މޯލްޑިވްސް އިސްލާމިކް ބޭންކް (އެމްއައިބީ)ގެ އޭޓީއެމް އެއް އޭދަފުށީގައި ހުޅުވައި، އެ ބޭންކްގެ ހިދުމަތް ބ.އަތޮޅަށް ފުޅާކޮށްފި އެވެ.
އެމްއައިބީން ބުނީ އަތޮޅުގެ ވެރިކަންކުރާ ރަށް އޭދަފުށީގައި ބެހެއްޓި އޭޓީއެމްއާއިއެކު އެ ބޭންކްގެ ހިދުމަތް ބ. އަތޮޅުގައި ފައްޓަވައިދެއްވީ އެމްއައިބީގޭ އެކްޓިން ސީއީއޯ އަހްމަދު ރިޒާ ކަމަށެވެ. އެ ބޭންކުން ބުނި ގޮތުގައި އެ ބޭންކްގެ ބ. އަތޮޅު ބްރާންޗަކީ އެމްއައިބީގެ އެހެން ބްރާންޗްތަކާއި ހިލާފަށް ޓެކްނޮލޮޖީގެ އެހީގައި ހިންގޭ ބްރާންޗަކަށްވާނެ ކަމަށެވެ. އެގޮތުން އެކި ހިދުމަތްތަކަށް އޮންލައިންކޮށް އެދުމުގެ ފުރުސަތު "އެޕްލައިނައު" ޕޯޓަލް މެދުވެރިކޮށް ވަނީ ހުޅުވާލެވިފަ އެވެ. އަދި ފައިސާ ޖަމާކޮށް ނެގުމުގެ ހިދުމަތް 24 ގަޑިއިރު ޒަމާނީ އޭޓީއެމް މެޝިނެއް މެދުވެރިކޮށް ލިބޭނެ އެވެ.
ބ. އަތޮޅުގައި އޭޓީއެމް ހުޅުވަން ބޭއްވި ރަސްމިއްޔާތުގައި އެމްއައިބީގެ ސީއީއޯ އަހްމަދު ރިޒާ ވިދާޅުވީ އެ ބޭންކުން ތައާރަފްކުރާ އާ މޮޑެލްގައި އެ ބޭންކުގެ އެކައުޓުން ފައިސާ ނެގުމާއި ބޭންކުގެ އެކައުންޓުތަކަށް ފައިސާ ޖަމާކުރުމަށް އޭދަފުށީގައި ބެހެއްޓި އޭޓީއެމް މެޝިން ބޭނުން ކުރެއްވެވޭނެ ކަމަށެވެ.
ރާއްޖޭގައި ބެހެއްޓިފައިވާ ކޮންމެ ޕީއޯއެސް މެޝިނަކުން ވެސް ބޭނުންކުރެވޭ ވިސާ ކާޑެއް ވެސް އެ ބޭންކުން ވަނީ ދާދިފަހުން ތައާރަފްކޮށްފަ އެވެ. އެއީ އެޕްލައިކުރުމާ އެކު ވަގުތުން ލިބޭ ކާޑެކެވެ.
އެމްއައިބީއިން ދަނީ ސ. ހިތަދޫ، ފުވައްމުލައް، ގދ.ތިނަދޫ، ހދ.ކުޅުދުއްފުށި އަދި ހުޅުމާލޭގެ އިތުރުން މާލޭގައި ބްރާންޗަކާއި ކަލެކްޝަން ސެންޓަރެއް ހިންގަމުންނެވެ. އަދި ރާއްޖޭގެ އެކި ކަންކޮޅުތަކުގައި 17 އޭޓީއެމް ހިންގަމުންނެވެ. ބ އަތޮޅަކީ އެމްއައިބީގެ ހިދުމަތް ދޭންފެށި ހަވަނަ އަތޮޅެވެ.
