މި މަހު 17 ވަނަ ދުވަހު މާލޭގައި ބާއްވާ މޯލްޑިވްސް ސްޕޯޓްސް އެވޯޑްސް ހަފްލާ އަށް ސްޕެއިނުގެ ފުޓްބޯޅަ ލެޖެންޑް މިކޭލް ސަލްގާޑޯ އާއި ސްވިޑެންގެ ކާމިޔާބު ފެތުންތެރިޔާ ސާރާ ހޮޔޯސްޓްރޯމް ރާއްޖެ އަންނަ ގޮތަށް ހަމަޖެހިއްޖެ އެވެ.
ސަލްގާޑޯ އާއި ސާރާ ރާއްޖެ އަންނަން ހަމަޖެހިފައިވާކަން އިއުލާނުކުރެއްވީ ކުޅިވަރާ ބެހޭ ވަޒީރު އަހުމަދު މަހުލޫފް އެވެ. މިނިސްޓަރު މަހުލޫފްގެ ދައުވަތު ގަބޫލުކޮށް ސާރާ ބުނެފައިވަނީ އޭނާގެ ލޯބިވެރިޔާ ޔޮހާންއާ އެކު ރާއްޖެ އަންނަން ކެތްމަދުވެފައިވާ ކަމަށާއި ސްޕޯޓްސް އެވޯޑްސް ހަފްލާގައި ބައިވެރިވެވޭތީ ވަރަށް އުފަލުން ހުރި ކަމަށެވެ.
އުމުރުން 28 އަހަރުގެ ސާރާ ވަނީ އޮލިމްޕިކްސް އާއި ވޯލްޑް ޗެމްޕިއަންޝިޕް އަދި ޔޫރަޕިއަން ޗެމްޕިއަންޝިޕްގައި ގިނަ ކާމިޔާބީތަކެއް ހޯދައިފަ އެވެ. އެ ގޮތުން 14 ރަން މެޑަލް ވޯލްޑް ޗެމްޕިއަންޝިޕްގައި ހޯދިއިރު، ޔޫރަޕިއަން ޗެމްޕިއަންޝިޕްގައި 26 ރަން މެޑަލް ހޯދި އެވެ. މީގެ އިތުރުން ސާރާ އަކީ ފަސް އިވެންޓެއްގެ ދުނިޔޭގެ ރެކޯޑް ހޯލްޑަރެވެ.
ސާރާ އަތުގައި އޮތް ރެކޯޑްތަކަށް ބަލާއިރު، ލޯންގް ކޯސްގެ 50 މީޓަރާއި 100 މީޓަރުގެ ފްރީސްޓައިލާއި ބަޓަފްލައި އިވެންޓްތައް ހިމެނެ އެވެ. އޭގެ އިތުރުން 4 ގުނަ 50 މީޓަރުގެ ޝޯޓް ކޯސް މެޑްލީ ރިލޭ އިވެންޓްގައި ވެސް ރެކޯޑް އޮތީ ސާރާ އަތުގަ އެވެ.
ގިނަ ފަހަރުތަކެއް މަތިން ރާއްޖެ އައިސްފައިވާ ސަލްގާޑޯ އަކީ ހަ އަހަރުގެ ކޮންޓްރެކްޓެއްގައި އެފްއޭއެމްގެ ފުޓްބޯޅަ ސްކޫލް ޕްރޮޖެކްޓާ ހަވާލުވެފައިވާ ފަރާތެވެ. ރެއާލް މެޑްރިޑާއި ސްޕެއިނުގެ ފުޓްބޯޅައިގައި މަގުބޫލު ސަލްގާޑޯ އަކީ ފީފާގެ އެމްބަސަޑަރެކެވެ. އަދި އޭނާ ވަނީ ރެއާލް މެޑްރިޑާ އެކު ކްލަބް ފުޓްބޯޅައިގައި އެއް ކްލަބެއްގައި ހުރެގެން ހޯދޭނެ ބޮޑެތި ހުރިހާ ކާމިޔާބެއް ހޯދައިފަ އެވެ. އެ ގޮތުން ޗެމްޕިއަންސް ލީގާއި ޔުއެފާ ސުޕަ ކަޕް ކާމިޔާބު ކުރި އެވެ.
ކުޅިވަރު އެކުވެނި އެއް ނަމްބަރު ދަނޑުގައި ބާއްވާ ގައުމީ ސްޕޯޓްސް އެވޯޑްސް ހަފްލާ އަށް ރާއްޖޭން ބޭރުން ދުނިޔޭގެ މަޝްހޫރު ކުޅިވަރު ގިނަ ލެޖެންޑުންތަކެއް އަންނަ ގޮތަށް ވަނީ ހަމަޖެހިފަ އެވެ. މިއީ މި އެވޯޑްގެ ހައިބަތު ބޮޑުކޮށް ދުނިޔޭގެ ސަމާލުކަން ލިބޭ އިވެންޓަކަށް ހެދުމާއި ދިވެހި ކުޅިވަރުގެ އަގުވަޒަންކުރުން އެންމެ ފުރިހަމަ އަށް ގެންދިއުމަށް ޔޫތު މިނިސްޓްރީ ރާވާ އިިވެންޓެކެވެ.
މޯލްޑިވްސް ސްޕޯޓްސް އެވޯޑަށް ރާއްޖެ އަންނަ މަޝްހޫރު ފަރާތްތައް ރާއްޖޭގައި ތިބޭނީ އެވޯޑްސްގެ ހޮސްޕިޓާލިޓީ ޕާޓްނަރު، ކްރޮސްރޯޑްސްގަ އެވެ. މި އެވޯޑްގެ އޮންލައިން މީޑިއާ ޕާޓްނަރަކީ "އަދަދު" އެވެ.
