އުތުރާއި ދެކުނުގައި ގާއިމްކޮށްފައިވާ ހައިކޯޓުގެ ގޮފިތައް އުވާލުމުގެ ބިލެއް މަޖިލީހަށް ވައްދާފައި ވަނިކޮށް، އައްޑޫގައި ގާއިމްކޮށްފައިވާ ދެކުނު ގޮއްޕަށް ހުށަހެޅިފައިވާ މައްސަލަތައް ބަލަން ތިން ފަނޑިޔާރެއް އެ ކޯޓުން ފޮނުވައިފި އެވެ.
މިހާރު މި ދެ ގޮފި ހިންގަނީ އެކި ދުވަސްވަރު ފަނޑިޔާރުންގެ ވަފުދުތައް އެ ދެ ގޮއްޕަށް ޒިޔާރަތް ކުރައްވައިގެންނެވެ. އެތަނުގައި ދާއިމަށް ފަނޑިޔާރުން ނުތިއްބަވަ އެވެ.
މިދިޔަ ބުރާސްފަތި ދުވަހު ހައިކޯޓުގެ ތިން ފަނޑިޔާރެއް ދެކުނު ގޮފީގައި ހުރި މައްސަލަތައް ބެލުމަށްޓަކައި އައްޑޫއަށް ވަޑައިގަތެވެ. އެ މައްސަލަތަކުގެ ޝަރީއަތް ކުރިއަށް ގެންދިއުމަށްފަހު، އެ ފަނޑިޔާރުން އެނބުރި މާލެ ވަޑައިގަތުމަށް ހަމަޖެހިފައިވަނީ އަންނަ ހޮނިހިރު ދުވަހު އެވެ.
އައްޑޫ ސިޓީގެ ހުޅުމީދޫގައި ގާއިމްކޮށްފައިވާ ހައިކޯޓުގެ ދެކުނު ގޮތްޕަށް ކުރާ މި ދަތުރުގައި ހިމެނި ވަޑައިގަންނަވަނީ ފަނޑިޔާރު ޝުއައިބް ހުސައިން ޒަކަރިއްޔާ އާއި، ފަނޑިޔާރު ހުސައިން މަޒީދު އަދި ފަނޑިޔާރު މުހައްމަދު ފައިސަލެވެ.
އެ ތިން ފަނޑިޔާރުން އައްޑޫއަށް ވަޑައިގަތުމާ އެކު، މިހާރު އެ ކޯޓުގައިވާ މައްސަލަތައް ކުރިއަށް ގެންދިއުމަށްޓަކައި ޝަރީއަތުގެ އަޑުއެހުންތައް ވެސް ވަނީ ތާވަލްކޮށްފަ އެވެ.
މިދިޔަ ސަރުކާރުގައި ހައިކޯޓުގެ ގޮފިތައް ތައާރަފްކުރުމަށްފަހު، އުތުރުގޮފި ހދ. ކުޅުދުއްފުށީގައި ގާއިމްކުރި އެވެ. އުތުރު ގޮފީން ބައްލަވަމުން ގެންދާނީ، ހއ، ހދ، ށ، ނ، ރ، އަދި ބ، މި އަތޮޅުތަކުގެ މެޖިސްޓްރޭޓު ކޯޓުތަކުން ނިންމަވާ މައްސަލަތުކުގެ ތެރެއިން އިސްތިއުނާފު ކުރުމަށް ހުށަހެޅޭ މައްސަލަތަކެވެ.
ހައިކޯޓުގެ ދެކުނު ގޮފިން ބަލާނީ ގއ. ގދ. ޏ އަދި ސ. އަތޮޅުގެ މެޖިސްޓްރޭޓް ކޯޓުތަކުން ނިންމާ މައްސަލަތަކުގެ ތެރެއިން އިސްތިއުނާފުކުރުމަށް ހުށަހެޅޭ މައްސަލަތަކެވެ.
ނަމަވެސް، ކޯޓުތަކުން ހިންގާ ޝަރީއަތްތައް ހިނގަމުންދަނީ ނިޒާމުގައި ކަންކަން ތަރުތީބުކުރެވިފައިވާ ހަމަތަކާ އެއްގޮތްވާ ގޮތުގެ މަތިން، އަދި އެ ކޯޓުތަކަށް ކަނޑައެޅިފައިވާ އިހްތިސާސް އާއި ބާރުގެ ދާއިރާގެ ތެރޭގައިކަން ކަށަވަރު ކުރުމަށްޓަކައި މި ސަރުކާރުން ވަނީ އެ ގޮފިތައް އުވާލުމަށް ނިންމާ، އެ އިސްލާހު ކޯޓުތަކާއި ބެހޭ ގާނޫނަށް ގެނައުމަށް މަޖިލީހަށް ބިލެއް ހުށަހަޅާފަ އެވެ.
