މި އަހަރު ޖުލައި މަހު އިނގިރޭސިވިލާތުގެ ބާމިންހަމްގައި ފަށާ ކޮމަންވެލްތު ގޭމްސް އަށް ކޮލިފައިވުމަށް ކުޅޭ މެޗުތަކަށް ތައްޔާރުވުމުގެ ގޮތުން ގައުމީ ބީޗްވޮލީބޯޅަ ޓީމު ގަތަރުގައި ކޭމްޕްކޮށްފި އެވެ.
އިއްޔެ ގަތަރުގެ ކޭމްޕަށް ދިޔައީ އަހުމަދު މުހައްމަދު (ކޯކޭ) އާއި މުހައްމަދު އަލީ (ޑެންޒޯ)ގެ ޕެއާ އާއި އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް)ގެ ޕެއާ އެވެ. އަދި ގައުމީ ބީޗްވޮލީބޯޅަ ޓީމުގެ ކޯޗު ވިނީޝިއުސް މާޓީން އާއި އެސިސްޓަންޓް ކޯޗު ޝިއުނާޒް އަބްދުލް ވާހިދު (މަންކޭ) އެވެ. އިއްޔެ، ގަތަރަށް ގޮސް ފުރަތަމަ ޓްރެއިނިންތައް ވަނީ ބާއްވައިފަ އެވެ.
ކޮމަންވެލްތު ގޭމްސްގެ ކޮލިފައިން މެޗުތައް އޮންނާނީ ސްރީ ލަންކާގެ ނިގަމްބޯގައި މި މަހު 18، 19 ގަ އެވެ. ގަތަރު ޓްރެއިނިން ކޭމްޕް ނިންމާފައި، ގައުމީ ބީޗްވޮލީބޯޅަ ޓީމު ލަންކާ އަށް ދާނީ ގަތަރު މަގުން މި މަހު 15 ވަނަ ދުވަހު އެވެ. ގައުމީ ބީޗްވޮލީބޯޅަ ޓީމުން ވަނީ މިދިޔަ މަހު ނިގަމްބޯގައި ބޭއްވި ސެންޓްރަލް ޒޯން ފުރަތަމަ ބީޗްވޮލީބޯޅަ މުބާރާތުގައި ވާދަކޮށްފަ އެވެ.
ގަތަރު ޓްރެއިނިން ކޭމްޕަށް ފަހު ގައުމީ ބީޗްވޮލީބޯޅަ ޓީމުގެ ތެރެއިން ކޮމަންވެލްތު ކޮލިފައިންގައި ކުޅޭނެ ޕެއާއެއް ކޯޗު ވިނީޝިއުސް އިއުލާނުކުރާނެ އެވެ. ކޮލިފައިންގައި ރާއްޖޭގެ އެއް ޕެއާއެއް ނުކުންނަން ޖެހޭނީ ލަންކާ، މެލޭޝިއާ އަދި ސިންގަޕޫރާ ދެކޮޅަށެވެ. އެ ތަނުން މުބާރާތަށް ކޮލިފައިވާނީ އެއް ޕެއާ އެވެ.
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސް މުހައްމަދު ރަނޭޝް (ރަނޭ) ވިދާޅުވީ، އެންމެ ފަހުން ސެންޓްރަލް ޒޯން ބީޗްވޮލީބޯޅަ މުބާރާތުގައި ދެއްކި ކުޅުމަށް ބަލާއިރު، ކޮމަންވެލްތު ގޭމްސް ކޮލިފައިންގައި ރަނގަޅު ނަތީޖާތަކެއް ނެރެވޭނެ ކަމުގެ އުންމީދު އެބައޮތް ކަމަށެވެ.
