ޕެރިސް (މާޗް 6) - ފްރެންޗް ލީގުގައި ރޭ އަމިއްލަ ދަނޑުގައި ކުޅުނު ނީސް އިން ފަހު ވަގުތު ގޯލު ޖަހައި 1-0 އިން ޕީއެސްޖީ ބަލިކޮށްފި އެވެ.
ރޭގެ މޮޅާ އެކު ނީސް ވަނީ ދެ ވަނަ އަށް ޖެހިލައި، އެއް ވަނައިގައި އޮތް ޕީއެސްޖީގެ ލީޑު 13 ޕޮއިންޓަށް ކުޑަކޮށްފަ އެވެ. ޕީއެސްޖީ އެއް ވަނައިގައި އޮތީ 27 މެޗުން 62 ޕޮއިންޓާ އެކު އެވެ. ދެ ވަނައިގައި އޮތް ނީސް އަށް 27 މެޗުން ހަމަވީ 49 ޕޮއިންޓެވެ. ތިން ވަނައިގައި އޮތް މާސޭ އަށް 26 މެޗުން ވަނީ 47 ޕޮއިންޓް ލިބިފަ އެވެ. މެޗު ހަމަކުރާއިރު،. މޮޅުވެގެން މާސޭ އަށް ދެ ވަނަ އަށް އެރޭނެ އެވެ.
މެޗުގެ އަށް ވަނަ މިނިޓްގައި ޕީއެސްޖީގެ އެންހެލް ޑި މާރިއާ އަށް ކައުންޓަ އެޓޭކެއްގައި ގޯލު ޖަހަން ލިބުނު ފުރުސަތެއްގައި ފޮނުވާލި ބޯޅަ ދިޔައީ އަރިމަތިން ބޭރުންނެވެ. ޕީއެސްޖީގެ ލިއޮނަލް މެސީ އާއި ނޭމާ އަށް ލިބޭ ބޯޅަތަކުގައި ނީސް އިން ދިޔައީ އެ ދެ ކުޅުންތެރިންނަށް މާ ބޮޑު ޖާގައެއް ނުދީ ޑިފެންސްކުރަމުންނެވެ. އެހެންވެ، ނީސްގެ ގޯލާ އަމާޒުކޮށް މެސީ އާއި ނޭމާ އަށް ވެސް މާ ނުރައްކާ ހަމަލާއެއް ފޮނުވާނުލެވުނެވެ.
ޕީއެސްޖީގެ އެޓޭކުގައި ރޭ އެންމެ ބޮޑަށް ދިމާވި މައްސަލަ އަކީ އެ ޓީމަށް މި ސީޒަނުގައި އެންމެ ގިނަ ގޯލު ޖެހި ކީލިއަން އެމްބާޕޭ ނެތުމެވެ. ސަސްޕެންޝަންގެ ސަބަބުން އެމްބާޕޭގެ ރޭގެ މެޗުގައި ނުކުޅެ އެވެ.
ނީސް މޮޅުވި ގޯލު ޖެހީ މެޗު ނިމެން ދެ މިނިޓަށް ވެފައި ހުއްޓައި އެންޑީ ޑެލޯޓް އެވެ. މެޗުގެ 88 ވަަނަ މިނިޓްގައި ކެލްވިން ސްޓެންގް ނެގި ހުރަހަކުން ޑެލޯޓް ޖެހި ބޯޅަ އަމާޒުވީ ގޯލުގެ މަތީދާގަނޑަށެވެ. މި ގޯލާ އެކު ނީސް މޮޅުވިއިރު، މިއީ ލީގުގައި ޕީއެސްޖީއާ ދެކޮޅަށް އެންމެ ފަހުން ކުޅުނު 18 މެޗުގެ ތެރެއިން ނީސް އަށް ލިބުނު ދެ ވަނަ މޮޅެވެ.
ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނީ މިއީ ހަގީގަތުގައި ދަށްކޮށް ކުޅެވުނު މެޗެއް ކަމަށާއި އެކަމަކު މެޗުން ބަލިވުމަކީ ވެސް އެންމެ އިންސާފުވެރި ނަތީޖާ ކަމަށް ބުނެވެން ނެތް ކަމަށެވެ.
ނީސްގެ ކޯޗު ކްރިސްޓޮފް ގަލްޓިއޭ ބުނީ ޕީއެސްޖީ ކަހަލަ ޓީމެއް އަތުން ލީގު ސީޒަނެއްގެ ދެ މެޗުން ހަތަރު ޕޮއިންޓް ހޯދުމަކީ ފަސޭހަކަމެއް ނޫން ކަމަށާއި ނީސް އިން އެކަން ހާސިލްކުރީ ވިސްނުންތެރިކަމާ އެކު ޓީމެއްގެ ގޮތުގައި ކުރި މަސައްކަތުން ކަމަށެވެ.
