މިދިޔަ ހުކުރު ދުވަހު ހަވީރު ފިނި ޖެހިގެން އައިއިރު ވިލިމާލޭގެ މަގެއްގެ ޕޭވްމަންޓް މަތީގައި ބައިސްކަލެއްގެ ފުރޮޅު ނައްޓާލާފައި ބާްއްވައިގެން، ވޮއްޓާއި ޓަޔަރާ ދޭތެރެ އަށް ދެ ކަށިގަނޑު ލައްވާ މަތަމުން މީހަކު ގެންދިޔަ އެވެ. އޭނާގެ ކައިރީގައި ދެ ބައިސްކަލް ހުއްޓެވެ. އެއް ބައިސްކަލް ހުރީ ދެ ފުރޮޅު ނައްޓާލާފައި އުއްޑުން ޖަހާފަ އެވެ. ކައިރީ ބަހައްޓަފައި ހުރި ވަރުގަދަ ކުޑަ ފޮއްޓެއްގައި ނަރު ކެނޑިއަކާއި ސިފްޓަރަކާއި ކަށިގަނޑު ފަދަ ސާމާނު އަޅާފައި ހުއްޓެވެ.
ބަނގުލަދޭޝްގެ ރައްޔިތެއް ކަމަށްވާ، އުމުރުން 38، އަހަރުގެ މުހައްމަދު އަތީކުލް އިސްލާމް (އަތީކު)، މީގެ ހަ އަހަރު ކުރިން ރާއްޖެ އައީ ލ. އިސްދޫ ކަލައިދޫ ގެ ވޯކްސޮޕެއްގަ ބައިސްކަލާއި ސައިކަލް މަރާމާތު ކުރާށެެވެ. އޭގެ ފަހުން ކައްކާ އަކަށް ވެސް އޭނާ އުޅުނެވެ.
އޭނާ ބުނާ ގޮތުގައި ވިލިމާލެއަށް އައީ އޭނަ ގެނައި ފަރާތުން "ދޫކޮށްލުމުން" ކުރާނެ މަސައްކަތެއް ހޯދާށެެވެ. ވިލިމާލެއަކީ އިންޖީނުލީ އުޅަނދު ފަހަރު ނުދުއްވާ، ބައިސްކަލާއި ބެޓެރި ސައިކަލަށް ޑިމާންޑް އޮތް އަވަށެވެ. އަތީކު ކުރަން ދަންނަ މަސައްކަތް ލިބޭނެކަން ޔަގީންވާ ތަނެކެވެ.
އަތީކުލް އިސްލާމު ބައިސްކަލެއްގެ ހަން ބަދަލުކުރަނީ: ގިނައިން ބައިސްކަލް ގަދަން ލިބެނީ ހުކުރު ދުވަހު-- އަދަދު ފޮޓޯ އަހުމަދު ސައީދު
އަތީކު ބުނި ގޮތުގައި ބައިސްކަލް މަރާމާތު ކުރުމުގެ މަސައްކަތް އޭނާ ކުރަނީ ލިބޭ ހުސް ވަގުތުގަ އާއި ހުކުރު ދުވަހު އެވެ.
"މަސައްކަތް ލިބުނީމަ ކޮންސްޓްރަންޝަން މަސައްކަތް ކުރަނީ، ބައިސިކަލް ހަދަނީ ބައިސްކަލް މަސައްކަތް ލިބުނީމަ، ކޮންމެ ދުވަސް ބައިސްކަލް ނުހަދަނީ،" ބަންގްލަދޭޝްގެ ގިނަ މީހުން ދިވެހިން ވާހަކަ ދައްކާ އުޅޭ ގޮތަށް އޭނާ ބުންޏެވެ.
އަތީކު ބުނި ގޮތުގައި ހުސް ވަގުތުގައި ބައިސްކަލް ހަދައިގެން ރަނގަޅު އާމްދަނީ އެއް އޭނާއަށް ލިބެ އެވެ. ބައިސްކަލެއްގެ ހަމެއް 20ރ. އަށް ބަދަލުކޮށްދޭއިރު، ދިވެހިންނާއި ބިދޭސީން ވެސް ބައިސްކަލް ހަދަން އޭނާއާ ހަވާލު ކުރާ ކަމަށް އަތީކު ބުންޏެވެ.
"މިއަދު ހަދަނީ ތިން ބައިސްކަލް، 400ރ. މިއަދު ލިބެނީ، ބައިސްކަލް ހެދީމަ އެއްބައި ފަހަރު، 100ރ. 150ރ. 200ރ. ވެސް ލިބެނީ، ގިނަ މަސައްކަތް ހުރީމަ ގިނަ ރުފިޔާ ލިބެނީ،" އޭނާ ބުންޏެވެ.
އެއްވެސް ތަނަކުން ހުއްދައެއް ހޯދުމެއް ނެތި، މަދު ޓޫލްސް ކޮޅެއް ހިފައިގެން މަގުމަތީގަ މަސައްކަތް ކޮށްލައިގެން ދެކޮޅު ޖެއްސޭނެ އާމްދަނީއެއް ލިބޭނެ ގޮތް އަތީކު ވަނީ ހޯދައިފަ އެވެ. ބައިސްކަލް މަރާމާތު ކޮށްދިނުމަކީ ވެސް އެކަށީގެންވާ އާމްދަނީއެއް ލިބިދާނެ މަސައްކަތެއްކަން، ކުރާނެ މަސައްކަތެއް ނުލިބިގެން އުޅޭ ފަރާތްތަކަށް އަތީކު ސާބިތު ކޮށްދެއެވެ.
