ކޮލޮމްބޯ، ސްރީލަންކާ (މާޗް 3) - ބޭރު ފައިސާގެ ދަތިކަމާ ހެދި ތެޔޮ ނުލިބި، ކަރަންޓު ކެނޑުމުގެ މައްސަލަ ދިމާވެފައިވާ ސްރީލަންކާގެ ހަކަތައާ ބެހޭ މިނިސްޓަރު މަގާމުން ވަކިިކޮށްފި އެވެ.
އުދެޔަ ގައްމަންޕިލަ މަގާމުން ވަކިކުރި އިރު، މީގެ އެއް ދުވަސް ކުރިން އޭނާ ވަނީ ސަރުކާރުގެ ފައިސާއާ ބެހޭ ސިޔާސަތަށް ވަރަށް ބޮޑަށް ފާޑުވިދާޅުވެފަ އެވެ.
ފިނޭންސް މިނިސްޓަރުގެ މަގާމުގައި ހުންނަވަމީ ރައީސް ގޮތަބަޔާ ރާޖަޕަކްސަގެ ކޮއްކޯފުޅު ބެސިލް ރާޖަޕަކްސަ އެވެ. ގައްމަންޕިލައާ އެކު ކެބިނެޓުގެ އިތުރު މެމްބަރަކު ވެސް ވަކިކުރި އެވެ.
"ރައީސަށް ލިބިދޭ ބާރުގެ ދަށުން އިންޑަސްޓްރީ މިނިސްޓަރު ވިމާލް ވީރަވަންސަ އަދި ހަކަތައާ ބެހޭ މިނިސްޓަރު އުދެޔަ ގައްމަންޕިލަ ވަނީ މިއަދުން ފެށިގެން މަގާމުން ވަކިކޮށްފައި،" ރައީސްގެ ތަރުޖަމާނު ކިންގްސްލީ ރަތްނަޔަކަ ބުރާސްފަތި ދުވަހު ވިދާޅުވި އެވެ.
ދެ މިނިސްޓަރުން މަގާމުން ވަކިކުރި ސަބަބު ހާމަނުކުރި ނަމަވެސް، މަސްދަރުތަކުން ބުނީ އިގްތިސާދީ ކާރިސާއާ ގުޅިގެން ފާޑުކިޔުމުން ރައީސް ހިތްހަމަނުޖެހޭ ކަމަށެވެ.
ބުރާސްފަތި ދުވަހުގެ ހެނދުނު އިންޓަނޭޝަނަލް މަނިޓަރީ ފަންޑު (އައިއެމްއެފް) އިން ބުނީ ލަންކާގެ ބޭރުގެ ދަރަނި "ނުދެމެހެއްޓޭނެ" ކަމަށާއި ހާލަތުން އަރައިގަތުމަށް ފައިސާގެ އަގު ތިރިކޮށް، ޓެކްސް މަތިކުރަން މަޖުބޫރު ކަމަށެވެ.
މިދިޔަ ބުދަ ދުވަހުން ފެށިގެން ލަންކާގެ ހުރިހާ ހިސާބަކުން ވެސް ކޮންމެ ދުވަހަކު ގާތްގަނޑަކަށް އަށް ގަޑިއިރު ކަރަންޓުގެ ހިދުމަތް ކަނޑާލަ އެވެ.
މިއީ 1996 ވަނަ އަހަރަށް ފަހު އެ ގައުމުގެ ހަކަތައިގެ ހާލަތު މިހާ ގޯސްވި ފުރަތަމަ ފަހަރެވެ. ތެޔޮ ނުލިބޭތީ އާއްމު ދަތުރުތަކަށް ވެސް ވަނީ ހުރަސް އެޅިފަ އެވެ.
ބައެއް ބަސް ޑްރައިވަރުން ބުނީ ޕެޓްރޯލާއި ޑީސެލް އަޅަން ކިޔުގައި ހަތް ގަޑިއިރު މަޑު ކުރަން ޖެހޭ ކަމަށެވެ. ލަންކާއަށް ތެޔޮ އިމްޕޯޓް ނުކުރެވެނީ ބޭރު ފައިސާ ނެތުމުންނެވެ.
މިދިޔަ ޖެނުއަރީ މަހު ބޭރު ފައިސާގެ ރިޒާވް ހުރޫ 2.3 ބިލިއަން ޑޮލަރުގަ އެވެ. އެއީ ޑިސެމްބަރު މަހު އަޅާ ބަލާއިރު 25 ޕަސެންޓު މަދު އަދަދެކެވެ.
