ޔޫތު މިނިސްޓަރު އަހުމަދު މަހުލޫފުގެ މައްޗަށް ކުރާ ރިޝްވަތު ހިފިކަމުގެ ދައުވާގެ މައްސަލަ ޕްރޮސެކިއުޓާ ޖެނެރަލްގެ އޮފީސް (ޕީޖީ އޮފީސް) އިން ހައި ކޯޓުގައި އިސްތިއުނާފަށް ހުށަހަޅައިފި އެވެ.
މަހުލޫފްގެ މައްސަލަ މަދަނީ މިންގަނޑުން ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ކަނޑައަޅައި މައްސަލަ ބޭރުކޮށްލީ މިމަހުގެ 1 ގަ އެވެ. މައްސަލަ ބޭރުކޮށްލީ ދައުލަތުން މައްސަލައިގަ ހުށަހެޅި ހެކިތަކަކީ އެ ދައުވާ ކުރިއަށް ގެންދެވޭނެ ފަދަ ބުރަދަނެއް ނެތް ހެކިތަކެއް ކަމަށް ކަނޑައެޅުމަށްފަހު އެވެ.
ޕީޖީ އޮފީހުން ވަނީ އެ މައްސަލަ މިއަދު ހައި ކޯޓުގައި އިސްތިއުނާފް ކޮށްފަ އެވެ.
މަހުލޫފްގެ މައްޗަށް ދައުވާކުރަނީ އަށާރަވަނަ ރައްޔިތުންގެ މަޖިލީހުގެ ގަލޮޅު ދެކުނު ދައިރާގެ މެމްބަރުގެ ގޮތުގައި ހުންނަވައި އެމްއެމްޕީއާރުސީގެ ހިޔާނާތުގެ ފައިސާއިން 33،000 ޑޮލަރު (508،860ރ.) ރިޝްވަތުގެ ގޮތުގައި އޭނާ ނެންގެވިކަމަށް ބުނެ އެވެ. އެ މައްސަލައިގައި ޕީޖީން ވަނީ މަހުލޫފުގެ މައްޗަށް ރިޝްވަތު ހިފިކަމުގެ ދައުވާ އުފުލާފަ އެވެ.
މަހުލޫފަށް ދައުވާ ކުރަނީ މަޖިލީހުގެ މެމްބަރުކަމުގައި ހުންނަވައި ސްޕެޝަލް އިކޮނޮމިކް ޒޯން ބިލަށް ތާއީދުކޮށް ވޯޓު ދިނުމުގެ މުގާބިލުގައި، އޭރުގެ ޓޫރިޒަމް މިނިސްޓަރު އަހުމަދު އަދީބު، އެސްއޯއެފްގެ ނަމުގައި ބޭންކް އޮފް މޯލްޑިވްސްގައި ހުޅުވާފައިވާ އެކައުންޓުގެ ޗެކުން އޭނާއަށް ދިން 33,000 ޑޮލަރު, އޭނާގެ ނަމުގައި ބޭންކް އޮފް މޯލްޑިވްސް ގައި ހުޅުވާފައިވާ އެކައުންޓަށް ޖަމާކޮށް، ރިޝްވަތު ހިފާފައިވާ ކަމަށް ތުހުމަތުކޮށެވެ.
"މައްސަލައިގެ ޝަރީއަތެއްކޮށް ހެކީންގެ ހެކިބަސް ނެގިކަމުގައި ވިނަމަވެސް، އަދީބު، އެސްއޯއެފްގެ ނަންބަރު 000025 ޗެކު ބޭނުންކޮށްގެން ރިޝްވަތު ދިނުމުން، އަހްމަދު މަހުލޫފް ރިޝްވަތު ހިފީކަން ސާބިތުކޮށްދެވިދާނެ ފުރުސަތު އޮތް ހެކިތަކެއް ކަމަށް ބެލެވޭނެ ހެކިތަކެއް ހުށަހެޅިފައި ނެތް" އެ މައްސަލަ އާ ގުޅިގެން ބޭއްވި އަޑުއެހުމުގައި ކްރިމިނަލް ކޯޓުގެ ގާޒީ ވިދާޅުވިއެވެ.
ނަމަވެސް، ގާޒީ މުހައްމަދު މިސްބާހު އެ މައްސަލަ ބޭރުކޮށްލީ އެމްއެމްޕީއާރުސީގެ ބޮޑު ހިޔާނާތުގެ މޭސްތިރިޔާގެ ބަހަށް އެކަނި ރިއާޔަތްކޮށް ރިޝްވަތު ދިން ކަމާއި، ހިފިކަމުގެ ދައުވާ ސާބިތު ކުރެވޭނެ ވަރުގެ އިތުރު ޝަފައީ ހެއްކެއް ދައުލަތުން ހުށަހަޅާފައި ނުވާތީ އެވެ.
އޭނާ ފާހަގަކުރެއްވި ގޮތުގައި މަހުލޫފްގެ މައްސަލަ މަދަނީ މިންގަނޑުން ކުރިއަށް ނުގެންދެވޭނެ ކަމަށް ކަނޑައެޅީ ދައުލަތުން ގިނަ ގޯސްތަކެއް ހަދާފައިވާތީ އެވެ.
