ސިޑްނީ، އޮސްޓްރޭލިއާ (މާޗް 6) - ފާއިތުވި ހަފްތާގައި ބޯކޮށް ވާރޭ ވެހި ފެންބޮޑުވުމުގެ ސަބަބުން ބޮޑެތި ގެއްލުންތަކެއް ލިބިފައިވާ އޮސްޓްރޭލިއާގެ ހިސާބުތަކަށް މި ހަފްތާގައި ވެސް މޫސުން އިތުރަށް ގޯސް ވާނެ ކަމަށް ލަފާކޮށްފި އެވެ.
ގައުމީ މޫސުމާ ބެހޭ ބިޔުރޯއިން އިންޒާރު ދިން ގޮތުގައި ކުއީންސްލޭންޑް ސްޓޭޓަށް ބޯކޮށް ވާރޭ ވެހި ފެންބޮޑުވާނެ ކަމަށް ބެލެވޭ އިރު، ވިދައި ގުގުރުން ވެސް އެކަށީގެންވެ އެވެ. މޫސުން ގޯސްވުމުގެ ސަބަބުން ފާއިތުވި ހަފްތާގައި އެ ސްޓޭޓުން 11 މީހުން މަރުވި އެވެ.
ގާތްގަނޑަކަށް 2.6 މިލިއަން މީހުން ދިރިއުޅޭ ބްރިޒްބޭން ސިޓީގައި ކުއްލިއަކަށް ފެންބޮޑުވުމުގެ ފުރުސަތު އެބަ އޮތް ކަމަށް މޫސުމާ ބެހޭ ބިޔުރޯއިން ބުނެ އެވެ.
ދެކުނުގައި އޮންނަ ނިއު ސައުތު ވޭލްސްއަށް ވެސް ބޯކޮށް ވާރޭ ވެހި، އާދަޔާ ހިލާފަށް ވައި ގަދަ ވާނެ ކަމަށް ވަނީ ލަފާކޮށްފަ އެވެ. މިދިޔަ ހަފްތާގައި ފެންބޮޑުވުމުން، ފުރާނަ ސަލާމަތް ކުރަން ގިނަ ބަޔަކު ގެތަކު ފުރާޅު މައްޗަށް އަރަން ޖެހުނު ލިޒްމޯ އަވަށަށް ވެސް އެލާޓް ނެރިފައިވެ އެވެ.
ފެންބޮޑުވުމުގެ ސަބަބުން ނިއު ސައުތު ވޭލްސްއިން މަރުވި މީހުން އަދަދު ވަނީ ފަހަކަށް އިތުރުވެފަ އެވެ. އެންމެ ފަހުން މީހެއްގެ ހަށިގަނޑު ފެނުނީ ހޮނިހިރު ދުވަހުގެ ހަވީރު އެވެ.
ހާލުގައި ޖެހިފައިވާ މީހުންނަށް އެހީވުމަށް ފުލުހުންނާއި، ސިފައިން އަދި އެމެޖެންސީ ހިދުމަތްތަކުން އެކަށީގެންވާ މަސައްކަތް ނުކުރާ ކަމަށް ބުނެ ގިނަ ބަޔަކު ދަނީ ސޯޝަލް މީޑިއާގައި ޝަކުވާ ކުރަމުންނެވެ.
އެހެން ނަމަވެސް ޑިފެންސް މިނިސްޓަރު ޕީޓާ ޑަޓަން ވިދާޅުވީ ސިފައިން ކުރަމުންދާ މަސައްކަތާ މެދު ހިތްހަމަޖެހޭ ކަމަށާއި ފާޑުކިޔާނެ ޖާގައެއް ނެތް ކަމަށެވެ.
ސައިންސްވެރިން ބުނާ ގޮތުގައި އޮސްޓްރޭލިއާއަށް ދިމާވާ ފެންބޮޑުވުމުގެ މައްސަލަ އާއި ޖަންގަލީގައި ރޯވުމުގެ މައްސަލަ އާއި ތޫފާންތަކާއި ވާރޭ ނުވެހުމުގެ މައްސަލަ އަހަރަކަށް ވުރެ އަހަރެއް ގޯސްވަމުން ދަނީ މޫސުމީ ބަދަލުގެ ސަބަބުންނެވެ.
