ޕެރިސް، ފްރާންސް (މާޗް 8) - މީގެ ދެ އަހަރު ކުރިން ފެތުރެން ފެށި ކޮވިޑް ބަލީގައި މިހާތަނަށް ހަ މިލިއަނަށް ވުރެ ގިނަ މީހުން މަރުވެފައިވާ ކަމަށް އޭއެފްޕީގެ ތަފާސްހިސާބުން ދައްކައިފި އެވެ.
ކޮވިޑް ބަލީގައި ހަ މިލިއަން މީހުން މަރުވެފައިވާ އިރު، އޭޝިއާ ފިޔަވައި ދުނިޔޭގެ އެހެން ހުރިހާ ހިސާބެއްގައި ވެސް ބަލި ފެތުރުން އަދި މީހުން މަރުވުން ވެސް ވަނީ ވަރަށް ބޮޑަށް މަޑުޖެހިފަ އެވެ.
އޭޝިއާގައި މި ވަގުތު އެންމެ ހާލަތު ގޯސްކޮށް އޮތީ ހޮންކޮންގަ އެވެ. އޭގެ އިތުރުން ނިއުޒީލޭންޑުގައި ވެސް ކޭސްތައް މަތިވާން ފަށާފައިވާ ކަމަށް ދައްކަ އެވެ.
ފާއިތުވި ހަފްތާގައި ކޮވިޑް ޖެހިގެން ދުވާލަކު އެވްރެޖުކޮށް މަރުވާ މީހުންގެ އަދަދު ވަނީ އޭގެ ކުރީ ހަފްތާއާ އަޅާ ބަލާއިރު 18 ޕަސެންޓު ދަށްވެ، 7،170 އަށް ވެއްޓިފަ އެވެ.
މިދިޔަ ފެބްރުއަރީ މަހު އޮމިކްރޯން ވޭރިއެންޓް މަޑުޖެހުމާ އެކު ކޭސްތަކާއި މަރުތައް މަދުވާން ފަށާފައިވާ ކަމުގެ ޓްރެންޑެއް ފެށި، އަދިވެސް އެ ޓްރެންޑް ދަނީ ކުރިއަށެވެ.
އެމެރިކާގައި ކޮވިޑް ޖެހިގެން 960،311 މީހުން މަރުވެފައިވާ އިރު، ބްރެޒިލް އިން 652،341 މީހުން އަދި އިންޑިއާއިން 515،102 މީހުން މަރުވެފައިވެ އެވެ.
ދުނިޔޭގެ ގިނަ ގައުމުތަކުން ކޮވިޑާ އެއްކޮށް ދިރިއުޅުން ކުރިއަށް ގެންދަން ނިންމައި، ފިޔަވަޅުތައް އުވާލަމުން ދިޔަ ނަމަވެސް، ޗައިނާގައި އަޅާފައިވާ ފިޔަވަޅުތައް އަދިވެސް ދަނީ ތަންފީޒު ކުރަމުންނެވެ.
