ޕެރިސް (މާޗް 7) - ޓްރެއިނިން ތެރެއިން ލިބުނު އަނިޔާ ސީރިއަސް ނޫންކަން އެނގުމުން ޕީއެސްޖީގެ ތަރި ކީލިއަން އެމްބާޕޭ އަށް ބުދަ ދުވަހުގެރޭ ޗެމްޕިއަންސް ލީގުގައި ރެއާލް މެޑްރިޑާ ދެކޮޅަށް ކުޅެވޭނެ ކަމުގެ އުންމީދު އެބައޮތް ކަމަށް ޕީއެސްޖީން ބުނެފި އެވެ.
އެކަމަކު، 16 އަހަރަށް ފަހު ރެއާލް ދޫކޮށް މި ފަހަރު ޕީއެސްޖީއާ ގުޅުނު ތަޖުރިބާކާރު ޑިފެންޑަރު ސާޖިއޯ ރާމޯސް އަށް މި ފަހަރު ވެސް ކުރީގެ ޓީމާ ދެކޮޅަށް ނުކުޅެވޭނެ އެވެ. މިދިޔަ މަހު 15 ވަނަ ދުވަހު ޕީއެސްޖީ ދަނޑުގައި އެމްބާޕޭ ފަހު ވަގުތު ޖެހި ގޯލުން 1-0 އިން ރެއާލް ބަލިކުރި މެޗުގައި ވެސް ރާމޯސް ނުކުޅެ އެވެ. ރާމޯސް މި ވަގުތު އަންނަނީ ކުޑަކަޅުވާ މަަސްގަނޑަށް ލިބިފައިވާ އަނިޔާ އިން ފަރުވާ ހޯދަމުންނެވެ.
ޕީއެސްޖީން މިއަދު ގެންދިޔަ ފަރިތަކުރުންތަކުގެ ތެރެއިން އެމްބާޕޭގެ ފަޔަށް އަނިޔާވެގެން އޭނާ އަށް ރެއާލާ ދެކޮޅަށް ނުކުޅެވޭނެ ކަަމަށް ފްރާންސްގެ ބައެއް ނޫސްތަކާއި މެޑްރިޑްގެ ބައެއް މީޑިއާތަކުން ރިޕޯޓްކުރި އެވެ.
ޕެރިހުގެ ބައެއް ޓީވީތަކުން ރިޕޯޓްކުރިގޮތުގައި އެމްބާޕޭ ރެއާލާ ދެކޮޅަށް ކުޅެން ބޭނުންނުވަނީ މި ސީޒަނަށް ފަހު އޭނާ އެ ޓީމަށް ބަދަލުވާން ބޭނުންވާތީ ކަމަށެވެ. އެކަމަކު، ޕީއެސްޖީގެ އޮފިޝަލަކު ވަނީ އެ ވާހަކަ ދޮގުކޮށްފަ އެވެ.
ފަހުން ޕީއެސްޖީގެ ރަސްމީ ވެބްސައިޓްގައި ނެރުނު ބަޔާނެއްގައި ބުނެފައިވަނީ އެމްބާޕޭގެ އަނިޔާގެ ކަންކަން ދެނެގަންނަމުން އަންނަ ކަމަށާއި ސީރިއަސް އަނިޔާއެއްގެ މައްސަލައެއް ނެތުމުން ކުރިއަށް އޮތް 24 ގަޑިއިރަށް ބަލާފައި އޭނާ މެޗުގައި ފެނުމުގެ އުންމީދު އެބައޮތް ކަމަށެވެ.
މި ސީޒަނުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރި އެމްބާޕޭ އެންމެ ފަހުން ފްރެންޗް ލީގުގައި ނީސް އަތުން 1-0 އިން ޕީއެސްޖީ ބަލިވި މެޗުގައި ނުކުޅެ އެވެ. އެމްބާޕޭ ހުރީ ކާޑުހަމަވެގެން ސަސްޕެންޝަނެއްގަ އެވެ.
އަނިޔާގެ ސަބަބުން ޕީއެސްޖީގެ ސްޕެއިން މިޑްފީލްޑަރު އެންޑަ ހެރޭރާ ވެސް ހުރީ ކުޅުމާ ދުރުގަ އެވެ.
