ރައީސުލްޖުމްހޫރިއްޔާގެ ރިޔާސީ ބަޔާނުގައި އިއުލާންކޮށްފައިވަނީ މާލޭގެ ރައްޔިތުންނަށް ގޯތި ދިނުމަށް ކަމަށާއި އަދި ގޯތި ވިއްކުމުގެ އެއްވެސް ވާހަކައެއް ހިމަނާފައިނުވާނެ ކަމަށް ރައީސް އޮފީހުން މާލެ ސިޓީ ކައުންސިލަށް އަންގައިފި އެވެ.
ރައީސް އޮފީހުން އެގޮތަށް އެންގީ މާލެ ސިޓީ މޭޔަރު ޑރ. މުހައްމަދު މުއިއްޒު, ހުޅުމާލެއިން މާލޭގެ ރައްޔިތުންނަށް 1،000 ގޯތި ހިލޭ ދިނުމަށް ގޮވާލައި ސަރުކާރަށް ސިޓީއެއް ފޮނުއްވުމުން އޭގެ ޖަވާބުގަ އެވެ.
މޭޔަރު މުއިއްޒު, ރައީސް ސޯލިހަށް ފޮނުއްވި ސިޓީގައި އެދިވަޑައިގަތީ ރާއްޖޭގެ އެހެން ރަށްރަށުން ވެސް ގޯތި ދޭ އުސޫލުން މާލޭގެ ރައްޔިތުންނަށް ވެސް ހުޅުމާލެއިން ހިލޭ ގޯތި ދިނުމަށެވެ.
އެ ސިޓީގެ ޖަވާބުގައި ރައީސް އޮފީހުން މިއަދު ބުނީ ރައީސުލްޖުމްހޫރިއްޔާގެ ރިޔާސީ ބަޔާނުގައި ގޯތި ވިއްކުމާ ގުޅޭ އެއްވެސް ވާހަކައެއް ހިމެނިފައިނުވާ ކަމަށެވެ.
އަދި ރިޔާސީ ބަޔާނުގައި ރައީސް ސޯލިހު އިއުލާންކުރެއްވީ މާލޭގެ ރައްޔިތުންނަށް ހުޅުމާލެއިން މަދުވެގެން 1،000 ގޯތި، ގުޅީފަޅުން 2،000 ގޯތި އަދި ގިރާވަރު ފަޅު ވެސް ހިއްކައިގެން ގޯތި ދިނުމަށް ކަމަށް ރައީސް އޮފީހުން މޭޔަރު މުއިއްޒުގެ ސިޓީގެ ޖަވާބުގައި ބުނެ އެވެ.
ރައީސް އޮފީހުން އިތުރަށް ބުނީ ސިޓީ ކައުންސިލްގެ ފަރާތުން ހުޅުމާލެއިން ގޯތި ދޫކުރުމާ ގުޅޭގޮތުން ހުށަހަޅާފައިވާ ކަންކަން ޕްލޭނިން މިނިސްޓްރީގެ ސަމާލުކަމަށް މިހާރު ގެނެސްފައިވާ ކަމަށެވެ.
މި އަހަރުގެ ރިޔާސީ ބަޔާން އިއްވަމުން ރައީސް ސޯލިހު ވަނީ އެމަނިކުފާނުގެ މި ދައުރު ނިމުމުގެ ކުރިން ގޯތި ދިނުމަށް އިންކަނޑައި ފަތް ހަވާލުކުރައްވާނެ ކަމަށް ވިދާޅުވެފަ އެވެ.
މާލެ ރައްޔިތުންނަށް ގޯތި ދިނުމަކީ މި ސަރުކާރުގެ ވައުދެކެވެ.
