ރަޝިއާގެ ސިފައިންނާ ދެކޮޅަށް "އަނިޔާވެރިވުމަށް ގޮވާލާތީ" އިންސްޓަގްރާމް ބްލޮކް ކުރަން ނިންމާފައިވާ ކަމަށް ރަޝިއާގެ މީޑިއާގެ ކަންކަން މޮނީޓާ ކުރާ އިދާރާ ރޮސްކޮމްނަޑްޒޯރުން ބުނެފި އެވެ.
އިންސްޓަގްރާމް ހިންގާ ކުންފުނި، މެޓައިން ބުނީ ރަޝިއާގެ ސިފައިންނާއި ރަޝިއާގެ ރައީސް ލެޑިމިއަ ޕުޓިންއަށް ހަމަލާ ދިނުމަށް ހިތްވަރުދޭ ޕޯސްޓުތައް ދައުރު ކުރުމަށް ބައެއް ގައުމުތަކުގައި ހުއްދަ ދޭނެ ކަމަށެވެ.
އެގޮތުން "ރަޝިއާގެ ސިފައިންނަށް މަރު" ފަދަ ލިޔުންތައް ލިޔެފައިވާ ޕޯސްޓުތަކަށް ވަގުތީ ގޮތުން ހުއްދަ ދޭން ނިންމި އެވެ. ނަމަވެސް އެއީ ކުންފުނީގެ އާއްމު ގަވާއިދާ ހިލާފު ޕޯސްޓުތަކެވެ.
ނަމަވެސް ރަޝިއާގެ އާއްމު ރައްޔިތުންނާ ދެކޮޅަށް ހަމަލާ ދޭން ގޮވާލާ ޕޯސްޓުތަކަށް ހުއްދަ ނުދޭނެ ކަމަށޤ ބުނެފައިވެ އެވެ.
މެޓަ ކުންފުނީގެ ސިޔާސަތަށް ގެނައި ބަދަލާ ގުޅިގެން ރަޝިއާއިން އެމެރިކާއަށް ގޮވާލީ ސޯޝަލް މީޑިއާ ކުންފުނީގެ "ހަރުކަށި ހަރަކާތްތައް" ހުއްޓުވުމަށެވެ.
މެޓަ ކުންފުންޏާ ދެކޮޅަށް ޖިނާއީ ތަހުގީގެއް ފަށަން ވެސް ރަޝިއާގެ ޕީޖީ އޮފީހުން ދަނީ މަސައްކަތް ކުރަމުން ކަމަށް އިންޓާފެކްސް ނިއުސް އެޖެންސީން ބުނެ އެވެ.
ރަޝިއާގައި އިންސްޓަގްރާމް ބްލޮކްކޮށްފައިވާ އިރު، މާޗް ހަތަރު ވަނަ ދުވަހު ފޭސްބުކް ވެސް ބްލޮކްކުރި އެވެ. ފޭސްބުކް އާއި އިންސްޓަގްރާމްގެ އިތުރުން ވަޓްސްއެޕްގެ ވެރިފަރާތަކީ މެޓަ އެވެ.
ނަމަވެސް މިހާތަނަށް ރަޝިއާގައި ވަޓްސްއެޕް ބްލޮކްކޮށްފައި ނުވަނީ އެއީ ސޯޝަލް ނެޓްވޯކަކަށް ވުރެ ބޮޑަށް މެސެޖިން ޕްލެޓްފޯމަކަށް ވާތީ އެވެ.
