ރަޝިއާ އިން ޔޫކްރެއިނަށް އަރައި ކުރަމުންދާ ހަނގުރާމަ އާ ގުޅިގެން ހުއްޓުމެއް ނެތި ދުނިޔޭގެ ބާޒާރުގައި ތެލުގެ އަގު އުފުލެމުންދާތީ ރާއްޖޭގައި ވެސް ތެލުގެ އަގު ބޮޑުކުރީ އިއްޔެ އެވެ.

އެންމެ ގިނައިން ރާއްޖެ އަށް ތެޔޮ އެތެރެކުރާ، އެސްޓީއޯއިން އިއްޔެ އާންމުކުރި ބަޔާނެއްގައި ބުނެފައި ވަނީ އެ ކުންފުނީގެ ސަބްސިޑިއާރީ ކުންފުނި، ފިއުލް ސަޕްލައި މޯލްޑިވްސް (އެފްއެސްއެމް) ގެ ޝެޑްތަކުން އިއްޔެ އިން ފެށިގެން ޕެޓްރޯލް ލީޓަރެއް ވިއްކަނީ 14.60ރ. އަށް ކަމަށާއި ޑީސަލް ލީޓަރެއް 14.80ރ. އަށެވެ.

ކުރިން ޕެޓްރޯލް ލީޓަރެއް 12.06ރ. ވިއްކަމުން ދިޔައިރު، ޑީސަލް ލީޓަރެއް ވިއްކީ 12.44 ރ. އަށެވެ. އެހެންކަމުން މިއީ މިއީ ޕެޓްރޯލް ލީޓަރަކުން 2.54ރ.، ޑީސަލް ލީޓަރަކުން 2.36ރ. ގެ ބޮޑުވުމެކެވެ.

"ދުނިޔޭގެ ބާޒާރުގައި ތެލުގެ އަގު ހިފެހެއްޓުމުގެ ނެތި އުފުލެމުން ދަނިކޮށް، ފެބްރުއަރީ މަހު ފަހުކޮޅު ރަޝިޔާ އާއި ޔޫކްރެއިންއާ ދެމެދު ހިނގަން ފެށި ހަނގުރާމައާ ގުޅިގެން ތެލުގެ ތެލުގެ އަގު މައްޗަށްދާ ނިސްބަތް ވަނީ އިތުރަށް ހަލުވިވެފަ،" އެސްޓީއޯ އިން އިއްޔެ ބުނެފައިވެ އެވެ.

އެންމެ ފަހުން އެސްޓީއޯއިން ތެލުގެ އަގު ބޮޑުކުރީ ޖެނުއަރީ 21 ގަ އެވެ. އެފަހަރު ޕެޓްރޯލް ލީޓަރެއް ވިއްކީ 12.06ރ. އަށެވެ. އަދި ޑީސަލް ލީޓަރެއްގެ އަގު ބޮޑުވީ 12.44ރ. އަށެވެ.

އޭގެ ކުރިން އެ ކުންފިނިން ތެލުގެ އަގު ބޮޑުކުރީ މިދިޔަ އޮކްޓޯބަރު މަސް ތެރޭގަ އެވެ. އެފަހަރު އަގަށް ގެނައި ބަދަލާއެކު، ޝެޑްތަކުން ޕެޓްރޯލް ލީޓަރެއް ވިއްކަމުން ދިޔައީ 11.16ރ. އަށެވެ. އަދި ޑީސަލް ލީޑަރެއް 11.84ރ. އަށެވެ.

އެހެންކަމުން މިދިޔަ އަހަރުގެ އޮކްޓޯބަރު މަހާ އަޅާބަލާއިރު ޕެޓްރޯލް ލީޓަރެއްގެ އަގު ވަނީ ގާތްގަނޑަކަށް 24 އިންސައްތަ އުފުލިފަ އެވެ.

ބައެއް މުހިންމު ހަބަރުތައް

• ޓޫރިޒަމް ޑިވެލޮޕްމަންޓު ފަންޑު ޑުބާއީގައި ރަޖިސްޓްރީ ކުރުމުގެ މަސައްކަތް ފަށާފައިވާ ކަމަށް މޯލްޑިވްސް ފަންޑް މެނޭޖްމަންޓް ކޯޕަރޭޝަނުން ހާމަކުރީ އިއްޔެ އެވެ.

• ރާއްޖޭގައި ފަޅު ރަށެއް ވަރުވާއަށް ދޭ އެންމެ ދިގު މުއްދަތު ފަސް އަހަރު ދުވަހުން 10 އަހަރު ދުވަހަށް އިތުރުކޮށް, ރަށް ނަގަން ޖެހިއްޖެ ހާލަތެއްގައި ސަރުކާރުން ބަދަލުދޭން ނުޖެހޭނެ ކަމަށް ކަނޑައަޅައި ރާއްޖޭގެ ފަޅުރަށްރަށާއި ބެހޭ ގަވާއިދަށް ފިޝަރީޒް މިނިސްޓްރީ އިން އިސްލާހު ގެނައީ އިއްޔެ އެވެ.

• ދިވެހި ފުލުހުންގެ ހިދުމަތުގެ އިސްވެރިން އެމެރިކާގެ ފެޑަރަލް ބިއުރޯ އޮފް އިންވެސްޓިގޭޝަން (އެފްބީއައި) ގެ ކައުންޓަޓެރަރިޒަމް، ބައިނަލްއަގްވާމީ އޮޕަރޭޝަންސް ޑިވިޝަންތަކާ ބައްދަލުކުރީ އިއްޔެ އެވެ.

ދުވަހުގެ ކޯޓޭޝަން

ތަރައްގީގައި ކުރިއަށް ދިއުމަށްޓަކައި ދިގު ރާސްތާގެ ތަރައްގީގެ ޕްލޭނެއް ރާއްޖެ އަށް ބޭނުންވާ ކަމަށް ހާމަކުރައްވަމުން އދ. އިން ރާއްޖެ އަށް ކަނޑައަޅާފައި ހުންނަވާ ރެސިޑެންޓް ކޯޑިނޭޓާ ކެތަރިން ހެޒްވެލް "އަދަދު" އަށް ދެއްވި އިންޓަވިއުއެއްގައި ވިދާޅުވީ:

"ތަކުރާރުކޮށް މި ދައްކާ ވާހަކަ އަކީ، އުމުރާނީ ވަސީލަތްތަކަށް ވުރެ މުހިންމީ މީހުން ބިނާ ކުރުމޭ، ތަރައްގީ ވާނީ މީހުން ކުރިއަރައިގެން، ދިގު ރާސްތާގެ ޕްލޭނެއް އެބަ އޮންނަން ޖެހޭ، އެހެން ކަންކަމުގެ ކުރިއަށް އެ ޕްލޭން އެބަ ނެރެން ޖެހޭ،"

ދުވަހުގެ ފޮޓޯ

ގައުމީ ފުޓްސަލް ޓީމުގެ ޕްރެކްޓިހުގެ ތެރެއިން. އޭއެފްސީ ފުޓްސަލް އޭޝިއަން ކަޕްގެ ކޮލިފައިންގައި އަންނަ މަހު ވާދަކުރުމުގެ ކުރިން މި މަހު ތައިލެންޑްގައި ބާއްވާ އިންވިޓޭޝަނަލް ކަޕެއްގައި ރާއްޖޭގެ ޓީމުން ކުޅޭނެ. މި މުބާރާތުގައި ތައިިލެންޑާއި ރާއްޖޭގެ އިތުރުން ދެން ގްރޫޕް އޭގައި ހިމެނެނީ އޮމާން -- ފޮޓޯ: އަބްދުﷲ ޔަޝާއު

ދިރާސާތަކުން ކިޔާލުމަށް

"އިމްޕެކްޓް އޮފް ކޮވިޑް-19 އޮން ޕާސަންސް ވިތު ޑިސްއެބިލިޓީސް އިން މޯލްޑިވްސް"

މިއީ މާޗް 2020 ގައި ޑަބްލިއުއެޗްއޯ އިން އިއުލާންކުރި ކޮވިޑް-19 ޕެންޑެމިކާއެކު ރާއްޖޭގައި ދިރިއުޅޭ ނުކުޅެދުންތެރިކަން ހުންނަ ފަރާތްތަކަށް ކޮށްފައިވާ އަސަރުތައް ދެނެގަތުމަށް އެ ޖަމްއިއްޔާއިން ކޮށްފައިވާ ދިރާސާއެކެވެ.