ކޮވިޑް ޖެހޭ މީހުންނަށް ހަކުރު ބަލި ކުރިމަތިވުމުގެ ފުރުސަތު ބޮޑު ކަމަށް އެމެރިކާގެ ސެންޓާޒް ފޯ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) ގެ ރިޕޯޓެއްގައި ބުނެފި އެވެ.
ސީޑީސީން މިދިޔަ ޖެނުއަރީ މަހު ޝާއިއު ކުރި މޯބިޑިޓީ އެންޑް މޯޓަލިޓީ ވީކްލީ ރިޕޯޓުގައި ބުނީ ކޮވިޑް ޖެހޭ މީހުންނަށް ހަކުރު ބަލި ޖެހުމުގެ ފުރުސަތު 31-166 ޕަސެންޓު އިތުރު ކަމަށެވެ.
ކޮވިޑަށް ފަހު ހަކުރު ބަލި ޖެހޭ ކޭސްތަކުގެ ތެރޭގައި ހަކުރު ބަލީގެ ޓައިޕް 1 އަދި ޓައިޕް 2 ވެސް ހިމެނެ އެވެ.
ސީޑީސީން އެ ރިޕޯޓު ޝާއިއު ކުރުމުގެ ކުރިން ނޮވެމްބަރު މަހު ހެދި ދިރާސާއަކުން އެނގުނު ގޮތުގައި ދިރާސާގައި ބައިވެރިވި 3،800 ކޮވިޑް ބަލި މީހުންގެ ތެރެއިން ގާތްގަނޑަކަށް 50 ޕަސެންޓަށް ހަކުރު ބަލި ޖެހުނެވެ.
ކޮވިޑް ޖެހިގެން ވެންޓިލޭޓަރުގައި ބާއްވާ މީހުންގެ 91 ޕަސެންޓު މީހުންނާއި އެ ބަލީގައި މަރުވި 73 ޕަސެންޓު މީހުންގެ ހަށިގަނޑުގައި ވެސް ލޭގައި ހަކުރުގެ މިންވަރު މަތި ކަމަށް ފާހަގަވި އެވެ.
ސައިންޓިސްޓުން މިހާރު މަސައްކަތް ކުރަނީ ކޮވިޑް ޖެހުމުން ލޭގައި ހަކުރު މަތިވާ ސަބަބުން ހޯދައި، އެކަން ހައްލު ކުރަން އެޅޭނެ ފިޔަވަޅެއް ދެނެގަތުމަށެވެ.
ނޯޓް: މި ލިޔުމަށް މައުލޫމާތު ނަގާފައި ވަނީ ސައިންސްނިއުސް.އޯގް އިންނެވެ.
