ޓޫރިޒަމް މިނިސްޓްރީގެ ސްޓޭޓް މިނިސްޓަރު ޑރ. އަހުމަދު ސޯލިހުގެ މައްޗަށް އުފުލި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާގައި ހުކުމްކުރުން މި މަހުގެ 29 ވަނަ ދުވަހަށް ތާވަލްކޮށްފި އެވެ.
ޑރ. ސޯލިހުގެ މައްޗަށް ދައުވާކޮށްފައިވަނީ ރައީސް އިބްރާހިމް މުހައްމަދު ސޯލިހުގެ ގަރާރަކުން އުފައްދަވާފައިވާ ރިޔާސީ ކޮމިޝަނުން ވަކި ރަށްތަކާ ގުޅޭ ތަހުގީގު ކުރިއަށް ގެންދާކަން އަންގާފައިވަނިކޮށް އެ މައުލޫމާތު އެނގިހުރެ، އެފަދަ ތަހުގީގެއް ކުރިއަށް ނުދާ ކަމަށް ބުނެ ބައެއް ފަރާތްތަކަށް ފޮނުވާފައިވާ ސިޓީތަކަކާ ގުޅިގެންނެވެ. ދައުލަތުން އެ ފާހަގަކުރާ ސިޓީތަކަކީ ކ. އަތޮޅުގެ ދެ ފަޅަކާއި ވ. ފޮއްތެޔޮބޮޑުފުއްޓާ ގުޅޭ ގޮތުން މިނިސްޓްރީން ދޫކޮށްފައި ހުރި ސިޓީތަކެކެވެ.
ނިމުމަކާ ގާތަށް ވާސިލްވެފައިވާ އެ މައްސަލާގައި މިއަދު ކްރިމިނަލް ކޯޓުގައި ކުރިއަށް ދިޔައީ ދެފަރާތުން ހުށަހެޅި ހެކިތަކާ ގުޅޭ ގޮތުން ވާހަަކަދެއްކުމެވެ. މައިގަނޑު ގޮތެއްގައި މިއަދު ދައުލަތުން ފާހަގަކުރީ ދައުވާ ހުށަހެޅި ހެކިތަކުން ސާބިތުކުރަން ބޭނުންވާ ނުކުތާތަކެވެ.
"މައްސަލައިގައި ހުށަހެޅިފައިވާ ލިޔެކިޔުންތަކާއި، ހެކިންގެ ބަޔާނުން ވެސް ފާހަގަވި މައިގަނޑު ކަމަކީ، ޓޫރިޒަމް މިނިސްޓްރީން ފޮނުވި އެއްވެސް ސިޓީއެއްގައި ޕްރެޒިޑެންޝަލް ކޮމިޝަން ނުވަތަ އެއްވެސް ތަހުގީގީ އިދާރައަކުން އަންގާފައިވަނިކޮށް އެއްވެސް ރަށެއްގެ ހެޑް ލީސް ޓްރާންސްފާ ނުވަތަ ޝެއާ ޓްރާންސްފާ ކުރުމުގެ ހުއްދަ ދީފައިވާކަން އެނގެން ނެތްކަން. އަދި މިނިސްޓްރީން ދޫކުރި ސިޓީއެއްގެ ސަބަބުން އެފަދަ މުއާމަލާތަކަށް މަގުފަހިވެފައި ވެސް ނެތްކަން." ޑރ. ސޯލިހްގެ ދިފާއީ ވަކީލެއްގެ ގޮތުގައި ހަރަކާތްތެރިވާ ލެކްސަވީ ޗެމްބާސްގެ ވަކީލް މަހުފޫޒު ސައީދު ވިދާޅުވި އެވެ.
އޭނާގެ މުވައްކިލުގެ މައްޗަށް އުފުލާފައިވާ ދައުވާ ސާބިތުކުރުމަށް ދައުލަތުން ހުށަހަޅާފައިވަނީ 24 ކިތާބީ ހެއްކެވެ. އޭގެ ތެރޭގައި ހިމެނެނީ ދެ ޝަފައީ ހެކިވެރިންނެވެ.
ދިފާއީ ވަކީލު ވިދާޅުވި ގޮތުގައި ވަކި ރަށާކާ ގުޅިގެން މަކަރާއި ހީލަތް ނުވަތަ ރިޝްވަތުގެ އަމަލުވާ ކަމަށް ޝައްކުކުރެވޭ ރަށެއް ހުއްޓުމަކަށް ގެންނަންޖެހޭނަމަ، އެކަން ކުރަން ފެންނަ މުއްދަތު އޮޅުންފިލުވުމަށް ކޮމިޝަނުގައި އެދުމަށް ރައީސް އޮފީހުގެ ސިޓީއަކުން އަންގާފައި އޮތް ނަމަވެސް، އެގޮތަށް ކޮމިޝަނުން އަންގާފައި ނުވާ ކަމެވެ.
ދިފާއުންނާއި ދައުލަތުން ބުނީ އެ މައްސަލައާ ގުޅޭ އިތުރު ވާހަކަތައް ހުލާސާ ބަޔާނުގައި ފާހަގަކުރާނެ ކަމަށެވެ. އެހެންވެ, މައްސަލަ ބައްލަވާ ގާޒީ އަލީ އާދަމް ވަނީ ހުލާސާ ބަޔާން އިއްވުމަށް މި މަހުގެ 17 ވަނަ ދުވަހަށް އަޑުއެހުމެއް ތާވަލްކޮށްފަ އެވެ. އަދި މި މަހުގެ 29 ވަނަ ދުވަހަށް ހުކުމް އިއްވުމުގެ އަޑުއެހުން ބާއްވަވާނެ ކަމަށް ވިދާޅުވި އެވެ.
