ފިޝަރީޒް މިނިސްޓްރީގެ އާ ޑެޕިއުޓީ މިނިސްޓަރަކަށް އަހުމަދު ފާތިހް އައްޔަނުކޮށްފި އެވެ.
ޑެޕިއުޓީ މިނިސްޓަރަކަށް އައްޔަންކުރި ފާތިހް ވަނީ އޮސްޓްރޭލިއާގެ ނިއު ސައުތު ވޭލްސްގެ ޔުނިވާސިޓީ އޮފް ޓެކްނޮލޮޖީގައި ބެޗެލާ އޮފް ސައިންސް އިން އެޕްލައިޑް ކެމިސްޓްރީ ފުރިހަމަކުރައްވާފަ އެވެ. މި މަގާމަށް އައްޔަން ކުރެއްވުމުގެ ކުރިން ފާތިހް ވަނީ އެއާޕޯޓުގެ އިމިގްރޭޝަން އޮފިސަރެއްގެ މަގާމު ފުރުއްވާފަ އެވެ.
ފާތިހު އެ މަގާމަށް އައްޔަން ކުރެއްވިއިރު ފިޝަރީޒް މިނިސްޓްރީގައި އިތުރު ދެ ޑެޕިއުޓީ މިނިސްޓަރުން ތިއްބަވަ އެވެ. އެއީ, އަލީ މާޖިދާއި ހަސަން ނާޝިދެވެ. ދެ ސްޓޭޓް މިނިސްޓަރުން ވެސް ތިއްބަވަ އެވެ. އެއީ, ހަސަން ރަޝީދާއި މުހައްމަދު އަހުމަދެވެ.
ޑެޕިއުޓީ މިނިސްޓަރަކަށް މުސާރަ އާއި އެލަވަންސްގެ ގޮތުގައި ޖުމްލަ 35،000 ރުފިޔާ ލިބިވަޑައިގަންނަވާނެ އެވެ. އެއީ އަސާސީ މުސާރައިގެ ގޮތުގައި 20،500 ރުފިޔާ އާއި އެލަވަންސްގެ ގޮތުގައި 15،000 ރުފިޔާ އެވެ.
މިވަގުތު ސަރުކާރުގެ އެކި އިދާރާތަކުގައި ޑެޕިއުޓީ މިނިސްޓަރުންނާއި އެ ފެންވަރުގެ ބޭފުޅުންގެ ގޮތުގައި ޖުމްލަ 55 ބޭފުޅުން ތިއްބަވާކަމަށް ރައީސް އޮފީހުގެ ވެބްސައިޓުން ދައްކަ އެވެ.
މިއަދު ފިޝަރީޱް މިނިސްޓްރީއަށް އާ ނައިބަކު އައްޔަނުކުރިއިރު، މިދިޔަ ހަފުތާ ވެސް ވަނީ ދެ މިނިސްޓްރީއަށް ސްޓޭޓް މިނިސްޓަރުންގެ ގޮތުގައި ދެ ބޭފުޅަކު އައްޔަނުކޮށްފަ އެވެ. އެގޮތުން އައްޔަނުކުރީ އިސްލާމިކް މިނިސްޓްރީގެ ސްޓޭޓް މިނިސްޓަރަކަށް ޝެއިހް މުހައްމަދު އަނީލްއާއި ޔޫތު މިނިސްޓްރީގެ ސްޓޭޓް މިނިސްޓަރަކަށް މުހައްމަދު ނާސިހު ރަޝީދު އެވެ. އަދި ހޯމް މިނިސްޓްރީގެ ޑެޕިއުޓީ މިނިސްޓަރަކަށް ލުއައްޔު ސައީދު ވެސް އައްޔަންކުރި އެވެ.
