ތެލުގެ އަގު ބޮޑުވެފައިވާތީ މާލޭގައި ޓެކްސީ ދުއްވާ އަގު ބޮޑު ކުރުމަށް ޓެކްސީ ޑްރައިވަރުން ހުށަހެޅި ބަދަލުތަކަށް ޓްރާންސްޕޯޓު މިނިސްޓްރީން ޖަވާބު ނުދިނުމުން ހުއްޓުމެއް ނެތި އިހުތިޖާޖު ކުރަން ފެށީ އިއްޔެ އެވެ.

ޓެކްސީ ޑްރައިވަރުން ދަނީ ތެޔޮ ހަރަދު ބޮޑުވެފައިވާކަމަށް ބުނެ އިއްޔެ އިން ފެށިގެން ދަތުރުކުރުން ހުއްޓާލައި ހުޅުމާލެ ރުއްގަނޑު ސަރަހައްދުގައި އިޖުތިޖާޖުކުރަމުންނެވެ. އެ އިހުތިޖާޖު ރޭވުމުގައި އިސްކޮށް ހަރަކާތްތެރިވާ ޓެކްސީ ޑްރައިވަރެއްކަމުގައިވާ އަހުމަދު ޝަމާލް "އަދަދު" އަށް އިއްޔެ ބުނީ ޑްރައިވަރުން ތިބީ އަގުތަކުގެ މައްސަލައިގައި ގޮތް ދޫކުރާ ގޮތަކަށް ނޫން ކަމަށެވެ.

"މިހާރު ސެންޓަރުތައް ވެސް ބަންދުކޮށް އެޕްލިކޭޝަންތައް ވެސް ބޭނުންނުކުރެވޭނެ. އެގޮތަށް ނިންމީ މިރޭ 20:00 އާ ހަމަޔަށް. އެހާއިރަށް މިނިސްޓްރީން ޖަވާބެއް ނުދީފިނަމަ ހަމަ ކުރިޔަށް ގެންދާނަން،" އޭނާ އިއްޔެ ބުންޏެވެ.

އޭނާ އިއްޔެ އިތުރަށް ބުނީ މިނިސްޓްރީގެ އަމަލުތައް ހުންނަ ގޮތުން ޑްރައިވަރުން ވެސް އިތުރު ފިޔަވަޅުތައް އަޅަމުން ގެންދާނެ ކަމަށެވެ. އެ އިހްތިޖާޖުގައި 100 އެއްހާ ޓެކްސީއެއްގެ ޑްރައިވަރުން ބައިވެރިވެ އެވެ. ޓެކްސީ ސެންޓަރުތަކުގެ ތެރެއިން 16 ސެންޓަރަކުން އޮޕަރޭޝަންތައް ހުއްޓާލަން އޮތީ ނިންމާފަ އެވެ.

އޭގެ އިތުރުން، ރޭ 100 އަށްވުރެ ގިނަ ކާރާއެކު ޑްރައިވަރުން މާލޭގައި ކާރު ރެލީއެއް ބާއްވަން އުޅުނެވެ. ނަމަވެސް، އެކަމަށް ފުލުހުން ހުރަސް އެޅި އެވެ.

"ހަމަ މިނިސްޓްރީގެ ފަރާތުން ކުރާ ކަމަކަށް ބަލާފަ އަޅުގަނޑުމެން ވެސް އިތުރަށް ހަރުކަށިކުރަން މިތިބީ ނިންމައިގެން،" ޝަމާލް އިއްޔެ ބުންޏެވެ.

ތެލުގެ ހަރަދުތަައް ރާއްޖޭގައި އިތުރުވެފައިވާއިރު ޑްރައިވަރުން ވަނީ މާލޭގެ އެތެރޭގެ ދަތުރުތަކުގެ އަގުތައް 30ރ. އަށް އިތުރުކުރަން މިނިސްޓްރީއަށް ހުށަހަޅާފަ އެވެ. ނަމަވެސް، ހުޅުމާލެ ފޭސް އެކެއް އަދި ފޭސް ދޭއްގެ އެތެރޭގެ އަގުތަކަށް ބަދަލެއް ގެންނާކަށް ހުށައެއްނާޅަ އެވެ.

އޭގެ އިތުރުން ވެސް ބްރިޖު ހުރަސްކޮށް މާލެއިން ހުޅުމާލެއަށް ނަމަ 100ރ. އަދި މާލެއިން އެއާޕޯޓަށް ނަމަ 80ރ. ނަގަން ވަނީ ހުށަހަޅާފަ އެވެ. އަދި މާލެއިން ހުޅުލޭގެ ސީޕްލޭން ޓާމިނަލަށް ނަމަ 100ރ. ގެ ރޭޓުން ނެގުމަށް ވަނީ ހުށަހަޅާފަ އެވެ.

އަދި ހުޅުމާލެ އެއް ފޭސް އިން އަނެއް ފޭސްއަށް ދާނަމަ 40ރ. އަދި ހުޅުމާލެ ފޭސް ދެއަކުން އެއާޕޯޓުގެ ސީޕްލޭން ޓާމިނަލަށް ވެސް 120ރ. އަދި މާލެއިން ހުޅުމާލެ ފޭސް ދެއަކަށް ވެސް 120ރ. ނެގުމަށް ވަނީ ހުށަހަޅާފަ އެވެ.

ނަމަވެސް، ޑްރައިވަރުން އަގުތައް ހުށަހެޅުމުގެ ކުރިން ވެސް މިނިސްޓްރީން ވަނީ އަގުތަކަށް ބަދަލު ގެނައުމުގެ ވިސްނުމެއް ނެތް ކަމަށް ބުނެފަ އެވެ. އަދި އާންމުންގެ ބައެއް މީހުން ވެސް ވަނީ ޓެކްސީ ޑްރައިވަރުން ހުށަހެޅި އަގުތަކާއި ދޭތެރޭ ހިތްހަމަނުޖެހުން ފާޅުކޮށްފަ އެވެ.

ބައެއް މުހިންމު ހަބަރުތައް

• ކަތިވަޅިތަކަކުން ހަމަލާދީ 2015 ވަނަ އަހަރު މާލޭގައި މަރައިލި ޖައިލަމް އަހުމަދު ޝާކިރުގެ މައްސަލައިގައި ދައުލަތުން ދައުވާ ކުރި ހަތަރު މީހުންގެ މައްޗަށް ވެސް ކުށް ސާބިތުނުވާ ކަމަށް ކްރިމިނަލް ކޯޓުން ކަނޑައެޅީ އިއްޔެ އެވެ.

• މޯލްޑިވްސް އެއާޕޯޓްސް ކޮމްޕެނީ ލިމިޓެޑު (އެމްއޭސީއެލް) އިން ހުޅުމާލޭގެ ދެވަނަ ފިޔަވަހީގައި އަޅާފައިވާ ދެ ޓަވަރުގެ ފްލެޓުތަކުގެ ތަޅުދަނޑި އަންނަ މަހު ހަވާލު ކުރުމަށް މަސައްކަތް ކުރަމުންދާ ކަމަށް އެ ކުންފުނިން ބުނީ އިއްޔެ އެވެ.

• ރިޝްވަތު ނެންގެވިކަމުގެ ދައުވާ އުފުލާފައިވާ މިނިސްޓަރު އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަހުމަދު މަހުލޫފްގެ މައްސަލައިގެ އިސްތިއުނާފް ހައި ކޯޓުން ބަލައިގަތީ އިއްޔެ އެވެ.

ދުވަހުގެ ކޯޓޭޝަން

އައްޑޫ ސިޓީގެ ލިންކު ރޯޑުގައި ހުރި ރުއްތަކެއް ކަނޑާލުމާ ގުޅިގެން އެ ސިޓީގެ މޭޔަރު އަލީ ނިޒާރު އިއްޔެ ވިދާޅުވީ:

"އެއީ ވަރަށް ދުވަސްވެފަ ހުރި ރުއްތަކެއް. ލިންކް ރޯޑު އެންމެ ފުރަތަމަ ހެދިއިރު ޖަހާފަ ހުރި ރުއްތަކެއް އެއީ. ދެން މިހާރު ދުވަސްވެ، ދިގުވެގެން ގޮސް އެ ރުއްތަކުން މުޅި މަގަށް ކުނި އެޅެމުންދާތީވެ އަޅުގަނޑުމެން ކައުންސިލުން ރުއްތައް ކަނޑަން ނިންމީ،"

ދުވަހުގެ ފޮޓޯ

ގައްދޫގައި މިހާރު ކުނާ ވިޔުމުގެ މަސައްކަތް ކުރާ ފަސް ވަރަކަށް މީހުންގެ ތެރެއިން މަރިޔަމް ފާއިޒާ ވިޔެފައިވާ ކުނާތަކެއް އޭނާ ހިފަހައްޓާލައިގެން. އުމުރުން 16 އަހަރުން ފެށިގެން މިއަދާ ހަމައަށް ވެސް ކުނާ ވިޔުމުގެ ބުރަ, ކަވި މަސައްކަތުގައި ހަރަކާތްތެރިކަމާއެކު ފާއިޒާ އުޅެނީ, އެއަށްވުރެ ގަޔާވާ އެހެން މަސައްކަތެއް ނެތީމަ -- ފޮޓޯ: މުހައްމަދު ޝާބިން/އަދަދު

ދިރާސާތަކުން ކިޔާލުމަށް