ހަނގުރާމަ އާއި ހަމަނުޖެހުން ފެތުރުމުން، އަނިޔާވެރިކަމާއި، ފަގީރުކަމާއި، ނަހަމަކަމުގެ އެންމެ ބޮޑު އަސަރެއް ކުރާ އެއް ބަޔަކީ އަންހެނުންނެވެ. މި ވަގުތު ދުނިޔޭގެ ކޮންމެ 100 މީހަކު އެކަކު ނުވަތަ 82.4 މިލިއަން މީހުންނަކީ އެކި ސަބަބުތަކާ ހެދި ގެދޮރު ދޫކޮށް ގޮސްފައިވާ މީހުންނެވެ. އޭގެ ތެރެއިން 80 ޕަސެންޓަކީ އަންހެނުންނާއި ކުޑަކުދިންނެވެ.
އާއްމު ހާލަތުގައި ވެސް ޖިންސީ ތަފާތު ކުރުމާ ހެދި އަންހެނުންނަށް ތައުލީމާއި އިގްތިސާދީ ފުރުސަތުތައް ހަނިވެ އެވެ. މުހިއްމު ނިންމުންތައް ނިންމުމުގައި އަންހެނުންގެ ދައުރު ކުޑަ އެވެ. ނަމަވެސް އެ ތަފާތު ކުރުންތައް، އެތައް ގުނައެއް އިތުރުވެ، އާއްމު ހާލަތަށް ވުރެ ގިނަ ގޮންޖެހުންތަކާ އަންހެނުންނަށް ކުރިމަތިވަނީ ހަނގުރާމަ އާއި ހަމަނުޖެހުމުގެ ތެރޭގަ އެވެ.
ގެދޮރު ދޫކޮށް ދާން ޖެހިފައިވާ އަންހެނަކު ތުއްތު ދަރިފުޅު އުރައިގެން.
ހަނގުރާމަތަކުގައި ނިޒާމީ ގޮތުން ރާވައިގެން އަންހެނުން ރޭޕް ކުރުމާއި ޖިންސީ އަނިޔާ ކުރުން އޮވެ އެވެ. އެ އަނިޔާވެރި އަމަލުތައް ބޭނުން ކުރަނީ ބިރުވެރިކަން އުފެއްދުމުގެ ހަތިޔާރެއްގެ ގޮތުގަ އެވެ. އަދި ވަކިވަކި މުޖުތަމައުތައް ބައިބައިކޮށް، ރޫޅާލުމުގެ ބޭނުމުގައި ވެސް ރޭޕް އާއި ޖިންސީ އަނިޔާ ހަތިޔާރެއްގެ ގޮތުގައި ބޭނުންކުރާ މަންޒަރު ފެނެ އެވެ.
titledesc
ހަނގުރާމައިގެ މައިދާނާއި ހަމަނުޖެހުން ހިނގާ ގައުމުތަކުގައި ބޮޑެތި ތަފާތު ކުރުންތަކާއި އަނިޔާ ކުރިމަތިވި ނަމަވެސް، އާއިލާއަށް އަޅާލުމާއި، ދިރިތިބެވޭނެ ގޮތްތައް ހޯދުމުގައި އަންހެނުން އަދާކުރަނީ ވަރަށް މުހިއްމު ދައުރެކެވެ.
ފިރިންނާއި އާއިލާގެ ފިރިހެން މެމްބަރުން ހަނގުރާމައަށް ދިޔުމުން، ނުވަތަ މަރުވުމުން، އާމްދަނީ ހޯދުމުގެ ޒިންމާ އުފުލަނީ އަންހެނުންނެވެ. އެ ޒިންމާއާ އެކު ދަރިން ބެލުމާއި މުސްކުޅި މައިންނާއި ބަފައިންނަށް އަޅާލުމުގެ ޒިންމާ ވެސް އުފުލަ އެވެ.
ފަހަކަށް އައިސް ހަނގުރާމަތަކުގައި އަމަލީ ގޮތުން ބައިވެރިވާ އަންހެނުންގެ އަދަދުތައް ވެސް ވަނީ އިތުރުވާން ފަށާފަ އެވެ. ސީރިއާގެ ހަނގުރާމަ އާއި ޔޫކްރެއިންގައި މިހާރު ކުރަމުންދާ ހަނގުރާމައިގައި ވެސް އަންހެނުން މައިދާނަށް ނުކުމެ އަމަލީ ގޮތުން އުޅޭ މަންޒަރު ފެނެ އެވެ.
ޔޫކްރެއިން ހަނގުރާމައިގައި އަމަލީ ގޮތުން ބައިވެރިވާ އަންހެނެއް.
އެހެން ނަމަވެސް، ހަނގުރާމަ ނިންމައި ސުލްހައަށް ކުރާ މަސައްކަތުގައި މުހިއްމު ނިންމުންތައް ނިންމުމުގައި އަންހެނުންގެ ބައިވެރިވުން ވަރަށް ކުޑަ އެވެ. ނަމަވެސް އަންހެނުންގެ ބައިވެރިވުން ހިމެނޭ ނަމަ ސުލްހައަށް ކުރާ މަސައްކަތުގެ ނަތީޖާ ރަނގަޅު ކަމަށް ދިރާސާތަކުން ދައްކަ އެވެ.
titledesc
ނޯޓް: މި ލިޔުމަށް މައުލޫމާތު ނަގާފައި ވަނީ ވިމެންފޯވިމެން.އޯގް އިންނެވެ.
