ލިވަޕޫލް (މާޗް 4) - މިދިޔަ އަހަރުގެ ބެލޮންޑިއޯ އެވޯޑްގެ ނަތީޖާތަކަކީ އޭނާ އަށް ޝޮކެއް ކަމަށް ލިވަޕޫލަށް ކުޅޭ މިސްރުގެ ތަރި މުހައްމަދު ސަލާހު ބުނެފި އެވެ.
ސަލާހު، 29، އަކީ މިދިޔަ އަހަރު ފޯމަށް ބަލާއިރު، ބެލޮންޑިއޯ އެވޯޑް ހޯދާނެ ކަމަށް މީޑިއާގައި އަޑުފެތުރުނު ކުޅުންތެރިއެކެވެ. އެކަމަކު، ވޯޓަށް ފަހު ސަލާހު ދިޔައީ އެވޯޑް ނޮމިނޭޝަނުގެ ހަތް ވަނަ އެވެ. އެކަމާ ބެހޭގޮތުން ސަލާހު އޭރު މާ ބޮޑަށް ވާހަކަ ނުދައްކައި ހަމައެކަނި ބުނެފައިވަނީ މުސްތަގުބަލުގައި ފްރާންސް ފުޓްބޯލްގެ ބެލޮންޑިއޯ އާއި ފީފާގެ ބެސްޓް އެވޯޑްސް ހޯދަން ބޭނުންވާ ކަމަށް ބުނެފަ އެވެ.
ބެސްޓް އެވޯޑްސްގައި ސަލާހު ދިޔައީ ތިން ވަަނަ އެވެ.
"ލިވަޕޫލް އެކޯ" އަށް ދިން އިންޓަވިއުއެއްގައި ސަލާހު ބުނީ އޭނާ ދައްކަމުން އައި ކުޅުމަށް ބަލާއިރު، ބެލޮންޑިއޯގެ ހަތް ވަނަ އަކީ ހައްގު މަގާމެއްގެ ގޮތުގައި އެއްވެސް މީހަކު ނުބުނާނެ ކަމަށެވެ.
"އަހަންނާ ދެކޮޅަށް ކަމެއް އޮތީއެކޭ ވެސް ނުބުނެވޭނެ. އެއީ ވަރަށް ގިނަ ފަހަރު ނުރަނގަޅު ވޯޓު ދެވިފައި ހުންނަނީ. ސަބަބަކީ ވަރަށް ބައިވަރު ގައުމުން ވޯޓުދޭއިރު ރަނގަޅު ގޮތަށް ނުދެވި ހުރެދާނެ. މީގެ އަހަންނާ ދެކޮޅަށް ކޮންސްޕިރަސީ ތިއަރީއެއް އެބައޮތޭ ނުބުނެވޭނެ،" ސަލާހު ބުންޏެވެ.
ކޮންމެ މީހަަކަށް ވެސް އެ މީހެއްގެ އަމިއްލަ ވިސްނުމުގައި ވޯޓު ދިނުމުގެ ހައްގު އޮންނާނެ ކަމަށް ސަލާހު ވަނީ ބުނެފަ އެވެ. އޭނާ ކުޅެގެން ސާބިތުކޮށްދޭން ޖެހޭ ވަކި ކަމެއް ނޯންނާނެ ކަމަށާއި ބޭނުންވަނީ ރަނގަޅު ފޯމުގައި ކުރިއަށް ގޮސް ޓީމަށް އެހީވުމަށް ކަމަށް ސަލާހު ވަނީ ބުނެފަ އެވެ.
ފީފާ ބެސްޓް އެވޯޑްސްގައި ހޮވި ފިފްޕްރޯ، ޑްރީމް ޓީމުގައި ސަލާހު ނުހިމެނެ އެވެ. މިއީ ގިނަ މީޑިއާތަކުން ފާހަގަކޮށްފައިވާ ކަމެކެވެ. ދުނިޔޭގެ ޑްރީމް ޓީމުން ފުރުސަތު ނުލިބުމުން ސަލާހު ހުރީ ހިތްހަމަނުޖެހިފަ އެވެ.
"އެކަމަކު، މީގެ އޮތް ހިތްހަމަޖެހުމަކީ ވަރަށް ގިނަ ބަޔަކު ގަބޫލުކުރޭ އަހަންނަށް އެ ޓީމުން ޖާގައެއް ހައްގުވާކަން،" ސަލާހު ބުންޏެވެ.
މި ފަހަރު ޕްރިމިއާ ލީގުގައި މިހާތަނަށް ލަނޑު ލިސްޓާއި ލަނޑު ޖަހަން ފުރުސަތު ތަނަވަސްކޮށްދިނުމުގެ ތާވަލުގެ ކުރީގައި ވެސް އޮތީ ސަލާހު އެވެ. ޖުމްލަ 19 ގޯލު ޖަހާފައިވާއިރު، 10 ގޯލު ޖަހަން ވަނީ ފުރުސަތު ތަނަަވަސްކޮށްދީފަ އެވެ. ގޯލު ޖަހަން އެސިސްޓް ކޮށްދިނުމުގައި ސަލާހާއި ލިވަޕޫލްގެ ޓްރެންޓް އަލެކްސަންޑަ އާނޯލްޑް އޮތީ އެއްވަރުވެފަ އެވެ.
