ޓޯކިޔޯ، ޖަޕާން (މާޗް 2) - ޝައްކު ކުރެވޭ ރަޝިއާގެ ހެލިކޮޕްޓަރެއް ޖަޕާނުގެ ވައިގެ ސަރަހައްދަށް ވަނުމުން ދިފާއުގައި ހަނގުރާމަ މަތީ ޖެޓުތައް ފޮނުވައި ޖަޕާން ސަރުކާރުން ހިތްހަމަނުޖެހުން ފާޅުކޮށްފި އެވެ.
ޖަޕާނާއި އަވައްޓެރި ޗައިނާ، ރަޝިއާ އަދި ދެކުނު ކޮރެއާއާ ދެމެދު ބޯޑަރު މައްސަލަތައް ވަރަށް ގިނައިން ޖެހެ އެވެ. އަދި ވައިގެ ސަރަހައްދުގެ ދިފާއުގައި ގަވާއިދުން ޖެޓުތައް ދުއްވަ އެވެ.
ޑިފެންސް މިނިސްޓްރީން ބުނާ ގޮތުގައި ނޮވެމްބަރު މަހު 127 ފަހަރު، ޑިސެމްބަރު މަހު 142 ފަހަރު އަދި ޖެނުއަރޫ މަހު 49 ފަހަރު ވައިގެ ސަރަހައްދުގެ ދިފާއުގައި ޖެޓުތައް ފޮނުވަން ޖެހުނެވެ.
އެންމެ ގިނައިން ޖެޓުތައް ފޮނުވަން ޖެހެނީ ޗައިނާގެ އުޅަނދުތައް ޖަޕާނުގެ ވައިގެ ސަރަހައްދާ ކައިރި ވާތީ އެވެ. ދެ ވަނައަށް އެންމެ ގިނައިން މައްސަލަ ޖެހެނީ ރަޝިއާއާ އެވެ.
ޑިފެންސް މިނިސްޓްރީގެ ބަޔާނެއްގައި ބުނީ އުތުރު ހޮއްކައިޑޯ ރަށާ ދިމާލުން ބުދަ ދުވަހު ރަޝިއާގެ ހެލިކޮޕްޓަރެއް ވައިގެ ސަރަހައްދަށް އެތެރެވި ކަމަށެވެ.
ޖަޕާން އެއާ ސެލްފް ޑިފެންސް ފައުޖުން ވަގުތުން އެލާޓަށް އައިސް، ގިނަ އަދަދެއްގެ ޖެޓުތައް އެ ހިސާބަށް ފޮނުވި އެވެ. އަދި ހެލިކޮޕްޓަރު ދިޔުމަށް އިންޒާރު ދިނެވެ.
"ޑިޕްލޮމެޓިކް ވަސީލަތެއް މެދުވެރިކޮށް މިއަދު އަޅުގަނޑުމެން ވާނީ ރަޝިއާ ސަރުކާރަށް ރަސްމީކޮށް ނުރުހުން ފާޅުކޮށްފައި. އަދި އެފަދަ ކަންކަން ތަކުރާރު ނުކުރުމަށް ދެންނެވިން،" ސަރުކާރުގެ ތަރުޖަމާނު ހިރޯކަޒޫ މަޓްސޫނޯ ވިދާޅުވި އެވެ.
"އަޅުގަނޑުމެންގެ ކަނޑުގެ ސަރަހައްދާއި ވައިގެ ސަރަހައްދުގައި އަދި އެ ސަރަހައްދާ ކައިރި ހިސާބުގައި ރަޝިއާގެ ހަރަކާތްތައް އިތުރުވުމަކީ ކަންބޮޑުވާ ކަމެއް."
ޑިފެންސް މިނިސްޓްރީން ބުނީ ބުދަ ދުވަހު ފެނުނު ހެލިކޮޕްޓަރު ވައިގެ ސަރަހައްދަށް އެތެރެވި ސަބަބުން ހޯދަން މަސައްކަތް ކުރަމުންދާ ކަމަށާއި އެއީ ޔޫކްރެއިން ހަނގުރާމައާ ގުޅުން ހުރި ކަމެއްތޯ ވެސް ބަލާނެ ކަމަށެވެ.
