ކުރިއާ މެދުވެރިކޮށް ރާއްޖެ އެތެރެކުރަން އުޅުނު 12 މިލިއަން ރުފިޔާގެ މަސްތުވާތަކެތި ކަސްޓަމްސުން އަތުލައިގެންފި އެވެ.
އޭގެ ތެރޭގައި ހިމެނެނީ އެމްޑީއެމްއޭ، މެފެޑްރޯނާއި ކޮކެއިން އެވެ.
ކަސްޓަމްސްއިން ބުނީ މިތަކެތި އަތުލައިގަންފައި ވަނީ ކުރިއާ މެދުވެރިކޮށް ރާއްޖެ ގެނެސްފައިވާ ޕާރުސަލްތައް ބަލާ ފާސްކުރުުމުގެ ތެރޭގައި ޝައްކު ކުރެވޭ ޒާތުގެ ބާވަތްތަކެއް ހުރުމުން އިތުރަށް ބަލާ ފާސް ކުރުމުގެ ތެރޭގައި ކަމަށެވެ.
އޭގެ ތެރެއިން މި މަހުގެ އެއްވަނަ ދުވަހު ބަލާ ފާސް ކުރި ޕާރްސަލްގެ ތެރެއިން 546 ގްރާމް އެމްޑީއެމްއޭ އާއި 585 ގްރާމް މެފެޑްރޯން ފެނިފައިވާ ކަމަށާއި މި މަހުގެ ވަނަ ދުވަހު ބަލާ ފާސް ކުރި ޕާރްސަލެއްގެ ތެރެއިން 2.228 ކިލޯގެ ކޮކެއިން ފެނިފައިވާ ކަމަށް ކަސްޓަމުން ބުންޏެވެ.
އެގޮތުން އަތުލައިގަނެވުނު މަސްތުވާތަކެތީގެ ޖުމްލަ ބަރުދަނުގައި 3.359 ކިލޯ ހުރިއިރު، މި ތަކެތީގެ މަގުމަތީ އަގު 12،953،500 އަށް އަރާ ކަމަށް ކަސްޓަމްސްއިން ބުންޏެވެ.
އަތުލައިގަތް މަސްތުވާތަކެއްޗާއި މައްސަލަތަކާ ގުޅުން ހުރި ދެ މީހަކު ވަނީ ފުލުހުންގެ ބެލުމުގެ ދަަށަށް ގެންގޮސްފަ އެވެ.
މިފަހަކަށް އައިސް ރާއްޖެ އެތެރެކުރާ މަސްތުވާތަކެތީގެ މައްސަލަ ވަނީ ބޮޑުވެފަ އެވެ. އެގޮތުން އެންމެ ގިނައީ ބްރެޒިލް މަގުން ރާއްޖެ އެތެރެކޔރަން މަސައްކަތް ކުރަނިކޮށް އަތުލައިގަންނަ މަސްތުވާތަކެއްޗެވެ. ނިމުނު އަހަރަށް އެކަނި ބެލި ނަމަވެސް 41.8 ކިލޯގެ ކޮކެއިން އަތުލައިގަތެވެ.
އެއީ މަގުމަތީ އަގުތަކުން ހިސާބުކުރާއިރު ގާތްގަނޑަކަށް 204 މިލިއަން ރުފިޔާ އެވެ.
