އެމެރިކާ އަށް އުފަން 46 އަހަރުގެ ޖެކީ ހަންޓް-ބްރޮއެސްމާ އަކީ އާދަޔާ ހިލާފު މެރެތަން ދުވުންތެރިއެކެވެ. އުމުރުން 26 އަހަރުގައި ވާތު ފައިގައި އުފެދުނު ލަމްޕެއްގެ ސަބަބުން ކެންސަރު ޖެހި، އެކަމުން ސަލާމަތްވުމަށް، ފައި، ކަކޫހުޅުން ބުރިކޮށްލި ފަހުން ދުވުމުގެ ޝައުގުވެރިކަން އުފެދުނު ޖެކީ އަކީ މިހާރު އެތައް ބަޔަކަށް އިންސްޕިރޭޝަނެކެވެ.
މީގެ ހަ އަހަރު ކުރިން، 2016 ގައި ދުވަން ފެށި ޖެކީ އަކީ ޕްރޮސްތެޓިކް ފަޔަކާ އެކު ޓްރެޑްމިލް އެއްގައި 100 ކިލޯމީޓަރަށް ދުވި ފުރަތަމަ މީހާ އެވެ. އެ ޗެލެންޖް ފުރިހަމަކުރުމަށް، ޓްރެޑްމިލްގައި 23 ގަޑި އިރާއި 38 މިނިޓު ނުހުއްޓައި ޖެކީ ދުވި އެވެ. އެއީ އޭނާގެ ފުރަތަމަ ދުނިޔޭގެ ރިކޯޑެވެ.
ދެވަނަ ފަހަރަށް އެއަށްވުރެ ބޮޑު ރިކޯޑެއް މުގުރާލީ، 2020 ވަނަ އަހަރު އެމެރިކާގެ ކޮލޮރާޑޯގެ ފަރުބަދަމަތީ ރޭހެއް ފުރިހަމަ ކޮށްގެންނެވެ. އެއް ފައި ގައި އެ ރޭސް މިހާތަނަށް ފުރިހަމަ ކުރި ހަމަ އެކަނި އެކަކީ ވެސް އޭނާ އެވެ.
އަނެއްކާ ވެސް ޖެކީ ގެ އާ ޗެލެންޖެކެވެ. މިފަހަރު އޭނާގެ އަޒުމަކީ 100 ދުވަސް ވަންދެން ކޮންމެ ދުވަހަކު މެރެތަން އެއް ފުރިހަމަ ކުރުމެވެ. ބޭނުމަކީ ކަސްރަތާއި ސްޕޯޓްސް ގައި އުޅުމަށް އެކަށޭނަ ގޮތަށް ހަދާފައިވާ އޭނާގެ ދަނގަނޑު ފައި ކަހަލަ ފައި ބޭނުންވާ އެހެން މީހުންނަށް އެ ފުރުސަތު ހޯދައިދިނުމަށް ފަންޑް ހޯދުމެވެ.
އެތްލެޓިކް ޕްރޮސްތެޓިކް ފައެއްގެ އަގަކީ ދިހަ ހާހާއި ވިހި ހާހާއި ދެމެދު އަދަދެއްގެ ޑޮލަރެވެ. އެމެރިކާގެ އިންޝުރެންސް ކުންފުނިތަކުން މިފަދަ ހަރަދު ކަވާ އެއް ނުކުރެ އެވެ. އެހެންވެ، ޖެކީ މިފަހަރު ދުވަނީ އޭނާ ފަދަ އެތައް ބަޔަކަށް އެހީތެރިވުމުގެ މަގުސަދުގައި ކަމަށް އިންސްޓަގްރާމް ޕޯސްޓެއްގައި ޖެކީ ބުނެފައިވެ އެވެ.
ސަތޭކަ ދުވަހުން ސަތޭކަ ކިލޯމީޓަރަށް ދުވުމަށް މިހާރު ފަށާފައިވާ ޗެލެންޖު ކާމިޔާބުކުރެވިއްޖެނަމަ ޖެކީ ވެގެންދާނީ މިހާތަނަށް ނުހުއްޓައި މެރެތަން ޖެހި ދުނިޔޭގެ ފުރަތަމަ އަންހެން ދުވުންތެރިޔާ އަށެވެ.
މިހާރު އެ ރިކޯޑު އޮތީ، 95 ދުވަހުން 95 މެރެތަން ހަމަ ކުރި އަންހެނެއްގެ އަތުގަ އެވެ.
ޖެކީ ކުރި އިންސްޓަގްރާމް ޕޯސްޓެއްގައި އޭނާ ބުނެފައިވަނީ، އިންސްޕަޔާވީ ނުވަދިހަ ފަސް ދުވަހުން ނުވަދިހަ ފަސް މެރެތަން ޖަހާފައިވާ އެ ޗެލެންޖުން ކަމަށެވެ. އަދި އޭނާ އަށް ގަބޫލުކުރެވޭ ގޮތުގައި މިހާރު އޭނާ ކަނޑައަޅާފައި 100 ދުވަހުން 100 މެރެތަން އަޒުމް އޭނާ އަށް ފުރިހަމަ ކުރެވިދާނެ އެވެ.
"އަހަރެން ހައިރާންވޭ އިންސާނާގެ ހަށިގަނޑު ކަންކަމަށް އާދަވާ ހަލުވިކަމާ މެދު. ޖެހި ޖެހިގެން ކޮންމެ ދުވަހަކު މެރެތަން ޖަހަން ފެއްޓި އިރު ފުރަތަމަ ދުވަސްކޮޅު ކޮންމެވެސް ވަރެއްގެ އުނދަގޫތަކެއްވި. އެކަމަކު އޭގެ ފަހުން އަހަރެން މި ދުވާ ޑިސްޓެންސަށް ހަށިގަނޑު އާދަ ވެއްޖެ. ބަނޑުހައިވުމާއި، ނިދުމާއި، ގައިގެ މަސްތައް މި ދުވާ ޑިސްޓެންސް އަށް މިހާރު އެޑެޕްޓް ވެއްޖެ. އަހަރެން ބުނާނީ މިފަދަ ޗެލެންޖެއް ކުރާ ނަމަ ހަށިގަނޑު ދޭ އިޝާރާތްތައް ބަލާށޭ، އަޑު އަހާށޭ އަނިޔާ އިން ރައްޚާތެރިވުމަށް،" ޖެކީގެ ޕޯސްޓު ގައި ލިޔެފައިވެ އެވެ.
މިއަދާ ހަމައަށް ޖެކީ ވަނީ އޭޏާގެ މި ޗެލެންޖެއްގައި 24 މެރެތަން ފުރިހަމަ ކޮށްފަ އެވެ. ދެން ބާކީ އިންނާނީ 77 ދުވަހެވެ.
