ބެއިިޖިން، ޗައިނާ (މާޗް 5) - ރަޝިއާ އާއި ޔޫކްރެއިނާ ދެމެދު ކުރަމުން އަންނަ ހަނގުރާމައިގައި ޔޫކްރެއިނަށް ސަޕޯޓް ދައްކުވައިދޭން އިނގިރޭސި ޕްރިމިއާ ލީގުގެ ކްލަބްތަކުން މި ހަފްތާގެ މެޗުތަކުގައި ހަރަކާތްތަކެއް ކުރިއަށްގެންދާތީ ޗައިނާގައި މެޗުތައް ނުދައްކަން ނިންމައިފި އެވެ.
މިދިޔަ މަހު 24 ވަނަ ދުވަހުން ފެށިގެން ރަޝިއާގެ ސިފައިން ޔޫކްރެއިނަށް އަރައި އަންނަނީ ހަނގުރާމަ ކުރަމުންނެވެ. އެ މައްސަލައިގައި ބައިނަލްއަގުވާމީ އެކިއެކި މައިދާނުގައި ރަޝިއާއާ ދެކޮޅު ހަރަކާތްތައް ބާއްވާއިރު، ޔޫކްރެއިނަށް ސަޕޯޓް ވެސް އަންނަނީ ދެމުންނެވެ. އެ ގޮތުން މި ހަފްތާގެ އިނގިރޭސި ޕްރިމިއާ ލީގުގެ 10 މެޗުގައި ވެސް ޔޫކްރެއިނަށް ސަޕޯޓް އޮތްކަން ދައްކުވައިދީ ހަރަކާތްތަކެއް އޮންނާނެ އެވެ.
އެ ގޮތުން ކޮންމެ މެޗެއް ފެށުމުގެ ކުރިން ސުކޫތެއް ގެނައުމުގެ އިތުރުން ކޮންމެ ޓީމެއްގެ ކެޕްޓަން ބޭންޑްގެ ކުލަތައް ހުންނާނީ ޔޫކްރެއިން ދިދައިގެ ކުލަތަކަށް ހާއްސަކޮށްފަ އެވެ.
ރަޝިއާ އާއި ޗައިނާ އަކީ ޑިޕްލޮމެޓިކް ގޮތުން އެކުވެރި ދެ ގައުމެވެ. މިދިޔަ މަހު ރަޝިއާގެ ރައީސް ލަޑިމިއޭ ޕުޓިން ވަނީ ޗައިނާ އަށް ވަޑައިގެން އެ ގައުމުގެ ރައީސް ޝީ ޖިންޕިންއާ ބައްދަލުކުރައްވައިފަ އެވެ. ޗައިނާ އާއި ރަޝިއާގެ ގުޅުން ބަދަހިވަނީ އެމެރިކާގެ ނުފޫޒާ ދެކޮޅަށް ނުކުތުމަށެވެ.
ރަޝިއާ އަށް އޮތް ސަޕޯޓް ދައްކުވައިދޭން ޗައިނާގައި މި ހަފްތާގެ ޕްރިމިއާ ލީގުގެ މެޗުތައް ނުދައްކަން އެންގީ ޗައިނާ ސަރުކާރުންނެވެ. ފުރަތަމަ ނިންމީ ޓީވީ ބްރޯޑްކާސްޓަރުން މެޗުތައް ނުދައްކާގޮތަށެވެ. ފަހުން ވަނީ އޮންލައިން ސްޓްރީމިން ޕްލެޓްފޯމްތަކުގައި ވެސް މެޗުތައް ދެއްކުން މަނާކޮށްފަ އެވެ.
އިއްޔެ ޗައިނާގައި ފެށި ވިންޓަ ޕެރަލިމްޕިކްސްގެ ހުޅުވުމުގެ ރަސްމިއްޔާތުގައި ދުނިޔޭގެ ޕެރަލިމްޕިކް ކޮމިޓީގެ ރައީސް އެންޑްރޫ ޕާސަން ދެއްކެވި ވާހަކައިގައި ރަޝިއާ އިން ކުރާ ހަނގުރާމަ ކުށްވެރިކޮށް ދެއްކި ވާހަކައިގައި ޗައިނާގެ އެންމެ ނުފޫޒުގަދަ ޗެނަލް، ސީސީޓީވީން ނިންމީ ތަރުޖަމާނުކުރާށެވެ.
މީގެ ކުރިން ވެސް ޕްރިމިއާ ލީގާއި ޗައިނާގެ ބްރޯޑްކާސްޓަރުންގެ މެދުގައި ވަނީ މައްސަލަތަކެއް ޖެހިފަ އެވެ. އެ ގޮތުން 2020 ވަނަ އަަހަރު ކޮވިޑްގެ ތެރޭގައި ޗައިނާގެ ޕީޕީޓީވީން ޕްރިމިއާ ލީގަށް ދައްކަން ޖެހޭ 212 މިލިއަން ޑޮލަރު ދޭން ދެކޮޅު ހެދި އެވެ. އަދި އޭގެ ކުރިން 2019 ވަނަ އަހަރު އާސެނަލަށް ކުރިން ކުޅުނު ޖަރުމަނުގެ މިޑްފީލްޑަރު ޗައިނާގެ މުސްލިމް ކޮމިއުނިޓީ، އުއިގޫރު މުސްލިމުންނަށް ސަޕޯޓް އޮތްކަން ދައްކުވައިދީ ވާހަކަ ދައްކަން ފެށުމުން އޮޒިލް އާއި އާސެނަލް ކުޅޭ މެޗުތައް ޗައިނާގައި އެޅުވުން މަނާކުރި އެވެ. އަދި އޮޒިލްގެ ނަން ޗައިނާގެ ގޭމްތަކުން ވެސް އުނިކުރި އެވެ.
