ފަނޑިޔާރުންނަށް ލިބޭ ބާރުގެ ދަށުން ގަތުލުގެ ތުހުމަތުވާ ކުއްޖެއް އެނބުރި ޖަލަށް ބަދަލުކޮށްދިނުމަށް ހައިކޯޓުން ވެސް ދެކޮޅު ހެދުމުން، އެ ކަންބޮޑުވުމާ އެކު ދައުލަތުން ސުޕްރީމް ކޯޓަށް ގޮސްފި އެވެ.
ޖިނާއީ ބޮޑެތި ކުށްތަކުގައި ތުހުމަތުކުރެވޭ ކުދިން ބަންދުކުރުމަށް ހެދި ޑިޓެންޝަރު ސެންޓަރު ނިމުނު ނަމަވެސް ކުޑަ ފިރިހެން ކުއްޖަކު ރަހީނުކޮށްގެން ގެންގުޅުމަށްފަހު، އަނިޔާވެރިގޮތަކަށް މަރާލައި މޫދަށް އެއްލާލާފައި އޮއްވާ ފެނުނު މައްސަލައިގައި ދައުވާކުރި 17 އަހަރުގެ ކުއްޖާ އެނބުރި ޖަލަށް ބަދަލުކުރުމުގެ އަމުރު ނެރެދިނުމަށް ހައިކޯޓުން ދެކޮޅު ހެދީ އެ ކުއްޖާ ގޭބަންދަށް ބަދަލު ކުރިއިރު ކުރި އެއްވެސް ޝަރުތަކާ ހިލާފު ވެފައި ނުވާތީ އެވެ. އަދި ގޭބަންދުގައި ހުރެ، ޝަރީއަތަށް އެއްބާރުލުން ދޭތީ އެވެ.
އެ ކުއްޖާ ގޭބަންދަށް ބަދަލުކުރީ، އޭރު ބޮޑެތި ކުށްތަކުގައި ހައްޔަރުކޮށްފައި ތިބި ކުދިން ބަހައްޓާފައި ތިބީ، ކުޑަކުދިން ބެހެއްޓުމަށް އެކަށީގެންނުވާ ޖަލެއްގައި ކަމަށް އެޗްއާރްސީއެމުން އޮކްޓޯބަރު، 2021 ގައި ކަނޑައަޅާފައިވާތީ އެވެ. ނަމަވެސް އެ ކުދިންގެ ހައްގުތަކަށް އުނިކަން ނާންނާނެ ގޮތަށް ޑިޓެންޝަން ސެންޓަރެއް ހެދުމަށްފަހު، މިދިޔަ މަހުގެ 30 ވަނަ ދުވަހު ހޯމް މިނިސްޓްރީއިން އެތަން ރަސްމީކޮށް ހުޅުވާ، ޖަލެއްގެ ހައިސިއްޔަތު ދިނުމާ އެކު މިހާރު ވަނީ އެ ހާލަތު ބަދަލުވެފަ އެވެ.
އެހެންވެ އެ ކުއްޖާގެ ފަރާތުން މުޖްތަމައުގެ ސަލާމަތަށް ނުރައްކާވެދާނެ ކަމުގެ އިހްތިމާލު އޮތް ކަމަށް ދައުލަތަށް ފެންނާތީ، ޖަލަށް ބަދަލުުކޮށްދިނުމަށް ޖުވެނައިލް ކޯޓުގައި އެދުނެވެ. އެ ކޯޓުން އެ އަމުރު ނުނެރެދިނުމުން ހައިކޯޓަށް ގޮސްގެން ވެސް ދައުލަތަށް ކާމިޔާބެއް ނުލިބުނެވެ.
"ފަނޑިޔާރުންނަށް ލިބިދޭ ބާރާއި އިހްތިޔާރު އެކަލަ [ކުޑަކުދިންނާ ގުޅުންހުރި] މައްސަލަތަކުގައި ބޭނުންކުރެވޭނެ މިންވަރު ކަނޑައަޅާ ދިނުމަށް އެދި ސުޕްރީމް ކޯޓަށް ދިޔައީ،" ކުޑަކުދިންގެ އަދުލުގެ ގާނޫނުގެ ދަށުން ފަނޑިޔާރުންނަށް ލިބޭ ބާރާއި އިހްތިޔާރުގެ ބޭނުންކޮށް، ހައިކޯޓުން އެ ކުއްޖާ އެނބުރި ޖަލަށް ބަދަލުކޮށް ނުދިނުމަށް ނިންމި ނިންމުން ސުޕްރީމް ކޯޓުގައި އިސްތިއުނާފްކޮށްފައިވާކަން ފާހަގަކޮށް ޕްރޮސެކިއުޓާ ޖެނެރަލް (ޕީޖީ) އޮފީހުން ބުންޏެވެ.
މި ނޫހާ ވާހަކަ ދައްކަވަމުން އެ އިދާރާގެ އޮފިޝަލަކު ވިދާޅުވީ ސުޕްރީމް ކޯޓުގެ ނިންމުމަށް ގާނޫނެއްގެ ދަރަޖަ ލިބޭއިރު، އެ އިސްތިއުނާފީ މައްސަލާއާ ގުޅިގެން ކުޑަކުދިންގެ މައްސަލަތަކުގައި ފަނޑިޔާރުންނަށް ލިބޭ ބާރާއި އިހްތިޔާރު ބޭނުންކުރެވޭނެ އިމެއް ކަނޑައެޅިގެން ދާނެ ކަމުގައި އުންމީދު ކުރާ ކަމަށެވެ.
އެ ކުއްޖާ އެނބުރި ޖަލަށް ބަދަލުކޮށްނުދިމަށް ހައިކޯޓުން ނިންމި ނިންމުމަކީ ޗިލްޑްރެންސް އޮޕްބޮޑްސް އޮފީހުގެވެސް ކަންބޮޑުވުމެކެވެ. އެއީ ގަތުލުގެ ތުހުމަތުވާ ކުއްޖެއް ގޭބަންދުގައި ބެހެއްޓުމަކީ މުޖްތަމައުގެ ސަލާމަތަށް ނުރައްކާވުމުގެ އިހުމާލު އޮތް ކަމަކަށް ވާތީ އެވެ.
"މި އޮފީހުން ދަނީ ހައިކޯޓުގެ ހުކުމް ދިރާސާކޮށް ބަލަމުން، އެ މައްސަލަ ހިނގަމުންދާ ގޮތް ގާތުން މޮނީޓާ ކުރަމުން (ބަލަމުން) ދަނީ،" ޗިލްޑްރެންސް އޮޕްބޮޑްސް އޮފީހުން ބުންޏެވެ.
އެ ކުއްޖާއަށް މިދިޔަ ނޮވެމްބަރު މަހު 18 އަހަރު ފުރިފައި ވީނަމަވެސް، ޕީޖީން ބުނީ މި ކުށަށް އޭނާ އަރައިގަނެފައި ވަނީ ކުޑަކުއްޖެގެ ގޮތުގައި ހުރެ ކަމަށްވުމުން، ދައުވާ ކުރާނީވެސް ކުޑަކުއްޖެއްގެ ގޮތުގައި ކަމަށެވެ. އަދި އޭނާގެ މައްޗަށް މި މައްސަލާގައި ޝަރީއަތް ކުރާއިރު، ކުޑަކުދިންނަށް ލިބޭ ހައްގުތައް ލިބޭނެ ކަމަށެވެ.
ކުޑަކުއްޖާގެ މައްޗަށް އުފުލި ދައުވާ
- ގަސްތުގައި މީހަކު މެރުން
- ހުއްދަ ނޫން ގޮތެއްގައި ހިފެހެއްޓުން
- މައްޔިތާގެ ބޭނުން ނަހަމަ ގޮތެއްގައި ހިފުން
އަލަށް އިމާރާތް ކުރި ސެންޓަރު ފަރުމާކޮށްފައި ވަނީ އެ ކުދިންނަށް ތައުލީމް އުނގަންނަވައިދެވޭނެ ގޮތަށް ކްލާސްރޫމާއި ތަމްރީން ކޮޓަރިތަކާއި ވެސް އެކު އެވެ. ގިނަ ހިދުމަތްތަކާ އެކު އެ ޖަލު ހަދާފައި ވަނީ ބައިނަލްއަގްވާމީ ފެންވަރަށެވެ.
ނަމަވެސް, އެ ސެންޓަރު ހެދެންދެން ގެއަށް ބަދަލުކުރި އެއްވެސް ކުއްޖެއް އެނބުރި ސެންޓަރަށް ބަދަލުކޮށްފައި ނުވެ އެވެ.
