ސްރީލަންކާއަށް ބޭނުންވާ ސާފު ނުކުރާ ތެޔޮ ގަންނަން ރަޝިއާއިން 300 މިލިއަން ޑޮލަރުގެ ކްރެޑިޓް ލައިނަކަށް އެދިފައިވާ ކަމަށް އެ ގައުމުގެ ނޫސްތަކުން ރިޕޯޓުކޮށްފި އެވެ.
ހިރޫ ނިއުސްއިން ބުނި ގޮތުގައި ރަޝިއާއިން ކްރެޑިޓް ލައިނެއް ހޯދަން ރަސްމީކޮށް ވަނީ ހުށަހަޅާފަ އެވެ. ނަމަވެސް ހުށަހެޅީ ރަޝިއާއިން ޔޫކްރެއިނަށް އެރި ފަހުން ކަމެއް ނުވަތަ އޭގެ ކުރިން ކަމެއް ސާފެއް ނުވެ އެވެ.
ސްރީލަންކާއަށް ވަނީ ބޭރު ފައިސާގެ ދަތިކަމާ ވަރަށް ބޮޑަށް ކުރިމަތިވެފަ އެވެ. ތެޔޮ އެތެރެ ކުރާނެ ފައިސާ ނެތުމުން، ކޮންމެ ދުވަހަކު ވެސް ލަންކާގެ އެކި ހިސާބުތަކުން މިހާރު ޝެޑިއުލްކޮށްގެން ކަރަންޓު ކަނޑަ އެވެ.
ޔޫކްރެއިނުން ރަޝިއާ ސިފައިން ފޭބުމަށް ގޮވާލައި ބުދަ ދުވަހުގެ ރޭ އދ. ގެ އާއްމު މަޖިލީހުގައި ނެގި ވޯޓުގައި ސްރީލަންކާއިން ނިންމީ ވަކި ކޮޅަކަށް ވޯޓު ނުދިނުމަށެވެ.
މި ހަފްތާގައި ރަޝިއާގެ ވިޔަފާރިވެރިންގެ އިސް ވަފުދެއް ވެސް ސްރީލަންކާގައި އުޅުނެވެ. އެ ވަފުދުގެ ވެރިޔަކަށް ހުންނެވީ ރަޝިއާގެ އިންޑަސްޓްރީ އާއި ޓްރޭޑްގެ ޑެޕިއުޓީ މިނިސްޓަރެވެ.
ޑެޕިއުޓީ މިނިސްޓަރު ޑެނިސް މަންޓުނޯވް އާއި ލަންކާގެ ބޮޑު ވަޒީރު މަހިންދާ ރާޖަޕަކްސަ ބައްދަލުކުރެއްވި އެވެ.
