ރާއްޖޭގެ ކުޅިވަރު ދާއިރާގައި އުޅޭ ފަރާތްތަކުގެ އަގުވަޒަންކުރުމަށް ބާއްވާ މޯލްޑިވްސް ސްޕޯޓްސް އެވޯޑްސް އަކީ ދުނިޔޭގެ ނިސްބަތުން ބެލިޔަސް ފެންވަރު ރަނގަޅު އިވެންޓަކަށް ހަދައި އަހަރަކު އެއް ފަހަރު ބޭއްވުމަކީ އެންމެ ބޮޑު ބޭނުން ކަމަށް ކުޅިވަރާ ބެހޭ ވަޒީރު އަހުމަދު މަހުލޫފް ވިދާޅުވެއްޖެ އެވެ.
މި މަހު 17 ވަަނަ ދުވަހު ބާއްވާ ސްޕޯޓްސް އެވޯޑަކީ ޔޫތު މިނިސްޓްރީގެ ފަރާތުން މިހާތަނަށް އެންމެ ފުޅާކޮށް ބާއްވާނެ އެއް އިވެންޓެވެ. މި އިވެންޓަށް ދުނިޔޭގެ ލެވަލްގެ މަގުބޫލް ކުޅިވަރު ލެޖެންޑުންނާއި ރާއްޖެއާ ގާތްގުޅުމެއް ބާއްވައި، އެހީތެރިކަން ފޯރުކޮށްދެމުން އަންނަ ގައުމުތަކުގެ ކުޅިވަރު ވުޒާރާތަކުގެ ވެރިން ހިމެނޭ ގޮތަށް ޖުމްލަ 15 މެހެމާނެއް ޒިޔާރާތްކުރާ ގޮތަށް ވަނީ ހަމަޖެހިފަ އެވެ.
ސްޕޯޓްސް އެވޯޑްގެ މެހެމާނުންގެ ހޮސްޕިޓާލިޓީ ކަންކަން ކްރޮސްރޯޑްސް އިން ހަމަޖެއްސުމުގެ އެއްބަސްވުމުގައި އިއްޔެ ސޮއިކުރުމަށް ބޭއްވި އިވެންޓަށް ފަހު މިނިސްޓަރު މަހުލޫފު ވިދާޅުވީ ބޭނުމަކީ "ވީ އެންމެ ފުރިހަމަކޮށް" މި އެވޯޑް ގެންދިއުން ކަމަށެވެ.
"އަޅުގަނޑަށް ހީވަނީ އަޅުގަނޑު އަތުން ރާއްޖޭގެ އެންމެ މޮޅު ފުޓްބޯޅަ ކުޅުންތެރިޔާގެ އިނާމް ދިނުމަށް ވުރެ މުޅި ދުނިޔޭގެ އެންމެ މަތީ ހަރުފަތުގައި ވޯލްޑް ކަޕަށް ދަންދެން ތަށި ހިއްލާލާފައި ތިބޭ ކުޅުންތެރިއެއްގެ އަތުން ހިފައިގެން ދިޔައީމަ ވެލިއު (އަގު) އެބަ އިތުރުވޭ. އެކަން ފުރިހަމަ ވެގެން އެބަދޭ.،" ލެޖެންޑުން ގެނެސްގެން ސްޕޯޓްސް އެވޯޑް ދިނުމާ ބެހޭގޮތުން މިނިސްޓަރު ވިދާޅުވި އެވެ.
މަޝްހޫރު މީހުން ގެނެސްގެން މި ގޮތަށް ބޮޑު އިވެންޓެއް ބޭއްވުމުގެ އެތައް ފައިދާއެއް ރާއްޖެ އަށް ކުރާނެ ކަމަށް މިނިސްޓަރު ވިދާޅުވި އެވެ. އަދި މި އެވޯޑް މި ގޮތަށް ބޭއްވުމުން ރާއްޖެ އަށް ލިބޭ ސަމާލުކަން އިތުރުވާނެ ކަމަށް މިނިސްޓަރު ގަބޫލުކުރައްވަ އެވެ.
"މޯލްޑިވްސް ސްޕޯޓްސް އެވޯޑްސް އަކީ ދުނިޔޭގެ ގިނަ އެތުލީޓުން ދެން އަންނަ ފަހަރެއްގައި އެ މީހުން ބައިވެރިވެލަން ބޭޭނުންވާ ކަހަލަ އިވެންޓަކަށް އަޅުގަނޑުމެން ބޭނުން. މީގެ ދެ މަގުސަދު އެބަ ހާސިލްކުރަން. ރާއްޖޭގެ ޓޫރިޒަމް އިސްތިހާރު ކުރުން ވެސް އެބަ ހިމެނޭ. އެތައް މިލިއަން ފޮލޯވަރުންތަކެއް ތިބޭ ލެޖެންޑުންތަކެއް އަޅުގަނޑުމެންނާ އެކު ބައިވެރިވެފައި އެނބުރި ދާއިރުގައި ވަރަށް ބޮޑު ފައިދާއެއް ކުރާނެ،"
ރާއްޖޭގައި މީގެ ކުރިން އެކިއެކި ފަރާތްތަކުން ކުޅިވަރު އެވޯޑުތައް ވެސް ބާއްވާފައި އެބަހުރިކަމަށާއި ޔޫތު މިނިސްޓްރީން ގައުމީ ލެވަލްގައި ކަމެއް ކުރާއިރު، "ތަފާތުވާން ޖެހޭނެ" ކަމަށް މިނިސްޓަރު ވިދާޅުވި އެވެ.
ކުޅިވަރު އެވޯޑެއްގެ އަނެއް މަގުސަދަކީ ރަނގަޅު ވާދަވެރި ރޫހެއް އެކިއެކި ކުޅިވަރުތަކުގެ ތެރެއިން އަށަގެންނެވުމެވެ. މި އަހަރު އެވޯޑް ނުލިބޭ ކުއްޖެއް މި އަންނަ އަހަރު އެ ބޭނުންވެގެން އެ އަށް މަސައްކަތް ކުރާ ވަރުގެ އެއްޗަކަށް ހެދުމަކީ މި އެވޯޑްގެ އަސްލު އެންމެ ބޮޑު އެއް ބޭނުން ކަމަށް މިނިސްޓަރު ވިދާޅުވި އެވެ.
މަހުލޫފް ވިދާޅުވީ ކުޅިވަރު އެތުލީޓެއް ކާމިޔާބު ހޯދަނީ އެތައް ކަމަކާ ކުރިމަތިލުމަށް ފަހު ކަމަށާއި ގައުމަށް ކޮށްދޭ ބޮޑެތި ހިދުމަތްތަކުގެ އަގުވަޒަންކުރާ ގޮތަށް ކުޅިވަރުން ވެސް އެކަން ކުރަން ޖެހޭނެ ކަމަށެވެ.
"އެތުލީޓަކަށް ވުމަށް ހަމަ ވަރަށް ގިނަ މަސައްކަތްތަކެއް އެބަކުރޭ. އަޅުގަނޑުމެން އައިސް އިނާމް ފައިސާ ބޮޑުކޮށްލީ، ޓީޓީ ކުޅެގެން ރަން މެޑަލް ލިބުނީމަ ވަރަށް ގިނަ ފައިސާ މި ދެނީ. ދިނީމަ ދޭން ޖެހޭހޭ ސުވާލުކުރާ މީހުން އެބަތިބި. ހާއްސަކޮށް ސޯޝަލް މީޑިއާގައި. އަސްލު އެ ކުއްޖެއް އެ ހިސާބަށް ދާން އެ ކުރާ މަސައްކަތް. ދުވާލަކު ކިތައް ގަޑިއިރު މަސައްކަތް ކުރޭތޯ އެ ކުއްޖާގެ ބެލެނިވެރިން އެވާ ގުރުބާނީ. އޭގެ އަގުވަޒަން ކުރުމަކީ ކުރަން ޖެހޭ ކަމެއް،" މިނިސްޓަރު ވިދާޅުވި އެވެ.
މަޝްހޫރު އެކި އެވޯޑް ހަފްލާތަކަށް ނަޒަރު ހިންގާލާއިރު، އެކި ކުޅިވަރު ސަހުސިއްޔަތުން ގެނެސްގެން އިވެންޓް ބޭއްވުމަކީ ދުނިޔޭގެ ނިސްބަތުން ބެލިޔަސް ކުރާ ކަމެކެވެ. މޯލްޑިވްސް ސްޕޯޓްސް އެވޯޑްސްގައި ބައިނަލްއަގުވާމީ ކުޅިވަރުތަރިން ބައިވެރިވާއިރު، މުސްތަގުބަލުގައި މި އެވޯޑް ފުޅާވެގެންދާއިރު، ދިވެހި ކުޅިވަރަށް ހިދުމަތްކޮށްދޭ އެކިއެކި ފަރާތްތަކުގެ ހިދުމަތް ފާހަގަކުރާނެ އެވެ. އަދި މުޅި ދުނިޔޭގެ ނިސްބަތުންބަލާއިރު، މީހުންގެ ދިރިއުޅުމަށް ތަފާތެއް ގެނެސްދީފައިވާ ލެޖެންޑުންގެ އަގުވަޒަންކުރުން ވެސް މި އެވޯޑްގައި ހިމެނުމަކީ މިނިސްޓްރީގެ އެއް ވިސްނުމެކެވެ.
"މޯލްޑިވްސް ސްޕޯޓްސް އެވޯޑްސް 2022" ގެ އޮންލައިން މީޑިއާ ޕާޓްނަރަކަށް ހަމަޖައްސާފައިވަނީ "އަދަދު" އޮންލައިން އެވެ. އަދި ބްރޯޑްކާސްޓިން ޕާޓްނަރަކަށް ހަމަޖައްސާފައިވަނީ ރާއްޖެ ޓީވީ އެވެ.
