އިގްތިސޯދީ ކާރިސާއެއްގެ ސަބަބުން ސްރީލަންކާގައި އާއްމު ރައްޔިތުންގެ ދިރިއުޅުމަށް ބުރޫ އަރާފައި ވަނިކޮށް، މިދިޔަ ހަފްތާގައި ދެ މިނިސްޓަރަކު މަގާމުން ވަކި ކުރުމާ އެކު ސިޔާސީ ހަލަބޮލިކަން އުފެދިއްޖެ އެވެ.
ހަކަތައާ ބެހޭ މިނިސްޓަރު އުދެޔަ ގައްމަންޕިލަ އަދި އިންޑަސްޓްރީއާ ބެހޭ މިނިސްޓަރު ވިމާލް ވީރަވަންސަ މަގާމުން ވަކި ކުރީ "ރައީސަށް ލިބިދޭ ބާރުގެ ދަށުން" ކަމަށް ސަރުކާރުން ބުންޏެވެ.
މަގާމުން ވަކިކުރި ސީދާ ސަބަބު ހާމަނުކުރި ނަމަވެސް، އެ ދެ ބޭފުޅުން ވެސް ވަނީ އިގްތިސާދީ ކާރިސާއާ ގުޅިގެން ފިނޭންސް މިނިސްޓަރު އަދި ރައީސްގެ ކޮއްކޯފުޅު ބެސިލް ރާޖަޕަކްސައަށް ފާޑުވިދާޅުވެފަ އެވެ.
ޑެއިލީ މިރާ ނޫހުން ބުނީ ދެ މިނިސްޓަރުން މަގާމުން ވަކި ކުރުމުން، ވެރިކަން ކުރާ ކޯލިޝަނުގައި ހިމެނޭ އިތުރު 11 މެމްބަރުން ސަރުކާރާ ވަކިވާން ވިސްނަމުންދާ ކަމަށެވެ.
އެހެންކަމުން، ޕާލިމެންޓުގެ ކުރިއަށް އޮތް ބައްދަލުވުމުގައި އެ 11 މެމްބަރުން ތިއްބަވާނީ މިނިވަން މެމްބަރުންގެ ގޮތުގަ އެވެ. އޭގެ ތެރޭގައި ކުރީގެ ރައީސް މައިތްރިޕާލާ ސިރިސޭނާ ހިމެނިވަޑައިގަންނަވަ އެވެ.
ރައީސް ގޮތަބަޔާ ރާޖަޕަކްސަ ވިދާޅުވީ ސަރުކާރާ އެކު މަސައްކަތް ނުކުރެވޭ އަދި ސަރުކާރުގެ ވިސްނުމާ ދެކޮޅު ފަރާތްތަކަށް "މި ސަރުކާރުގައި ޖާގައެއް ނެތް" ކަމަށެވެ.
އެހެން ނަމަވެސް ބޮޑު ވަޒީރު މަހިންދަ ރާޖަޕަކްސަ ގެންދަވަނީ ސިޔާސީ ހަލަބޮލިކަން ނިމުމަކަށް ގެނެވޭތޯ މަސައްކަތް ކުރަމުންނެވެ.
އެގޮތުން ސަރުކާރާ ވަކިވާން ވިސްނަމުންދާ ކަމަށް އިއުލާނު ކުރި 11 މެމްބަރުންނާ އެކު މަޝްވަރާކޮށް ހައްލެއް ހޯދޭތޯ ބައްދަލުވުމަކަށް ހުކުރު ދުވަހު ދައުވަތު ދެއްވި އެވެ.
ނަމަވެސް ބައްދަލުވުމަށް އެއްވެސް މެމްބަރަކު ވަޑައިނުގެންނެވި އެވެ. އެކަމާ ގުޅިގެން މަހިންދަ ވިދާޅުވީ އިގްތިސާދީ ކާރިސާ ހައްލުކޮށް، ރައްޔިތުންނަށް ލުއި ހޯދުމަށް ފަހު ނޫނީ ސިޔާސީ ގޮތުން "ކޯޅުމަކަށް" ދެވެން ނެތް ކަމަށެވެ.
ހާލަތު ހަމައަކަށް އަޅުވަން ސަރުކާރުން މަސައްކަތް ކުރާ ކަމަށް ބުނި ނަމަވެސް، އާއްމު ރައްޔިތުންގެ ހިތްހަމަނުޖެހުން ބޮޑުވެ، މުޒާހަރާ ކުރަން ވަނީ ފަށާގަ އެވެ.
ލަންކާގެ ނޫސްތަކުން ބުނާ ގޮތުގައި ކޮންމެ ދުވަހަކު މަގުތަކުގައި މުޒާހަރާ ކުރަން ނުކުންނަ މީހުންނަކީ އެއްވެސް ސިޔާސީ ފިކުރަކާ ގުޅުމެއް ނެތް އާއްމުންނެވެ.
