އުރީދޫ ދިވެހި ޕްރިމިއާ ލީގުގައި މިރޭ ކްލަބް ގްރީން ސްޓްރީޓްސް 0-1 ބަލިކޮށް ސުޕަ ޔުނައިޓެޑް ސްޕޯޓްސް (ސަސް) އިން ލީގުގައި ފުރަތަމަ މޮޅު ހޯދައިފި އެވެ.
މީގެ ކުރިން ކުޅުނު ތިން މެޗުން ވެސް ބަލިވެފައިވާ ސަސް ވަނީ ގްރީން ސްޓްރީޓްސް އަތުން މޮޅުވެ، އެ ޓީމުގެ ފުރަތަމަ ތިން ޕޮއިންޓާ އެކު ތާވަލްގެ ފުލުން ކުރިއަށް ޖެހިލައިފަ އެވެ. މިރޭގެ މޮޅާ އެކު އެ ޓީމު އޮތީ ޓީސީއާ ދަ ގްރާންޑޭ އަށް ވުރެ ކުރިއަށް ޖެހި ތާވަލުގެ ހަ ވަނައިގަ އެވެ. ސަސް އަތުން ބަލިވުމުން، ގްރީން ސްޓްރީޓްސް އަށް ލީގުގެ ތިން ވަނަ އަށް ޖެހިލަން ލިބުނު ފުރުސަތު ވަނީ ގެއްލިފަ އެވެ. ގްރީން ސްޓްރީޓްސް އޮތީ ހަތަރު ޕޮއިންޓާ އެކު ތާވަލްގެ ފަސް ވަނައިގަ އެވެ.
މި މެޗަަށް ގްރީން ސްޓްރީޓްސް ނުކުތްއިރު އެ ޓީމުން ވަނީ ޓީމުގެ ފުރަތަމަ އެގާރައަށް ދެ ބަދަލު ގެނެސްފަ އެވެ. އާންމުކޮށް އެގާރައިގައި ކުޅޭ ބިދޭސީ ފޯވާޑް އަވީލާ އާއި އަންސަރު އިބްރާހިމް (އަންކޮ)ގެ ބަދަލުގައި ކުޅެން ނެރުނީ މުހައްމަދު ފަރުހާން (ފަރުއްކޮ) އާއި ފަރުހާދު އިސްމާއިލް (ފަރޭ) އެވެ.
މެޗުގެ ފުރަތަމަ ގޯލެއް ޖަހަން ރަނގަޅު ފުރުސަތެއް ތަަަނަވަސްކުރީ ސަސް އިންނެވެ. އަހުނަފް ރަޝީދު (އަހުއްކޮ) އަރިމަތިން ގްރީން ސްޓްރީޓްސްގެ އަލީ ޝާމިސް (ތޮއްޕޭ) ކައިރިން ނައްޓާލާފައި އޭރިއާ ތެރެއަށް ވަދެ ނަގައިދިން ބޯޅަ ޖަހަން ކުޅުންތެރިއަކު ނެތެވެ. އެ ބޯޅަ ދިފާއުކުރީ ޑިފެންޑަރު ހުސައިން އަބްދުﷲ އެވެ.
އޭގެ ފަހުން ކައުންޓައެޓޭކުގައި ސަސްގެ އަލީ ނަސޫހު (ޕިލާ) ހުސްކޮށް އަރައި ގޯލަށް ފޮނުވާލަން މަސައްކަތްކުރި ބޯޅަ ފަހަތުން އައިސް ދިފާއުކުރީ ވެސް ހުސައިން އެވެ.
ސަސް އިން މެޗުގެ ހަމައެކަނި ގޯލު ޖެހީ 20 ވަނަ މިނިޓްގައި އެ ޓީމަށް ލިބުނު ކޯނަރެއްގަ އެވެ. މުހައްމަދު ޝަހާއު (ބޭލް) ނަގައިދިން ކޯނަރުން ގްރީން ސްޓްރީޓްސްގެ ކުޅުންތެރިން ދިފާއުކުރި ބޯޅަ ލިބުނީ އޭރިއާ ބޭރުގައި ހުރި ޔަސްފާދު ހަބީބު (މުލަކޭ) އަށެވެ. އޭނާ ފޮނުވާލި ބޯޅަ ގޯލާ އަމާޒުނުވެ ދަނިކޮށް އިބްރާހިމް އަތީގު ހަސަން (އިއްބެ) އެބޯޅަ ގޯލަށް ފޮނުވާލި އެވެ. ފަހު ވަގުތު ބޯޅަ ސަލާމަތްކުރަން އުޅެގެން ގްރީން ސްޓްރީޓްސްގެ ކީޕަރު ޕާކިސްތާންގެ ހަނީފް ސާގިބަށް އެކަން ނުކުރެވުނެވެ.
ސަސް އިން ލީޑުނެގި ފަހުން ވެސް ގްރީން ސްޓްރީޓްސް އަށް މާ ރަނގަޅު ހަމަލާތަކެއް އުފެއްދޭ ގޮތެއް ނުވި އެވެ. ސަސްގެ މިޑްފީލްޑަރުންގެ ރަނގަޅު ކުޅުމެއް ފެނުނު މި މެޗުގައި ގްރީން ސްޓްރީޓްސްގެ މެދުތެރެެ ފެނުނީ އާދައިގެ ގޮތަކަށެވެ.
ސަސްގެ ލީޑް ފުޅާކުރަން ފުރަތަމަ ހާފުގައި އެންމެ ރަނގަޅު ފުރުސަތެއް ލިބުނީ މުލަކޭ އަށެވެ. އަރިމަތިން ބޯޅަ ހިފައިންގެން ގޮސް މުލަކޭ ޖެހި ބޯޅަ ކީޕަރު ހަނީފް ވަނީ ހުއްޓުވައިފަ އެވެ.
ފުރަތަމަ ހާފުގައި ގްރީން ސްޓްރީޓްސް އަށް އެންމެ ރަނގަޅު ފުރުސަތެއް ތަނަވަސްކޮށްދިނީ ހަސަން ނަޒީމް ގާސިމް (ޗޯޓު) އެވެ. އަރިމަތިން ލިބުނު ބޯޅަ ހިފައިގެން ގޮސް ޗޯޓު ހުރަސްކޮށްލި ބޯޅަ އެ ޓީމުގެ ބެލްޖިއަމް މިޑްފީލްޑަރު ޖޯޑީ ބާޓް ފޮނުވާލުމުން ކުރިމަތީގައި ހުރި ޑިފެންޑަރު ހަސަން ނައްވާޝް ގައިގައި ޖެހިފައި ދިޔައީ ބޭރަށެވެ.
ދެ ވަނަ ހާފުގެ ކުރީކޮޅު ގްރީން ސްޓްރީޓްސް އިން ވަނީ ފަރުއްކޮގެ ބަދަލުގައި އަންކޮ ކުޅެން އަރުވައިފަ އެވެ. މި ހާފުގެ ފުރަތަމަ ދިހަ މިނެޓުގައި ގްރީން ސްޓްރީޓްސް އިން ކުރިއަށް ޖެހިލައިގެން ކުޅެ ފުރުސަތެއް ހޯދޭތޯ މަސައްކަތްކުރި އެވެ.
މުޅި މެޗުގައި ވެސް ދެ ޓީމުގެ ފައުލްތައް ގިނަކޮށް ފެނުނުއިރު މެޗުގެ ރެފްރީ ހުސެއިން ސިނާންގެ ނިންމުންތަކާ މެދު ދެ ޓީމުން ވެސް ހިތްހަމަނުޖެހުނެވެ. ގްރީން ސްޓްރީޓްސް އިން ދެ ވަނަ ހާފުގައި ރަނގަޅަށް ކުޅުނު ނަމަވެސް ސަސް އިން ވެސް ފުރުސަތުތަކެއް ހޯދި އެވެ.
ގްރީން ސްޓްރީޓްސްގެ އަންކޮ އަށް ލިބުނު ފުރުސަތުގައި އެ ބޯޅަ ހުއްޓުވީ ސަސްގެ ޑިފެންޑަރުންނެވެ. ސަސްގެ އިއްބެ ބޯޅައާ އެކު ހުސްކޮށް ގޮސް ކީޕަރު ހަނީފް ކައިރިން ނައްޓާފައި ފޮނުވާލި ބާރު ހަަމާ ގޯލަށް ވަންނަން ދަނިކޮށް ދިފާއުކުރީ ތޮއްޕޭ އެވެ.
ނަތީޖާ ހަަމަހަމަ ކުރަން މެޗުގެ 84 ވަނަ މިނިޓުގައި ގްރީން ސްޓްރީޓްސް އިން ނުރައްކާތެރި ބޯޅައެއް ފޮނުވާލި އެވެ. އޭރިއާ ބޭރުން މިޑްފިލްޑަރު ޖޯޑީ ގޯލްގެ މަތީ ކަނަށް އަމާޒުކޮށް ފޮނުވާލި ބޯޅަ ސަސްގެ ކީޕަރު މުހައްމަދު ޝަފީއު (ޗެކު) ވަނީ ދިފާއުކޮށްފަ އެވެ.
ގިނަ ކާޑުތަކެއް ފެނުނު މި މެޗު ގްރީން ސްޓްރީޓްސް އިން ނިންމާލީ އެއް ކުޅުންތެރިއަކު މަދުކޮށެވެ. ގްރީން ސްޓްރީޓްސްގެ ކެޕްޓަން ރިލުވާން ވަހީދު (ރިލޭ) އަށް ދެ ވަނަ ރީނދޫ ކާޑާ އެކު ރަތް ކާޑެއް ރެފްރީ ވަނީ ދައްކައިފަ އެވެ.
އުރީދޫ ދިވެހި ޕްރިމިއާ ލީގުގެ މެޗެއް ދެން އޮންނާނީ އަންނަ އަންގާރަ ދުވަހު ހަވީރެވެ. އެ މެޗުގައި ވާދަކުރާނީ ކްލަބް ވެލެންސިއާ އާއި ސަސް އެވެ. އެރޭ ކުޅޭ މެޗުގައި ގްރީން ސްޓްރީޓްސް ނުކުންނާނީ ޓީސީއާ ދެކޮޅަށެވެ.
