ދެ ފޫޓެއްހާ ދުރުދުރުގައި ކާލި ބަނދެފައި ހުރި، ދެ މީހުންގެ އިސްކޮޅު ހުންނަ ވަރުގެ ރުކަކަށް ރާ ބާލަން އަރާ ފައިބަން އޭނާ އަށް ނަގަނީ ދިހަ ވަރަކަށް މިނިޓެވެ. ބަޅު ކަންފައްޗަކާއި ފުޅި ބުރިތައް ހިފައިގެން ރާ އަރަަން އޭނާ ދަނީ ބައިސްކަލުގަ ހަލުވި ކަމާއެކު ދުއްވާލައިފަ އެވެ.
އދ. އޮމަދޫ، މޫންލައިޓް އަބްދުއް ސައްތާރު، 62، ކޮންމެ ދުވަހަކު ހެނދުނާއި މެންދުރާއި ހަވީރު 12 ރުކަށް ރާ ބާލަން އަރަ އެވެ. ނާށިން ހަދާފައި ހުންނަ ބަދީގެ ބަދަލުގައި މިހާރު ބޭނުންކުރާ ފުޅި ބުރީގައި، ލިޓަރެއްހާ ރާ ކޮންމެ ރުކަކުން އޭނާ ބާލަ އެވެ. ފެން ހުސްކޮށްފައި ހުންނަ 1.5 ލިޓަރުގެ ފުޅިއެއްގެ ރާ ވިއްކަނީ 75ރ. އަށެވެ.
އަބްދުއް ސައްތާރު ރުކަކުން ރާ ހިފައިގެން ފައިބަނީ: ރާ ލިޓަރެއް ވިއްކަނީ 50ރ. އަށް -- އަދަދު ފޮޓޯ/ އަހުމަދު ސައީދު
"އެކި ކުރުން އެކި ދުވަހު އެކި ވަރަށް ރާ ލިބެނީ، ރާ ވިއްކާފައި ނުވިކޭ ބައި ހަކުރަށް ހަދަނީ،" ސައްތާރު ބުންޏެވެ. "ވިއްކަ ދޭނެ މީހަކު ނުހުންނާތީ މާލެ އަކަށް ނުފޮނުވަން، މާލެ ފޮނުވައިގެން ވިއްކާ ދެ މީހަކު މިރަށުގަ އުޅޭ."
ސައްތާރުގެ ގެ އަށް ގެންދާ ރާ، ގަންނާނެ މީހަކު ވެއްޖިއްޔާ ފުރާނާފައި ވިއްކަނީ އެވެ. ނުވިކޭ ރާ ތާހަކަށް އަޅައިގެން ދިޔާ ހަކުރަށް ވަންދެން، ފޮނު ނަގަމުން، ދަރު ޖައްސައިގެން ކައްކައި ދެނީ އޭނާގެ އަންހެނުންނެވެ. ދެ ލިޓަރު ހުންނަ ވަރުގެ ހަކުރު ފުޅިއެއް ވިއްކަނީ 400ރ. އަށެވެ.
ސައްތާރުގެ ދިން މައުލޫމާތަށް ބަލާއިރު، ރާ އެރުމަކީ ދޫކޮށްލަން ވާވަރުގެ މަސައްކަތެއް ނޫނެވެ. ސައްތާރުގެ ކުރާ މަސައްކަތަށް ބަލާއިރު، ރަނގަޅު ދުވަހެއް ނަމަ، 12 ރުކުން، އޭނާ އަށް ދުވާލަކު 36 ލިޓަރުގެ ރާ ލިބުން ގާތެެވެ. ރާ ލިޓަރެއް 50ރ. އަށް ވިއްކައިގެން 1،800ރ. ގެ އާމްދަނީ އެއް ދުވާލެއްގެ މައްޗަށް ހޯދޭނެ އެވެ. މަހެއްގެ މައްޗަށް ބަލާނަމަ އެއީ 54،000ރ. އެވެ.
މީހަކަށް ރާ ވިއްކުމަށްޓަކައި ރާ ފުރާނަނީ: ނުވިކޭ ރަލުން ކައްކަކީ ދިޔާ ހަކުރު -- އަދަދު ފޮޓޯ/ އަހުމަދު ސައީދު
"މިއީ ބުރަ ކަމެއް، ބަލި ވިއަސް ވިއްސާރަ ވިއަސް ތިން އިރަށް ރުކަން އަރަން ޖެހޭނެ، ލިބޭ އެއްޗެއްގެ ދެބައި ކުޅަ އެއްބައި އޮންނާނީ ރުކުގެ ވެރި ފަރާތަށް، އެއީ ވަރަށް ބޮޑު އެއްޗެއް،" ސައްތާރު ބުންޏެވެ.
ތޭރާ ގެސްޓު ހައުސް ހުންނަ، 1،156 މީހުންގެ އާބާދީއެއް އޮންނަ އޮމަދޫގަ ފަސް މީހުން ރާވެރިކަން ކުރެ އެވެ. އޭގެ ތެރޭގައި މުސާރަ އަށް ރާވެރިކަން ކުރުވަން ގެނެސްފައި ހުންނަ ބިދޭސީއެއް ވެސް ހިމެނެވެ. ކޮންމެ ދުވަކު ވެސް އެރަށުން ބާލާ ތާޒާ ރާ މާލެ އަށް ފޮނުވައިގެން ވިއްކަ އެވެ.
"އެއީ ރަނގަޅު އާމްދަނީއެއް ލިބޭ މަސައްކަތެއް، އިތުރަށް ފުޅާ ކުރަން ވެސް ބޭނުންވާ ކަމެއް، މިހާރު ކުރިއަށްވުރެ ރަށުގައި ރުއް ވެސް ގިނަ ވާނެ،" އޮމަދޫ ކައުންސިލުގެ ރައީސް އިބްރާހިމް އާދިލް ވިދާޅުވި އެވެ.
އޮމަދޫ ކައުސިލް ވަނީ ރާ އަރާ މީހުންނަށް 15 ވަރަކަށް ރުއް މަހަކު 100ރ. ގެ ކުއްޔަކަށް ކުއްޔަށް ދޫކޮށްފަ އެވެ. އަމިއްލަ މީހުންގެ ރުއްތަކުގެ ތެރެއިން ވަރަށް ގިނަ ރުއްތައް ވެސް ދޫކޮށްފައި ވަނީ ރާ އެރުމަށެވެ.
