ރަޝިއާގެ ބިލިއަނަރުންނަށް ނިސްބަތްވާ ތިން ޔޮޓަކާއި ޕްރައިވެޓް ޖެޓެއް މިވަގުތު ރާއްޖޭގައި އޮތްކަން "އަދަދު" އިން ހޯދި ހޯދުންތަކުން އެނގިއްޖެ އެވެ.
ރަޝިއާއިން އިސްވެ ފެބްރުއަރީ 24، ގައި ޔޫކްރެއިނަށް ހަމަލާ ދީ އެގައުމަށް އަރައިގަތުމާ ގުޅިގެން ހުޅަނގުގެ ގައުމުތަކުން ވަނީ ދަތިކުރުމުގެ ވަރުގަދަ ފިޔަވަޅުތަކެއް އެގައުމާ ދެކޮޅަށް އަޅާފަ އެވެ. އޭގެ ތެރޭގައި، ރަޝިއާގެ މިހާރުގެ ރައީސް ލެޑިމިއާ ޕުޓިންގެ އަރިސް ބިލިއަނަރުންނާއި އެ މީހުންގެ ކުންފުނިތަކާ ދެކޮޅަށް ވެސް ފިޔަވަޅު އެޅި އެވެ. އެއާއެކު، އެ މީހުންގެ ޔޮޓްތަކާއި ޕްރައިވެޓް ޖެޓްތައް އަމާޒުކުރި އެއް މަންޒިލަކީ ރާއްޖެ އެވެ.
އެމެރިކާއިން ދަތިކުރުމުގެ ފިޔަވަޅު އަޅައި ރަޝިއާގެ ބިލިއަނަރުންގެ އެސެޓްތައް ފްރީޒްކުރާނެ ކަމަށް އެމެރިކާގެ ރައީސް ޖޯ ބައިޑެންގެ ރިޔާސީ ބަޔާނުގައި ވެސް ވިދާޅުވި އެވެ. އެމެރިކާއިން އެފަދަ ކަމެއް ކުރުމަށް ރާއްޖޭގައި އެދިފައިނުވާ ކަމަށް ފޮރިން މިނިސްޓްރީން ވަނީ "އަދަދު" އަށް ކަށަވަރު ކޮށްދީފަ އެވެ.
އެގޮތުން ބަލާއިރު މިވަގުތު ވެސް ރަޝިއާގެ ބިލިއަނަރުންނަށް ނިސްބަތްވާ ތިން ޔޮޓެއް ރާއްޖޭގެ ސަރަހައްދުގައި އެބައޮތެވެ. އެ މީހުންގެ ޔޮޓްތައް ރާއްޖެއަށް އަމާޒުކުރުމުގެ މައިގަނޑު އެއް ސަބަބެއްގެ ގޮތުގައި ބެލެވެނީ ކުށްވެރިން ބަދަލުކުރުމުގެ އެއްބަސްވުމެއް ރާއްޖެއިން އެމެރިކާ އަދި ހުޅަނގުގެ އެހެން ގައުމުތަކާއެކު ވެސް ގާއިމުކޮށްފައި ނުވުމެވެ.
ވިކްޓާ ރަޝްނިކޯވް ގެ ޔޮޓް "އޯޝަން ވިކްޓްރީ" ވެސް މިވަގުތު އޮތީ ރާއްޖޭގަ އެވެ. ގާތްގަނޑަކަށް 459 ފޫޓު ހުރި މި ޔޮޓް މިވަގުތު އޮތީ ޕެރަޑައިސް އައިލެންޑް ރިސޯޓް ކައިރީގަ އެވެ. މިއީ 294 މިލިއަން ޑޮލަރުގެ އަގުހުރި ޔޮޓެކެވެ.
ވިކްޓާ ރަޝްނިކޯވްގެ އޯޝަން ވިކްޓްރީ -- ފޮޓޯ: ގެޓީ އިމޭޖަސް
ރަޝްނިކޯވް އަކީ ވެސް ދަގަނޑު އިންޑަސްޓްރީގައި ހަރަކާތްތެރިވާ މީހެކެވެ. އޭނާގެ މިލްކިއްޔާތުގައި 9.6 ބިލިއަން ޑޮލަރު ހުރި ކަމަށް އަންދާޒާކޮށްފައިވެ އެވެ.
އެލެކްޒެންޑާ އަބްރަމޯވްގެ ޔޮޓް "ޓައިޓަން" ރާއްޖެ އައިސްފައި ވަނީ ތުރުކީގެ ހުޅަނގު ދެކުނު ގައި އޮންނަ ޕޯޓް ސިޓީއަކުން ފެބްރުއަރީ 28، ގަ އެވެ. މިވަގުތު އެ ޔޮޓް އޮތީ ދެކުނު މާލެ އަތޮޅުގައި އޮންނަ ވެލައްސަރު ރިސޯޓް ކައިރީގަ އެވެ. އެއީ 257 ފޫޓު ހުންނަ 82 މިލިއަން ޑޮލަރުގެ ޔޮޓެކެވެ.
އެލެކްޒެންޑާ އަބްރަމޯވްގެ ޓައިޓަން -- ފޮޓޯ: އަލަމީ ސްޓޮކް ފޮޓޯ
ދަގަނޑު އުފައްދައި އެކްސްޕޯޓް ކުރުމުގެ އިންޑަސްޓްރީގައި ހަރަކާތްތެރިވާ އަބްރަމޯވްގެ މިލްކިއްޔާތުގައި 5.9 ބިލިއަން ޑޮލަރު ހުރި ކަމަށް ފޯބްސްއިން އަންދާޒާ ކުރެ އެވެ. އޭނާގެ ވިޔަފާރި ޕާޓްނަރުންގެ ތެރޭގައި ޗެލްސީ ވިއްކާލާނެކަން މިހާރު އިއުލާންކޮށްފައިވާ ރޯމަން އަބްރަމޮވިޗް ވެސް ހިމެނެ އެވެ. އޭނާ އާ ދެކޮޅަށް 2018 ވަނަ އަހަރުން ފެށިގެން އެމެރިކާއިން ވަނީ ދަތިކުރުމުގެ ފިޔަވަޅު އަޅާފަ އެވެ.
ހަމައެހެންމެ، އިގޯ ކަސަޔޭވްގެ ޔޮޓް "މައި ސްކައި" ވެސް އޮތީ ރާއްޖޭގައި ކަމަށް ޑޭޓާތަކުން ދައްކަ އެވެ. މިވަގުތު އެ ޔޮޓް އޮތީ ގިރާވަރު ފަޅު ބޭރުގަ އެވެ. މިއީ 30 މިލިއަން ޑޮލަރުގެ އަގު ހުރި 168 ފޫޓުގެ ޔޮޓެކެވެ.
އިގޯ ކަސަޔޭވްގެ ޔޮޓް މައި ސްކައި -- ފޮޓޯ: ސުޕާޔޮޓް ޓައިމްސް
ކަސަޔޭވްގެ މިލްކިއްޔާތުގައި 3.6 ބިލިއަން ޑޮލަރު ހުރި ކަމަށް ފޯބްސްއިން އަންދާޒާ ކުރެ އެވެ. ރަޝިއާގެ ސިގަރެޓް މާކެޓުގެ 70 ޕަސެންޓް ކޮންޓްރޯލް ކުރަނީ ކަސަޔޭވް އާއި އޭނާގެ ޕާޓްނަރު ސަރްގޭ ކަތުސިއޭވް އެވެ.
ރަޝިއާގެ އެންމެ މުއްސަދި ބިލިއަނަރު ކަމަށްވާ ލެޑިމިއާ ޕޮޓަނިންގެ ޔޮޓް "ނިރްވާނާ" ވެސް ރާއްޖޭގައި އޮތުމަށްފަހު މިހާރު ދަތުރުކުރަމުން އަންނަނީ މެދުއިރުމަތީގެ ގައުމަކަށެވެ. އެ ޔޮޓްގެ މަންޒިލް ސާފެއް ނޫނެނެވެ.
ހަމައެހެންމެ، އޮލެގް ޑެރިޕަސްކާގެ ޔޮޓް "ކްލިއޯ" ވެސް ރާއްޖޭގައި އޮތް ކަމަށް ރިޕޯޓްކުރި އެވެ. ލަންކާގެ ގޯލް ޕޯޓުން ފުރައިގެން އައިސް މާޗް 2، ގައި ރާއްޖޭގައި އެ ޔޮޓް ބަނދަރުކުރާނެ ކަމަށް ބެލެވުނު ނަމަވެސް، މިވަގުތު އެ ޔޮޓް ރާއްޖޭގައި ނެތް ކަމަށް ޑޭޓާތަކުން ދައްކަ އެވެ. އެންމެ ފަހުގެ ޑޭޓާ ދައްކާ ގޮތުން އެ ޔޮޓް ދަތުރުކުރަމުން ދަނީ ގަލްފް އޮފް ސުއެޒް އިންނެވެ.
ޕުޓިން އަށް ވާގިވެރިވާ ބިލިއަނަރުންގެ ލިސްޓުގައި ހިމަނައި އެ ދެ މީހުންނާ ދެކޮޅަށް ވެސް އެމެރިކާއިން ވަނީ ދަތިކުރުމުގެ ފިޔަވަޅު އަޅާފަ އެވެ.
އޭގެ އިތުރުން، އާކަޑީ ރޮޓެންބާގްގެ ޕްރައިވެޓް ޖެޓު ވެސް މިވަގުތު އޮތީ ރާއްޖޭގައި ކަމަށް ފްލައިޓް ޓްރެކިން އެޕް "ފްލައިޓް ރޭޑާ" ގެ ޑޭޓާތަކުން ދައްކަ އެވެ. މޮސްކޯގެ ނުކޯވޯ އިންޓަނޭޝަނަލް އެއާޕޯޓުން ފުރައިގެން އެ ޖެޓު ވެލާނާ އިންޓަނޭޝަނަލް އެއާޕޯޓަށް އަށް ގަޑިއިރާ 12 މިނެޓުގެ ދަތުރެއް ކުރުމަށްފަހު އައިސްފައި ވަނީ މާޗް 1، ގަ އެވެ. އެއީ 60 މިލިއަން ޑޮލަރުގެ ޖެޓެކެވެ.
ރޮޓެންބާގްއަކީ ވެސް އެމެރިކާއިން ދަތިކުރުމުގެ ފިޔަވަޅު އަޅާފައިވާ ރަޝިއާގެ ބިލިއަނަރެކެވެ. އޭނާއަކީ، ޕޫޓިންގެ ކުޑައިރުގެ ރަހުމަތްތެރިއެކެވެ. އަދި، މިހާރު ވެސް ޕޫޓިން ގެ އަރިސް މީހުންގެ ތެރޭގައި ހިމެނޭ މީހެކެވެ. އޭނާގެ މިލްކިއްޔާތުގައި 2.5 ބިލިއަން ޑޮލަރު ހުރި ކަމަށް ފޯބްސްއިން އަންދާޒާކުރެ އެވެ.
އެ ޖެޓުގެ އިތުރުން ރަޝިއާގެ ބިލިއަނަރަކަށް ނިސްބަތްވާ އެހެން ޖެޓެއް މިވަގުތު ރާއްޖޭގައި އޮތް ކަމަކަށް ނުދައްކަ އެވެ.
ރާއްޖޭގައި މި މީހުންގެ އެސެޓްތައް އެއްވެސް ހުރަހެއް ނެތި ގެންގުޅެމުންދާއިރު ޖަރުމަނުން ވަނީ އިއްޔެ އަލީޝާ އުސްމަނޯވްގެ ޔޮޓް "ދިލްބަރު" އެގައުމުގެ އިދާރާތަކުގެ ބެލުމުގެ ދަށަށް ގެނެސްފަ އެވެ. އޭނާގެ މިލްކިއްޔާތުގައި 14.2 ބިލިއަން ޑޮލަރު އެބަހުއްޓެވެ.
ރާއްޖޭގެ އިތުރުން، ބަހާމާސް، ސީޝެލްސް، މޮނާކޯ އަދި ބާސެލޯނާ އަށް ވެސް ރަޝިއާ ބިލިއަނަރުންގެ ޔޮޓްތައް ދަތުރުކުރަމުންދާ ކަމަށް ރިޕޯޓްކޮށްފައިވެ އެވެ. ރަޝިއާގެ ބިލިއަނަރުންނަށް ނިސްބަތްވާ 32 އަށްވުރެ ގިނަ ސުޕާޔޮޓް އޮތްއިރު އޭގެ އަގު 3.7 ބިލިއަން ޑޮލަރަށް ވުރެ އިތުރެވެ.
