ކުރިއަށް އޮތް ރޯދަ މަހަށް "އަދަދު" ނޫހުގެ މެގަޒިނެއް ނެރެ، ހާއްސަ ވީޑިއޯ ޕްރޮގްރާމްތަކެއް އުފެއްދުމަށް ހަމަޖެހިފައިވާ ކަމަށް ނޫހުގެ މެނޭޖްމަންޓުން މިއަދު ބުނެފި އެވެ.
ރޯދަ މަހަށް ހާއްސަ ލިޔުމާއި ފޮޓޯ އަދި އެހެނިހެން ކޮންޓެންޓު ހިމެނޭ ގޮތަށް ނެރޭ 100 ސޮފްހާގެ "ރޯދަ އަދަދު" ނެރުމަށް ހަމަޖެހިފައި އޮތީ މި ހިނގާ މާޗު މަހުގެ ތެރޭގައި ކަމަށް ނޫހުގެ ސީއީއޯ ހުސެއިން ފިޔާޒް މޫސާ ވިދާޅުވި އެވެ.
"މިފަހަރު އަދަދުގެ ރޯދަ ކޮންޓެންޓުތައް ވަރަށް ތަފާތުވާނެ. މެގަޒިންގެ އިތުރުން އޮންލައިން ކޮންޓެންޓު ވެސް ވަރަށް ފުރިހަމަވާނެ. ތަފާތު ރަހަތަކުގެ ވީޑިއޯ ޝޯތައް ވެސް ފެނިގެންދާނެ. މެގަޒިން މާ ލަސްތަކެއް ނުވެ ނެރޭނެ. އޮންލައިންގެ ޕޭޖް ވެސް ވަރަށް އަވަހަށް ލޯންޗް ކުރާނެ،" ފިޔާޒު ވިދާޅުވި އެވެ.
"ރާއްޖޭގެ ގިނަ ރަށްތަކަކަށް މި މެގަޒިން ދާނެ."
އަންނަ އޭޕްރީލް 2، ގައި ފެށޭ ރޯދަ މަހަށް ހާއްސަކޮށް "އަދަދު" އިން ހަތް ވީޑިއޯ ޝޯ އުފައްދަ އެވެ. އޭގެ ތެރޭގައި، މިދިޔަ ރޯދަ މަހު މަގްބޫލުކަން ހޯދި "ކުޅިކޮށް" ޕްރޮގްރާމާއި މުޅިން އަލަށް އުފައްދާ ސިޔާސީ ޕްރޮގްރާމެއް ކަމަށްވާ "ގޮނޑި" ހިމެނޭނެ ކަމަށް ނޫހުން ބުނެ އެވެ.
އޭގެ އިތުރުން، ދީނީ ޕްރޮގްރާމަކާއި ކައްކާ ޕްރޮގްރާމެއް، ވަރަށް ހާއްސަ ދެ މެހެމާނުންނާއެކު ގެނެސްދޭނެ ކަމަށް ވެސް ފިޔާޒު ވިދާޅުވި އެވެ.
"ހުރިހާ ވީޑިއޯ ޝޯތައް ވެސް ވަރަށް ފުރިހަމަވާނެ. އަޅުގަނޑުމެން މަސައްކަތް ކުރަނީ އާންމުކޮށް ރޯދަ މަހު މީޑީއާތަކުން ގެނެސްދޭ ކޮންޓެންޓަށްވުރެ ކޮލިޓީ، ކިޔުންތެރިންނާ ގުޅޭ ކޮންޓެންޓު ގެނެސްދިނުމަށް. އިރާދަކުރެއްވިޔާ ހުރިހާ ބޭފުޅުންނަށް ވެސް ކަމުދާ ކަހަލަ ކޮންޓެންޓު ހުންނާނެ،" ކުރިން "ހަވީރު" އަދި ރާއްޖެ ޓީވީ" ގައި ވެސް އިސް ރޯލެއް އަދާކުރެއްވި ފިޔާޒް ވިދާޅުވި އެވެ.
ރޯދަ މަހަށް "އަދަދު" އިން ތައްޔާރު ކުރާ އޮންލައިން ޕޭޖުގައި ރެސްޓޯރަންޓުތަކުގެ މެނޫ އާއި ރެސިޕީ ވެސް ހިމެނޭނެ އެވެ.
titledesc
