މެޑްރިޑް (މާޗް 9) - ޗެމްޕިއަންސް ލީގުގެ ގަދަ 16 ގެ ދެ ވަނަ ލެގުގައި މިރޭ ރެއާލް މެޑްރިޑާ ދެކޮޅަށް ރަށުން ބޭރުގައި ޕީއެސްޖީ ނުކުންނައިރު، އެ ޓީމުގެ މުހިންމު ފޯވާޑް ކިލިއަން އެމްބާޕޭ ފިޓު ކަމަށް އެ ޓީމުގެ ކޯޗު މައުރީސިއޯ ޕޮޗެޓީނޯ ބުނެފި އެވެ.
ޕީއެސްޖީ ދަނޑުގައި ކުޅުނު ފުރަތަމަ ލެގުގައި ރެއާލްގެ މައްޗަށް 1-0 އިން އެ ޓީމު ކުރި ހޯދީ އެމްބާޕޭ ޖެހި ލަނޑަކުންނެވެ.
ހޯމަ ދުވަހު އޮތް ޕީއެސްޖީގެ ޓްރެއިނިންގައި އެމްބާޕޭ އަށް ވަނީ ކޮންމެ ވެސް ވަރެއްގެ އަނިޔާއެއް ވެފަ އެވެ. އެހެންކަމުން، މިރޭގެ މެޗަށް އޭނާ ފިޓުވާނެ ކަމާމެދު އޮތީ ސުވާލު އުފެދިފަ އެވެ. އެކަމަކު، އިއްޔެ އޮތް ޕީއެސްޖީގެ ފަރިތަކުރުންތަކުގައި އޭނާ ވަނީ ބައިވެރިވެފަ އެވެ.
މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޕޮޗެޓީނޯ ބުނީ މިރޭގެ މެޗަށް އެމްބާޕޭ ފިޓުވެފައިވާ ކަމަށެވެ.
"އެ އަނިޔާ ލިބުނު ވަގުތު އޭނާ އަށް އުނދަގޫތަކެއް ކުރިމަތިވި. އެކަމަކު ދެ ތިން ގަޑިއިރަށް ފަހު އޭނާ އަށް ރަނގަޅަށް ހިނގޭ. އެހެންވީމަ ބުނެވޭނީ އޭނާ މި މެޗަށް ފިޓުވާނެކަމަށް،" ޕޮޗެޓީނޯ ބުންޏެވެ.
މި މެޗަށް ރެއާލް އާއި ޕީއެސްޖީ ނުކުންނައިރު، އެންމެ ބޮޑު ސަމާލުކަމެއް ލިބޭނެ އެއް ކުޅުންތެރިޔަކީ އެމްބާޕޭ އެވެ. ޕީއެސްޖީއާއެކު ހަދާފައިވާ ކޮންޓުރެކްޓް މި ސީޒަންގެ ނިޔަލަށް ހަމަވާއިރު، އެމްބާޕޭ ރެއާލަށް ބަދަލުވާނެ ކަމުގެ އަޑުތައް ވަނީ ފެތުރިފަ އެވެ.
ޕޮޗެޓީނޯ ބުނީ އެމްބާޕޭ އަކީ ޕްރޮފެޝަނަލް ކުޅުންތެރިއެއް ކަމަށާއި ދަނޑު ބޭރުން އިވޭ އަޑުތަކުގެ ސަބަބުން އޭނާގެ ކުޅުމަށް އަސަރުނުކުރާނެ ކަމަށެވެ.
"އެމްބާޕޭ ދައްކާ ކުޅުމަކަށް، ބޭރުން މި ހިނގާ ކަންތައްތަކުގެ އަސަރެއް ނުކުރާނެ،" ޕޮޗެޓީނޯ ބުންޏެވެ.
ރެއާލް ދޫކޮށް މި ފަހަރު ޕީއެސްޖީއާ ގުޅުނު ތަޖުރިބާކާރު ޑިފެންޑަރު ސާޖިއޯ ރާމޯސް އަށް މިރޭގެ މެޗުގައި ނުކުޅެވުނު ނަމަވެސް އޭނާ ވަނީ މެޑްރިޑަށް ޓީމާ އެކު ދަތުރުކޮށްފަ އެވެ. މެޑްރިޑް ދަނޑުގައި މިރޭ ކުޅޭ މެޗު ފަށާނީ ރާއްޖެ ގަޑިން 1 ޖަހާއިރު އެވެ.
