ހައިކޯޓުގެ އަމުރެއް ސަސްޕެންޑް ކުރުމަށްފަހު، ރާއްޖެއަށް ޑްރަގް އެތެރެކުރުމުގައި ބައިވެރިވި ކަމަށް ތުހުމަތު ކުރެވޭ މީހަކު އައްޑޫ ސިޓީ ހިތަދޫ މެޖިސްޓްރޭޓް ދޫކޮށްލި މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ)އިން ބަލަން ފަށައިފި އެވެ.
ބަންދުގައި ހުރި އެރަށު މަންދޫބުގެ، ރުޝާން އަހްމަދު ދީދީގެ ބަލި ހާލަތަށް ރިޔާއަތްކޮށް، އެ ކޯޓުގެ މެޖިސްޓްރޭޓް ރަފީއުދީން އަހްމަދު ނެރުނު ހުކުމުގައި ވަނީ ހައިކޯޓުން ނެރިފައިވާ އަމުރެއް 90 ދުވަހަށް ސަސްޕެންޑްކުރުމަށްފަހު، ޝަރުތުތަކަކާއެކު އޭނާ ދޫކޮށްލާފަ އެވެ.
އެއީ ކަނޑައެޅިގެން ފަނޑިޔާރުންގެ ގާނޫނާ ހިލާފު އަމަލެއް ކަން ފާހަގަކޮށް، ޕްރޮސެކިއުޓާ ޖެނެރަލް ހުސެއިން ޝަމީމް އެ މައްސަލަ ޖޭއެސްސީއަށް ހުށަހެޅުއްވި އެވެ.
އެ ނިންމުމަށް ފާޑުވިދާޅުވެ، ޕީޖީ ކުރެއްވި ޓްވީޓަށް ރައްދުދީ، ނޫސްބަޔާނެއްވެސް މެޖިސްޓްރޭޓް ނެރެފައިވާތީ، މެޖިސްޓްރޭޓްގެ ސުލޫކީ މައްސަލަ ބެލުމަށް ޖޭއެސްސީއިން ވަނީ މިއަދު ނިންމާފަ އެވެ.
"...ރަފީއުއްދީން އަހްމަދު މީހެއްގެ ބަންދާމެދު ގޮތެއް ނިންމުމުގަ އާއި އެ ނިންމުމާ ގުޅޭ ގޮތުން ނޫސްބަޔާނެއް ނެރުމުގައި ފަނޑިޔާރުންގެ ސުލޫކީ މިންގަނޑާ ހިލާފަށް އަމަލުކޮށްފައިވާކަމަށް ބެލެވޭތީ މެޖިސްޓްރޭޓް ރަފީއުއްދީން އަހްމަދުގެ ސުލޫކީ މައްސަލައެއް ތަހްގީގުކުރުމަށް،" އެ ކޮމިޝަނުން އިއްޔެ ބޭއްވި ޖަލްސާގައި އެ މެޖިސްޓްރޭޓްގެ މައްސަލަ ބެލުމަށް ނިންމާ، ތަހުގީގީ ކޮމިޓީއެއް އެކުލަވާލާފައިވާ ކަމަށް ޖޭއެސްސީއިން ދެންމެ ނެރުނު ބަޔާނުގައި ބުނެފައި ވެއެވެ.
ރަފީއުއްދީން ނެރެފައިވާ ބަޔާނުގައި ވަނީ އެ އަމުރު ނެރުމުގެ ކުރީގައި އެއީ ކުރެވިދާނެ ކަމެއްތޯ ޝަރީއަތުން ސުވާލު އުފެއްދި ކަމަށާއި އެކަމާމެދު ދެ ހަސްމުން ދެކޭގޮތް ހުށަހަޅަން ފުރުސަތު ދިން ކަމަށާއި އޭގެ ތެރޭގައި ދައުލަތް ތަމްސީލުކުރަން ޕީޖީގެ ހަތަރު ވަކީލުން ތިއްބެވިކަން ފާހަގަކުރައްވާފަ އެވެ.
މެޖިސްޓްރޭޓް ވިދާޅުވި ގޮތުގައި އެ އަމުރު ނެރުނީ ޕީޖީއިން އެކަމާ އިއުތިރާޒްކޮށްފައި ނުވާތީ އެވެ. އަދި އެ އަމުރު ނެރުމުގައި ގާނޫނީ ހުރަހެއް ނެތް ކަމަށް ދައުލަތުން ދެކުމުންނެވެ.
އެހެންވެ އެއީ ޕީޖީ ޝަމީމަށް ނޭނގި ނެރުނު އަމުރަކަށް ނުވާނެ ކަމަށް ވިދާޅުވެ، ރަފީއުއްދީން ވަނީ ޕީޖީއަށް ނޭނގި ހިނގާފައިވާ ކަމެއްކަމަށް ދޭހަވާ ގޮތަށް ޝަމީމް ކުރެއްވި ޓްވީޓަކީ އޭނާގެ މަގާމާ އެކަށީގެންނުވާ ކަމެއް ކަމަށް ވެސް އެ ބަޔާނުގައި ބުނެފަ އެވެ.
