މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޕާލިމެންްޓަރީ ގުރޫޕުގެ ޑެޕިއުޓީ ލީޑަރުކަމަށް ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް އިންތިހާބުވެއްޖެ އެވެ.
އެމްޑީޕީ ގެ ޕާލިމެންްޓަރީ ގުރޫޕުގެ ޑެޕިއުޓީ ލީޑަރުގެ އިންތިހާބުގައި އެއްވަރަކަށް ވޯޓު ލިބުނު ދެ ކެންޑިޑޭޓުންގެ މެދުގައި ބާއްވާ އިންތިހާބު ކުރިޔަށްގެންދިޔައީ މިއަދެވެ.
އެ އިންތިހާބުގައި ޝަހީމް ވަނީ އޭނާއާއެކު ދެން އެ މަގާމަށް ވާދަކުރެއްވި ހުޅުދޫ ދާއިރާގެ މެމްބަރު އިލްޔާސް ލަބީބްގެ މައްޗަށް 13 ވޯޓުގެ ތަފާތަކުން ކުރި ހޯއްދަވާފަ އެވެ. އެ އިންތިހާބުގައި ޝަހީމަށް ލިބިވަޑައިގަތީ 38 ވޯޓެވެ. އިލްޔާސްއަށް ލިބިވަޑައިގަތީ 25 ވޯޓެވެ.
ޖުމްލަ 65 މެމްބަރުން ތިބޭ އެމްޑީޕީ ޕީޖީ ގުރޫޕުގެ މަގާމުތަކަށް މެމްބަރުން ހޮވަން ފުރަތަމަ އިންތިހާބު ބޭއްވީ މިދިޔަ މަހުގެ 18 ގަ އެވެ. އެ އިންތިހާބުގައި ވެސް އެ ދެބޭފުޅުން ވާދަކުރެއްވިއިރު ދެ ބޭފުޅުންނަށް ވެސް ވޯޓު ލިބިވަޑައިގަތީ އެއްވަރަކަށެވެ. އެގޮތުން އެ ދެ ބޭފުޅުންނަށް ވެސް ލިބިވަޑައިގެންނެވީ 34 ވޯޓެވެ.
އެ އިންތިހާބުގައި ދެން ވާދަކުރެއްވި އަލިފުށި ދާއިރާގެ މެމްބަރު މުހައްމަދު ރަޝީދު ހުސެއިން ވަނީ 49 ވޯޓާއެކު ޑެޕިއުޓީ ޕީޖީ ލީޑަރުކަމަށް އިންތިހާބުވެވަޑައިގެންފަ އެވެ.
