ފްރޯޑު ހިންގާ ކަމަށް ތުހުމަތުކޮށް ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެމްބަރު އަލްހާން ފަހުމީގެ "ކިންގްސް ފޮރެކްސް ޓްރޭޑިން" ގެ އެކައުންޓް ރޭ ފްރީޒް ކޮށްފި އެވެ.
އެކައުންޓް ފްރީޒް ކުރިކަން ހާމަކޮށް އަލްހާން ކުންފުނީގެ ޓެލެގްރާމް ގްރޫޕުގައި ނެރުނު ބަޔާނެއްގައި ބުނީ އެކަން ކުރި ސަބަބެއް ބީއެމްއެލުން އަންގައިފައި ނުވާ ކަމަށެވެ. އަދި އެކައުންޓް ފްރީޒް ކުރި ނަމަވެސް މިއަދާ ހަމައަށް ދޭން ޖެހޭ ހުރިހާ ފައިސާއެއް ދީ ނިމިފައިވާ ކަމަށްވެސް އެ ކުންފުނިން ބުންޏެވެ.
އެ ޓެލެގްރާމް ގްރޫޕުގައި މިހާރުވެސް 8000 އެއްހާ މެންބަރުން އެބަތިއްބެވެ. އޭގެ ތެރެއިން ބައެއް މީހުން ޓްރޭޑް ކޮށް ލާރި ލިބިފައިވާ ކަމަށް ބުނެފައިވެސް ވެ އެވެ.
އެ ކުންފުނިން ވަނީ ބީއެމްއެލުން ކުއްލިއަކަށް އެޅި ފިޔަވަޅާ ގުޅިގެން ލިބޭ ގެއްލުމުގެ ސަބަބުން ބީއެމްއެލް އަށް ދައުވާކުރާނެ ކަމަށް ވެސް ބުނެފަ އެވެ.
ވަކި ކުންފުންޏެއް ހާމަ ނުކޮށް ރޭ އެމްއެމްއޭއިން ނެރުނު ބަޔާނުގައި ބުނެފައިވަނީ ކުޑަ މުއްދަތެއްގައި ބޮޑު ފައިދާއެއް ހޯދައިދޭނެ ކަމަށްބުނެ މީހުންގެ އަތުން ފައިސާ ނަގައިގެން ރާއްޖޭގައި ބޮޑު ފްރޯޑެއް ހިންގަމުން އަންނަ ކަމަށެވެ. އެފަދަ ސްކީމްތަކަށް އިންވެސްޓް ނުކުރުމަށް ވެސް އެމްއެމްއޭއިން ވަނީ އެދިފަ އެވެ.
"މިފަދަ ސްކީމްތައް ހިންގާ ފަރާތްތަކުން، އާންމުންގެ ކިބައިން ނަގާ ފައިސާއިން އެ ފަރާތްތަކަށް އިންވެސްޓްކޮށްދިނުމުގެ ބަދަލުގައި، އެ ފައިސާ ބޭނުން ކުރަނީ އަމިއްލަ ބޭނުމަށް،" އެމްއެމްއޭއިން ބުނެފައިވެ އެވެ.
އެކަމާ ގުޅިގެން ކިންގްސް ފޮރެކްސުން ބުނީ އެމްއެމްއޭއިން ފްރޯޑުގެ ތުހުމަތު ކުރަނީ އެ ކުންފުންޏަށް ކަމަށާއި ނުސީދާކޮށް އެ ކުންފުންޏާ ގުޅޭގޮތުން ނެރުނު ބަޔާނަކީ ކުންފުނީގެ އަގުވައްޓާލައި އިތުބާރު ގެއްލޭ ގޮތަށް ނެރުު ބަޔާނެއް ކަމަށެވެ.
ކިންގްސް ހޯލްޑިންގްސް އިންވެސްޓްމަންޓް ޕްރައިވެޓް ލިމިޓެޑްގެ ހިއްސާދާރުންނަކީ އަލްހާން ފަހުމީއާއި އޭނާގެ ކޮއްކޮ ސަހުބާން ފަހުމީ އެވެ. ސަހުބާން ފަހުމީ އަކީ މޯލްޑިވްސް މީޑިއާ ކައުންސިލްގެ މިހާރުގެ ރައީސެވެ.
