މާލޭގެ ރައްޔިތުންނަށް ހުޅުމާލެ އިން ދޫކުރަން ސަރުކާރުން ނިންމާފައިވާ 1،000 ގޯތި ހިލޭ ދެއްވުމަށް އެދި މާލޭގެ މޭޔަރު ޑރ. މުހައްމަދު މުއިއްޒު، ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ހުށަހަޅުއްވައިފި އެވެ.
މާލޭން ގޯތި ދޫކުރުން ރައީސް އިއުލާން ކުރައްވާފައި ވަނީ މާލެއާ ކައިރީގައި އޮންނަ ގިރާވަރު ފަޅު ހިއްކައި އެތަނުން ގޯތި ދޫކުރުމުގެ މަޝްރޫއުއެއް ފެށުމަށް ނިންމަވާފައިވާކަން ހާމަ ކުރައްވަމުންނެވެ.
ރައީސް ވިދާޅުވީ މާލޭގެ ރައްޔިތުންނަށް ހުޅުމާލެއިން 1,000 ގޯތި އަދި ގުޅީފަޅުން މަދުވެގެން 2,000 ގޯތި ދިނުމަށް ވެސް ނިންމާފައިވާ ކަމަށެވެ.
އެކަމާ ގުޅިގެން މުއއިްޒު ވިދާޅުވީ ހުޅުމާލެއިން މާލޭ ރައްޔިތުންނަށް ސަރުކާރުން ދޭން ކަނޑައަޅާފައިވާ ކަމަށް ބުނާ 1،000 ގޯތީގެ މައުލޫމާތު ލިބުނީ މީޑިއާއިން ކަމަށެވެ.
އެއީ ހަގީގަތެއް ކަމަށްވާނަމަ ރާއްޖޭގެ އެހެން ރަށްތަކުގައިވެސް ހިލޭ ގޯތި ދޭ އުސޫލުން ހުޅުމާލެ އިން ދޭ ގޯތިތައް މާލެ ރައްޔިތުންނަށް ހިލޭ ދެއްވުމަށް ރައީސަށް ރަސްމީކޮށް ސިޓީއަކުން ދަންނަވާފައިވާ ކަމަށް މުއިއްޒު ވިދާޅުވި އެވެ.
މާލޭ ރައްޔިތުންނަށް ހުޅުމާލެއިން ގޯތި ދިނުމަށް ނިންމާފައިވާއިރު މާލެ ސިޓީ ކައުންސިލުން ވަނީ މާލެއިން ގޯތި ބޭނުންވާ މީހުންގެ ދަފުތަރެއް އެކުލަވައިލުމަށް ނިންމައިފަ އެވެ. ސަބަބަކީ މާލޭގެ ރައްޔިތުންގެ ގެދޮރުވެރިކަމާ ގުޅޭ ދަފުތަރެއް އެކުލަވައިލެވިފައި އޮތުމުން ކަންކަން ތަންފީޒުކުރަން ސަރުކާރަށް ވެސް ފަސޭހަވާނެތީ ކަމަށް ސިޓީ ކައުންސިލުން ވަނީ ބުނެފަ އެވެ.
މާލޭ ރައްޔިތުންނަށް ސަރުކާރުން ގޯތި ދޫކުރަން ނިންމާފައިވާ ނަމަވެސް އެކަމާ ގުޅޭ އެއްވެސް މަޝްވަރާއެއް ސަރުކާރުގެ އިދާރާތަކުން ސިޓީ ކައުންސިލާ ނުކުރާ ކަމަށާއި އެކަމަށް ސަރުކާރުން އެއްބާރުލުން ނުލިބޭ ކަމަށް މުއިއްޒު ދަނީ ތަކުރާރުކޮށް ވިދާޅުވަމުންނެވެ.
