ރަޝިއާ އާއި ޔޫކްރެއިންގެ ފޮރިން މިނިސްޓަރުން ބުރާސްފަތި ދުވަހު ތުރުކީގައި ބޭއްވި މަޝްވަރާއިން ވެސް ސުލްހަ ގެނެވޭނެ މަގެއް ނުފެނުނެވެ.
ނަމަވެސް, ދެ ގައުމުން ވަނީ ޔޫކްރެއިންގައި ކުރަމުންދާ ހަނގުރާމައިގައި ކުރިމަތިވެފައިވާ އިންސާނީ މައްސަލަތައް ހައްލު ކުރަން މަސައްކަތް ކުރުމަށް އެއްބަސްވެފަ އެވެ.
ޔޫކްރެއިންގެ ފޮރިން މިނިސްޓަރު ޑިމިޓްރޯ ކުލެބާ ނޫސްވެރިންނަށް ވިދާޅުވީ ހަރުދަނާ މަޝްވަރާއަށް ފުރުސަތު އޮތް ނަމަ ކުރިއަށް އޮތް ތަނުގައި ވެސް މިފަދަ ބައްދަލުވުމަކަށް ތައްޔާރު ކަމަށެވެ.
އެގޮތުން, ދެ ފޮރިން މިނިސްޓަރުން ބައްދަލުވުމުން ސުލްހަ އާއި ސަލާމަތީ ކަންކަމާ ގުޅޭ މަޝްވަރާއަށް ފުރުސަތު އޮންނަން ވާނެ ކަމަށް އޭނާ ފާހަގަކުރެއްވި އެވެ.
ކުލެބާ ވިދާޅުވީ ޔޫކްރެއިނުން އަމާން ނުދޭނެ ކަމަށާއި މަޝްވަރާގައި ބައިވެރިވާ ހަމައެކަނި ސަބަބަކީ ސުލްހަ ގެނެވޭނެ ގޮތްތަކާ ގުޅޭ ގޮތުން ވާހަކަ ދެއްކުން ކަމަށެވެ.
ރަޝިއާގެ ފޮރިން މިނިސްޓަރު ސާގެއި ލެވްރޯވް ވިދާޅުވީ ޔޫކްރެއިނަށް ހަތިޔާރު ދިނުމަކީ ނުރައްކާތެރި ކަމެއް ކަމަށާއި މަރިޔުޕޯލްގައި ހުންނަ ހޮސްޕިޓަލަށް ހަމަލާ ދިނީ އެ ތަނުގައި ހަނގުރާމަވެރިން ތިބުމުން ކަމަށެވެ.
ބުދަ ދުވަހު ހޮސްޕިޓަލަށް ދިން ވައިގެ ހަމަލާގައި ތިން މީހުން މަރުވި އެވެ. އޭގެ ތެރޭގައި ކުޑަކުއްޖަކު ވެސް ހިމެނެ އެވެ. އެ ހަމަލާގައި 17 މީހުންނަށް އަނިޔާވި އެވެ.
