ޝަހްސުއޮޅުވާލައިގެން ފޮތްފޮށިގަނޑެއް ތެރޭ ޑްރަގް އެތެރެކުރަން އުޅުނު ކަމުގެ ތުހުމަތުވާ މައްސަލައެއްގައި، ކަސްޓަމަށް ހެދުނު ކުޑަ ގޯހަކާ ހެދި ކުށް ސާބިތު ނުވާ ކަމަށް ކްރިމިނަލް ކޯޓުން މިދިޔަ ބުރާސްފަތި ދުވަހު ކަނޑައަޅައިފި އެވެ.
އަންހެނަކަށް ވެގެން، ސ. ހިތަދޫ، ދުގެތިމާގެ، އަލީ އަކްބަރު ހަސަން 198 ގްރާމްގެ ޑްރަގް އެތެރެކުރަން އުޅުނު ކަމަށް ބުނެ ދައުލަތުން ދައުވާ އުފުލީ މިދިޔަ އަހަރުގެ ތެރޭގަ އެވެ. އޭނާ އަތުލައިގަތީ ހަލީމަތު އުލްފާ ކަމަށް ހެދިގެން ޑީއެޗްއެލް މެދުވެރިކޮށް ގެނައި ޕާރުސަލެއްގައި ޝައްކުކުރެވޭ އެއްޗެއްހުރިކަން ކަސްޓަމަށް ފާހަގަވުމުން، އެކަން ފުލުހުންނަށް އެންގުމަށްފަހު ކުރިއަށް ގެންދިޔަ ކޮންޓްރޯލް ޑެލިވަރީ އޮޕަރޭޝަންގެ ތެރެއިންނެވެ.
ނަމަވެސް ކްރިމިނަލް ކޯޓުން އެ މައްސަލަ ސާބިތުނުވާ ކަމަށް ކަނޑައެޅީ މަސްތުވާތަކެތީގެ ގާނޫނާ ހިލާފަށް، ޑްރަގް ކަމަށް ޝައްކުކުރެވޭ ޕާރުސަލް ކެނޑުމަށްފަހު، އެތަކެތި ފުލުހާ ހަވާލުނުކޮށް، އެ އިދާރާގައި ގިނަ ދުވަސްތަކެއް ވަންދެން ބަހައްޓާފައި ހުރުމުންނެވެ.
"މި މައްސަލާގައި ފެނިފައިވާ ތަކެތި ފަސޭހައިން އެއް ތަނަށް އަނެއް ތަނަށް ގެންދެވޭފަދަ ގޮތަކަށް އޮތްއިރުވެސް، އެތަކެތި 04 މާރިޗު 2021 ވަނަ ދުވަހުން ފެށިގެން 09 މާރިޗު 2021 ވަނަ ދުވަހާ ހަމައަށް މޯލްޑިވްސް ކަސްޓަމްސް ސަރވިސްގެ ބެލުމުގައި ދަށުގައި ބަހައްޓާފައި ހުރީ،" އެއީ މަސްތުވާތަކެއްޗާ ބެހޭ މައްސަލަތަކުގައި ހެކީގެ ގޮތުގައި ހިފެހެއްޓޭ އެއްޗެއްސާމެދު އަމަލުކުރާނެ ގޮތުގެ ގަވާއިދުގައި ކަނޑައެޅިފައިވާ އުސޫލުތަކާ ހިލާފު އަމަލެއް ކަމަށް ގާޒީ ހުކުމުގައި ބަޔާންކޮށްފައި ވެއެވެ.
ގާޒީ ގަބޫލުކުރައްވާ ގޮތުގައި އެއްތަނުން އަނެއްތަނަށް ފަސޭހަކަމާ އެކު އުފުލޭނެ، އެފަދަ އެއްޗެއް ފެނިއްޖެ ނަމަ، ލަސްނުކޮށް ފުލުހާ ހަވާލުކުރުމަށް ގާނޫނުގައި ކަނޑައެޅިގެން ބަޔާންކޮށްފައި އޮންނާނީ، ތަހުލީލު ކުރެވޭ ތަކެތީގެ ސައްހަކަން ދެމެހެއްޓުމަށެވެ.
ޑްރަގް ޕެކެޓު ބެހެއްޓި ކަސްޓަމްސްގެ ޑިޓެންޝަން ކޮޓަރީގައި ސީސީޓީވީ ކެމެރާ ހުންނަ ކަމަށާއި، އެތަނަށް ވަދެ ނުކުންނަ މީހުންގެ ލިސްޓު ބެލެހެއްޓޭ ކަމަށް ޝަރީއަތުގައި ބުނި ނަމަވެސް, އެއިން އެއްވެސް އެއްޗެއް ހެކީގެ ގޮތުގައި ހުށަހަޅާފައި ނުވާކަން ގާޒީ ފާހަގަކުރެއްވި އެވެ. އެހެންވެ، އެ ގޯސް ރަނގަޅު ކުރެވޭނެ ގޮތެއް ނެތް ކަމަށް ގާޒީ ނިންމަވާ އެ ދައުވާ ސާބިތު ނުވާ ކަމަށް ކަނޑައެޅުއްވި އެވެ.
"...ސެކިއާޑް [ރައްކާތެރި] ލޮކޭޝަނަކަށް މިތަކެތި ގެންދިޔުމަށް ތައްޔަރުކުރެވުނު ލިޔެކިޔުންތަކާއި، ލޮކަރު ބަހައްޓާފައިވާ ތަނުގެ ސީސީޓީވީ ފޫޓޭޖް ނުވަތަ ފޮޓޯ އާއި ތަކެތި ބަހައްޓާފައިވާ ލޮކަރާއި ރޫމްގެ ސްޓޭންޑާޑް އެނގޭނެ ލިޔެކިޔުން ހުށަހަޅާފައިވާނަމަ ނުވަތަ ލޮކަރާއި ލޮކަރު ބަހައްޓާފައިވާ ރޫމް ރަނގަޅަށް ސާފުވާނެގޮތަށް އަދި ސިފަކޮށްދެވޭނެ ގޮތަށް ހެކިންގެ ހެކިބަސް ލިބުނުނަމަ،" އެފަދަ ހެއްކެއް ހުށަހެޅި ނަމަ، ދައުލަތަށް ހެދުނު ގޯސް ރަނގަޅު ކުރެވި ޝައްކުތައް ސާފުކޮށްދެވިދާނެ ކަމަށް ގާޒީ ދެކިވަޑައިގަތެވެ.
އަކްބަރުގެ މައްޗަށް އުފުލި ޝަހްސު އޮޅުވާލުމުގެ ދައުވާއިން ވެސް އޭނާ ސަލާމަތްވީ މަސްތުވާތަކެތި އެތެރެކުރުމުގެ ދައުވާ ސާބިތު ނުކުރެވުމާ އެކު އެވެ. އެއީ އޭނާގެ މައްޗަށް ދައުލަތުން އުފުލިދެ ދައުވާއަށް ވެސް އެއް ހެކިތަކެއް ހުށަހަޅާފައިވުމުންނެވެ. އަދި ހަލީމަތު އުލްފާ ކަމަށް ހެދިގެން އޭނާ އުޅުމުގެ ސަބަބުން އެހެން މީހަކަށް ލިބޭނެ ގެއްލުމެއް ވެސް ދައުލަތަކަށް ކިޔައިދެވިފައި ނުވާކަން ހުކުމުން އެނގެން އޮވެއެވެ.
