ ވަނީ އޭނާގެ ހެޓްރިކް ފުރިހަމަކޮށްފަ އެވެ. ކްލަބް ކެރިއަރުގައި ހެދި 59 ވަނަ ހެޓްރިކް ފުރިހަަމަ ކުރި ގޯލު ރޮނާލްޑޯ ކާމިޔާބުކުރީ އަލެކްސް ޓެލޭސް ނެގި ކޯނަރަކުން ބޮލުން ގޯލު ޖަހައިގެންނެވެ. މިއީ 2008 ވަނަ އަހަރުގެ ފަހުން ރޮނާލްޑޯ ޔުނައިޓެޑް ޖޯޒީގައި ހެޓްރިކެއް ހެދި ފުރަތަމަ ފަހަރެވެ.
