ސިޑްނީ، އޮސްޓްރޭލިއާ (މާޗް 8) - ބޯކޮށް ވާރޭ ވެހުމުގެ ސަބަބުން ފެންބޮޑުވެފައިވާ އޮސްޓްރޭލިއާއިން މަރުވި މީހުންގެ އަދަދު 20 އަށް އަރާފައިވާ އިރު، އެތައް ހާސް ބަޔަކު ސިޑްނީ ދޫކޮށް ރައްކާތެރި ހިސާބުތަކަށް ބަދަލުވަމުން އެބަދެ އެވެ.
ހޯމަ ދުވަހު ސިޑްނީގައި ފެންބޮޑުވެފައިވާ ހިސާބަކުން ދެ މީހެއްގެ ހަށިގަނޑު ފެނިފައިވާ އިރު، ފުލުހުން ބުނީ ބެލެވެނީ އެއީ މަންމައަކާއި އޭނާގެ ފިރިހެން ދަރިފުޅު ކަމަށެވެ.
އޮސްޓްރޭލިއާގެ އެންމެ ބޮޑު ސިޓީގައި ވަރަށް ބޮޑަށް ފެންބޮޑުވެ، ގެތަކަށް އަސަރު ކުރަމުން ދާތީ، އާއްމުން ރައްކާތެރި ހިސާބުތަކަށް ބަދަލުވުމަށް ވަނީ ލަފާދީފަ އެވެ.
ގައުމީ މޫސުމާ ބެހޭ ބިޔުރޯއިން ބުނީ "ކުރިއަށް އޮތް 48 ގަޑިއިރު ވެސް ނުރައްކާތެރި" ކަމަށެވެ. ސިޑްނީގެ 60،000 މީހުން ރައްކާތެރި ހިސާބުތަކަށް ދިޔުމަށް ވަނީ އަންގާފަ އެވެ.
އާދަޔާ ހިލާފަށް ބޯކޮށް ވާރޭ ވެހޭތީ ސިޑްނީގެ ބްރިޖުތަކާއި މަގުތަކުގައި ފެންބޮޑުވެ، ގެތަކަށް ފެން ވަދެފައިވާ އިރު، ކާރުތައް އޮޔާދާ މަންޒަރު ވެސް ފޮޓޯ އާއި ވީޑިއޯއިން ފެނެ އެވެ. އޭގެ އިތުރުން ސުޕާމާކެޓެއްގެ ފުރާޅު ވެއްޓިފައިވާ މަންޒަރު ވެސް ފެނެ އެވެ.
މިދިޔަ ހަފްތާގައި ވެހެން ފެށި ވާރޭ، މި ހަފްތާގައި އިތުރަށް ގޯސްވާނެ ކަމަށް ލަފާކުރެވޭ އިރު ނިއު ސައުތު ވޭލްސްގެ އައްސޭރިފަށުގެ 2000 ކިލޯމީޓަރުގެ ސަރަހައްދަކަށް ވަނީ ފެންބޮޑުވާނެ ކަމުގެ އިންޒާރު ނެރިފަ އެވެ.
ސައިންސްވެރިން ބުނާ ގޮތުގައި އޮސްޓްރޭލިއާއަށް ދިމާވާ ފެންބޮޑުވުމުގެ މައްސަލަ އާއި ޖަންގަލީގައި ރޯވުމުގެ މައްސަލަ އާއި ތޫފާންތަކާއި ވާރޭ ނުވެހުމުގެ މައްސަލަ އަހަރަކަށް ވުރެ އަހަރެއް ގޯސްވަމުން ދަނީ މޫސުމީ ބަދަލުގެ ސަބަބުންނެވެ.
