ރިޔާދް، ސައުދީ އަރަބިއްޔާ (މާޗް 6) - ކޮވިޑާ ގުޅިގެން ސައުދީ އަރަބިއްޔާގައި އަޅާފައިވާ ގިނަ ފިޔަވަޅުތައް އުވާލަން ނިންމައިފި އެވެ.
އެގޮތުން އާއްމު ތަންތަނުގައި ގައިދުރުކަން ބެހެއްޓުމާއި، ވެކްސިން ފުރިހަމަކޮށްފައިވާ މީހުން ސައުދީއަށް އެތެރެވުމަށް ފަހު ކަރަންޓީން ވާން ޖެހޭ އުސޫލަށް ދެން އަމަލު ކުރަން ނުޖެހޭނެ އެވެ.
"މި ނިންމުމުގެ ދަށުން މިސްކިތްތައް ހިމެނޭ ގޮތަށް، އިންޑޯ އަދި އައުޓްޑޯ ހުރިހާ އާއްމު ތަނެއްގައި ވެސް ގައިދުރުކަން ބެހެއްޓުން ނިމުމަކަށް އަންނާނެ،" ސައުދީ ޕްރެސް އެޖެންސީން ބުންޏެވެ.
ހޮނިހިރު ދުވަހުން ފެށިގެން އަމަލު ކުރަމުންދާ އުސޫލުގެ ދަށުން، ބޭރު ތެރޭގައި އުޅޭ އިރު މާސްކު ވެސް އަޅާކަށް ނުޖެހޭނެ އެވެ. ނަމަވެސް އިންޑޯ ތަންތަނުގައި މާސްކު އަޅަން ޖެހޭނެ އެވެ.
އޭގެ އިތުރުން ވެކްސިން ފުރިހަމަކޮށްފައިވާ މީހުން ސައުދީއަށް އެތެރެވުމުގެ ކުރިން، ޕީސީއާރް ނުވަތަ ރެޕިޑް ޓެސްޓުގެ ނެގެޓިވް ނަތީޖާ ވެސް ދެން ހުށަހަޅާކަށް ނުޖެހޭނެ އެވެ. އަދި އެފަދަ މީހުން އެތެރެވުމަށް ފަހު ކަރަންޓީނުވާކަށް ވެސް ނުޖެހޭނެ އެވެ.
ކޮވިޑްގެ ސަބަބުން ހައްޖާއި އުމްރާގެ އަޅުކަމަށް ވަރަށް ބޮޑަށް އަސަރު ކުރި އެވެ. އަޅުކަމަށް ސައުދީ އަރަބިއްޔާއަށް އެތެރެވާ މީހުންގެ އަތުން އެ ގައުމަށް ކޮންމެ އަހަރަކު ވެސް 12 ބިލިއަން ޑޮލަރު ލިބެ އެވެ.
