ސައުދީ އަރަބިއްޔާގައި ހޮނިހިރު ދުވަހު އެކަނި 81 މީހުންނަށް މަރުގެ ހުކުމް ތަންފީޒުކޮށްފައިވާ ކަމަށް އެ ގައުމުން ބުނެފި އެވެ.
އެއީ ފާއިތުވި އަހަރުގެ ތެރޭގައި އެ ގައުމުގައި މަރުގެ ހުކުމް ތަންފީޒު ކުރި ޖުމްލަ އަދަދަށް ވުރެ ވެސް ގިނަ އެވެ. އެ މީހުންގެ ތެރޭގައި ޔަމަނުގެ ހަތް މީހުންނާއި ސީރިއާގެ ރައްޔިތަކު ހިމެނެ އެވެ.
ސައުދީ ޕްރެސް އެޖެންސީން ބުނީ ޓެރަރިޒަމް ފަދަ "ގިނަ ނުބައި ކުށްތަކެއް" އެ މީހުންގެ މައްޗަށް ސާބިތުވެފައިވާ ކަމަށެވެ. އެގޮތުން ބައެއް މީހުންނަކީ އިސްލާމިކް ސްޓޭޓް (އައިއެސް)، އަލް ގައިދާ އަދި ހޫތީންނަށް ނިސްބަތްވާ މީހުން ކަމަށް ބުންޏެވެ.
އިންސާނީ ހައްގުތަކަށް މަސައްކަތް ކުރާ ގްރޫޕްތަކުން ތުހުމަތު ކުރާ ގޮތުގައި ތުހުމަތު ކުރެވޭ ގިނަ މީހުންނަށް ސައުދީ އަރަބިއްޔާގައި އިންސާފުވެރި ޝަރީއަތެއް ނުލިބެ އެވެ. ނަމަވެސް އެ ގައުމުން އެކަން ދޮގުކުރެ އެވެ.
ސައުދީ ޕްރެސް އެޖެންސީން ބުނީ މިއަދު ހުކުމް ތަންފީޒު ކުރި އެންމެންނާ މެދު ނިޔާ ކަނޑައެޅުމުގައި 13 ފަނޑިޔާރުން ބައިވެރިވި ކަމަށާއި އެ މީހުންނަށް ހުކުމް ތަންފީޒު ކުރުމާ ހަމައަށް ދިޔައީ ކޯޓުގެ ތިން މަރުހަލާ ވެސް ނިންމުމަށް ފަހު ކަމަށެވެ.
ދުނިޔޭގައި ފަސް ވަނައަށް އެންމެ ގިނައިން މަރުގެ ހުކުމް ތަންފީޒު ކުރަނީ ސައުދީ އަރަބިއްޔާގަ އެވެ. މިދިޔަ އަހަރު ސައުދީ އަރަބިއްޔާގައި 69 މީހުންނަށް މަރުގެ ހުކުމް ތަންފީޒު ކުރި އެވެ.
އެ ލިސްޓުގެ އެންމެ ކުރީގައި ހިމެނެނީ ޗައިނާ، އިރާން، މިސްރު އަދި އިރާގެވެ. ސައުދީ އަރަބިއްޔާއަށް ފަހު ދެން އެ ލިސްޓުގައި ހިމެނެނީ އެމެރިކާ އެވެ.
