އަންތާލްޔާ، ތުރުކީ (މާޗް 10) - ރަޝިއާ އާއި ޔޫކްރެއިނާ ދެމެދު ސީދާ މަޝްވަރާތައް ކުރުމަށް ދެ ގައުމުގެ ފޮރިން މިނިސްޓަރުން ތުރުކީއަށް ވަޑައިގެންފި އެވެ.
މިއީ މީގެ ދެ ހަފްތާ ކުރިން ރަޝިއާގެ ސިފައިން ޔޫކްރެއިނަށް އަރައި ފެށި ހަނގުރާމައަށް ފަހު ދެ ގައުމުގެ މެދުގައި ބާއްވާ އެންމެ މަތީ ފަންތީގެ މަޝްވަރާ އެވެ.
ދެ ގައުމުގެ އޮފިޝަލުން މީގެ ކުރިން ވެސް ބެލަރޫސްގައި މަޝްވަރާ ކުރި އެވެ. އެކަމަކު އެއްވެސް ކުރިއެރުމެއް އެ މަޝްވަރާތަކުން ނުލިބެ އެވެ.
ތުރުކީގެ ދެކުނުގައި އޮންނަ އަންތާލްޔާ ސިޓީގައި ބުރާސްފަތި ދުވަހު އޮންނަ ބައްދަލުވުމުގައި ފުރަތަމަ ފަހަރަށް ރަޝިއާގެ މިނިސްޓަރެއް ބައިވެރިވެވަޑައިގަންނަވާނެ އެވެ.
ޔޫކްރެއިންގެ ފޮރިން މިނިސްޓަރު ޑިމިޓްރޯ ކުލެބާ އަދި ރަޝިއާގެ ފޮރިން މިނިސްޓަރު ސާގެއި ލެވްރޯވް ވެސް މިހާރު ތިއްބެވީ ތުރުކީގަ އެވެ.
މީގެ ކުރިން ބޭއްވި މަޝްވަރާތަކުގައި އެއްބަސްވީ އާއްމުން ރައްކާތެރި ހިސާބުތަކަށް ގެންދިޔުމަށާއި އިންސާނީ އެހީ ފޯރުކޮށްދޭން ކުޑަ ވަގުތުކޮޅަކަށް ހަމަލާތައް މެދުކަނޑާލުމަށެވެ.
ނަމަވެސް ކޮންމެ ފަހަރަކު ވެސް އެއްބަސްވުމާ ހިލާފުވެ، އަލުން ހަމަލާތަައް ފަށަ އެވެ. ޔޫކްރެއިނުން ބުނީ ތުރުކީގައި ފަށާ ބައްދަލުވުމަށް ވެސް މާ ބޮޑު އުއްމީދެއް ނެތް ކަމަށެވެ.
ރަޝިއާ އާއި ޔޫކްރެއިންގެ ހަނގުރާމަ ނިމުމަކަށް ގެންނަން ތުރުކީއިން މެދުވެރިއެއްގެ ދައުރު އަދާ ކުރަން ބޭނުންވާ ކަމަށް ރައީސް ތައްޔިބް އުރުދުގާން ކުރިން ވިދާޅުވެފައިވެ އެވެ.
